Yokuthoma YeenKronike
17 Kuthe msinyana lokha uDavida nasele anzinzile ngendlinakhe,* wathi kuNathani+ umphorofidi: “Nakhu mina ngihlala ngendlini yemisedari+ kodwana umfaji wesivumelwano kaJehova ungetendeni.”+ 2 UNathani waphendula uDavida wathi: “Yenza nanyana yini esehliziywenakho ngombana uZimu weqiniso unawe.”
3 Ngobusuku bamhlokho, ilizwi lakaZimu leza kuNathani lathi: 4 “Khamba uyokutjela incekwami uDavida uthi, ‘Nakhu uJehova akutjhoko: “Akusinguwe ozongakhela indlu bona ngihlale kiyo.+ 5 Ngombana akhenge khengihlale ngendlini kusukela ngelanga engakhupha ngalo ama-Israyeli bekube kunamhlanjesi, bengisolo ngisuka kwelinye itende ngiya kwelinye begodu ngisuka kwelinye ithaberinakeli ngiye kwelinye.*+ 6 Hlangana naso soke isikhathi engasikhamba no-Israyeli woke, khengatjho na komunye wabahluleli bakwa-Israyeli engambeka bona aluse abantu bami, ngathi, ‘Kubayini ningakangakheli indlu yemisedari?’”’
7 “Nje-ke tjela incekwami uDavida lokhu, ‘UJehova wamabutho uthi: “Ngakuthatha emadlelweni, ekuluseni umhlambi bona ube mrholi wabantu bami u-Israyeli.+ 8 Ngizokuba nawe nanyana kukuphi lapho uya khona,+ ngizokususa woke amanabakho phambi kwakho;+ ngizokwenzela igama njengegama labantu abakhulu bephasi.+ 9 Ngizokukhethela abantu bami u-Israyeli indawo ngibahlalise kiyo, bazokuhlala lapho begodu angeze basatshwenywa nabantu abambi angekhe basabagandelela njengombana babagandelela esikhathini esidlulileko,+ 10 kusukela ngelanga engabeka ngalo abahluleli phezu kwabantu bami u-Israyeli.+ Ngizokuhlula woke amanabakho.+ Ngaphezu kwalokho ngithi kuwe, ‘UJehova uzokwakhela indlu.’
11 “‘“Amalangakho nakaphelako begodu uhlongakala,* ngizokwenza umntwanakho ngemva kwakho, enye yamadodanakho+ bona ibe yikosi begodu ngizokuqinisa ubukhosi bayo.+ 12 Ngiyo ezongakhela indlu+ begodu ngizokuqinisa isihlalo sayo sobukhosi ngokungapheliko.+ 13 Ngizokuba nguyise, yona izokuba yindodanami.+ Angekhe ngilisuse ithando* lami kiyo+ njengombana ngalisusa kiloyo obekangaphambi kwakho.+ 14 Ngizomenza ajame ngendlinami nebukhosini bami ngokungapheliko+ begodu isihlalo sakhe sobukhosi sizokuhlala ngokungapheliko.”’”+
15 UNathani watjela uDavida woke amezwi la nawo woke umbono lo.
16 Ngalokho iKosi uDavida yahlala phambi kwakaJehova, yathi: “Maye! Jehova Zimu, bengiyini mina. Begodu iyini indlwami bona ungangenzela zoke izintwezi?+ 17 Maye! Zimu njengokungathi lokhu bekungakaneli godu ukhuluma ngendlu yencekwakho bekube sesikhathini esikude esizako+ begodu ungiqale njengomuntu okufuze aphakanyiswe ukudlula lokhu, Jehova Zimu. 18 Ngikuphi okhunye incekwakho uDavida engakutjho kuwe malungana nedumo onginikele lona njengombana uyazi kuhle kangaka incekwakho?+ 19 Maye! Jehova ngebanga lencekwakho nangokuvumelana nehliziywakho,* wenze zoke izinto ezikulwezi ngokwambula ubukhulu bakho.+ 20 Maye! Jehova akekho onjengawe,+ akekho uZimu ngaphandle kwakho;+ koke esikuzwe ngeendlebe zethu kuyakuqinisekisa lokhu. 21 Ngisiphi esinye isitjhaba ephasini esifana nabantu bakho u-Israyeli?+ UZimu weqiniso wakhamba wayobahlenga bona babe babantu bakhe.+ Uzenzele igama ngemisebenzakho emikhulu nebabazekako,+ waqotha iintjhaba phambi kwabantu bakho,+ owabahlenga eGibhide. 22 Wenze abantu bakho u-Israyeli baba ngebakho ngokungapheliko+ begodu wena Jehova, waba nguZimabo.+ 23 Nje-ke Jehova, kwanga isithembiso osenze malungana nencekwakho nendlwayo singathembeka ngokungapheliko begodu kwanga ungenza njengombana uthembisile.+ 24 Kwanga igama lakho lingahlala likhona beliphakanyiswe+ ngokungapheliko bona abantu bathi, ‘UJehova wamabutho, uZimu ka-Israyeli, nguZimu ku-Israyeli’ begodu kwanga indlu yencekwakho uDavida ingaqiniswa phambi kwakho.+ 25 Ngombana wena Zimami, wambulele incekwakho umnqophwakho wokuyakhela indlu. Kungebangelo-ke incekwakho inesibindi sokwenza umthandazo lo kuwe. 26 Nje-ke Jehova, unguZimu weqiniso begodu uthembise izinto ezihlezi malungana nencekwakho. 27 Kwanga kungakuthabisa ukubusisa indlu yencekwakho, kwanga ingahlala ngokungapheliko phambi kwakho ngombana wena Jehova, uyibusisile begodu ibusiseke ngokungapheliko.”