Yesibili YeenKronike

6 Ngesikhatheso uSolomoni wathi: “UJehova wathi uzokuhlala elifini elinzima.+ 2 Nje-ke ngikwakhele indlu ephakemeko, indawo enzinzileko bona uhlale kiyo isiphelani.”+

3 Ngemva kwalokho, ikosi yaphenduka yathoma ukubusisa loke ibandla lakwa-Israyeli kukulapho loke ibandla lakwa-Israyeli lijame ngeenyawo.+ 4 Yathi: “Kwanga uJehova uZimu ka-Israyeli angadunyiswa, loyo ngomlomakhe athembisa ubaba uDavida nangezandla zakhe wenza bona isithembiswesi sizaliseke, wathi, 5 ‘Kusukela ngelanga engakhupha ngalo abantu bami enarheni yeGibhide, akhenge ngikhethe idorobho hlangana neentjhaba zakwa-Israyeli lapho ngizokwakhela khona igama lami indlu bonyana lihlale khona+ begodu akunamuntu engamkhethako bona abe mrholi phezu kwabantu bami u-Israyeli. 6 Kodwana ngikhethe iJerusalema+ bona igama lami lihlale khona begodu ngikhethe uDavida bona aphathe abantu bami u-Israyeli.’+ 7 Nje-ke ubaba uDavida bekafisa ngehliziywakhe yoke ukwakhela igama lakaJehova uZimu ka-Israyeli indlu.+ 8 Kodwana uJehova wathi kubaba uDavida, ‘Bewufisa ngehliziywakho yoke ukwakhela igama lami indlu begodu wenze intwehle ngokufisa lokhu ehliziywenakho. 9 Nanyana kunjalo, angekhe uyakhe indlu leyo, indodanakho ozoyibeletha, ngiyo ezokwakhela igama lami indlu.’+ 10 UJehova ufeze isithembiso asenzako ngombana ngimi ongene esikhundleni sakababa uDavida, ngahlala esihlalweni sobukhosi saka-Israyeli+ njengombana uJehova athembisile.+ Godu ngakhele igama lakaJehova uZimu ka-Israyeli indlu, 11 lapho ngibeke umFaji onesivumelwano+ uJehova asenza nabantu bakwa-Israyeli.”

12 Ngemva kwalokho, wajama phambi kwe-aldara lakaJehova phambi kwalo loke ibandla lakwa-Israyeli, walula izandla zakhe.+ 13 (Ngombana uSolomoni bekenze indawo yesikhulumi ngekhopha bese wayibeka phakathi kwesirhodlo.+ Beyimakhubhithi amahlanu ubude, imakhubhithi* amahlanu ububanzi, imakhubhithi amathathu ukuphakama; wajama phezu kwayo.) Waguqa phambi kwalo loke ibandla lakwa-Israyeli walulela izandla zakhe ezulwini,+ 14 wathi: “Jehova Zimu ka-Israyeli, akakho omunye uZimu onjengawe ezulwini namkha ephasini, ophetha isivumelwano nothanda* iinceku zakhe ezikhamba phambi kwakho ngeenhliziyo zazo zoke.+ 15 Ukwenzile owakuthembisa incekwakho uDavida ubaba.+ Wenza isithembisweso ngomlomakho begodu namhlanjesi, usenze sazaliseka ngesandla sakho.+ 16 Nje-ke Jehova Zimu ka-Israyeli, phetha isithembiso owasenza nencekwakho uDavida ubaba nawuthi: ‘Kuzokuhlala kunomuntu osizukulwana sakho esihlalweni sobukhosi sakwa-Israyeli, kwaphela nangabe amadodanakho atjheja indlela akhamba ngayo phambi kwami,+ ngendlela wena okhambe ngayo phambi kwami.’+ 17 Nje-ke Jehova Zimu ka-Israyeli, asizaliseke isithembiso owasenza encekwinakho uDavida.

18 “Kodwana kwamambala uZimu uzokuhlala nabantu ephasini?+ Qala! Izulu, iye, izulu lezulu, angeze lakghona ukukuthwala;+ iyini-ke indlu engiyakhileko le!+ 19 Nje-ke Jehova Zimami, ngibawa ulalelisise umthandazo wencekwakho nesibawo sayo somusa, ulalele nesililo sokubawa isizo nomthandazo incekwakho ewuthandaza phambi kwakho. 20 Kwanga amehlwakho angavulekela ngendlini le imini nobusuku, aqale indawo owathi ngayo uzokubeka igama lakho kiyo+ bona ulalele umthandazo incekwakho ewuthandaza iqale endaweni le. 21 Lalela incekwakho nayibawa isizo neembawo zabantu bakho ama-Israyeli nabathandaza baqale endaweni le+ begodu kwanga ungezwa usendawenakho yokuhlala ezulwini;+ iye, kwanga ungezwa begodu ulibalele.+

22 “Nakungenzeka umuntu one omunye umuntu bese afungiswe,* abe ngaphasi kwesifungo esiletha isijeziso, kuthi asesengaphasi kwesifungweso eze phambi kwe-aldara lakho endlini le,+ 23 kwangathi ungalalela usezulwini, uthathe igadango wahlulele iinceku zakho ngokujezisa omumbi, ukubeke ehlokwakhe koke akwenzileko+ bese uthi kolungileko umsulwa, umtlomelise ngokuvumelana nokulunga kwakhe.+

24 “Nakungenzeka abantu bakho u-Israyeli bahlulwe sisitha ngebanga lokuthi bebasolo bona kuwe,+ bese babuye baphazimulise igama+ lakho bebathandaze phambi kwakho+ basendlini le bakuncenge bona ube nomusa,+ 25 kwanga ungabezwa usezulwini,+ ulibalele isono sabantu bakho u-Israyeli, ubabuyisele enarheni oyinikele bona nabokhokho babo.+

26 “Umkayi nawuvaliweko, kunganazulu elinako+ ngebanga lokuthi bebasolo bona kuwe+ bese bathandaza baqale endaweni le, baphazimulise igama lakho bebatjhuguluke esonweni sabo ngebanga lokuthi ubahlunguphazile,*+ 27 kwanga ungezwa usezulwini ulibalele isono seenceku zakho, abantu bakho u-Israyeli ngombana uzobafundisa indlelehle okufuze bakhambe ngayo;+ unise nezulu+ enarhenakho owayinikela abantu bakho bona ibe lilifa labo.

28 “Nakungenzeka kube nendlala enarheni le+ namkha isifo,+ ubori, ukukghora,+ isikhonyani namkha iintethe ezirhiribidelako,+ namkha nakungenzeka izitha zabo zibavimbezele kinanyana ngiliphi idorobho lenarha le+ namkha nabangehlelwa nginanyana ngimuphi umhlobo wesibetho namkha isifo,+ 29 nanyana ngimuphi umthandazo,+ nanyana ngisiphi isibawo somusa+ esenziwe nginanyana ngimuphi umuntu namkha esenziwa babantu bakho boke u-Israyeli (ngombana ngamunye uyawazi amatshwenyekwakhe nobuhlungu bakhe)+ nabalulela izandla zabo ngendlini le,+ 30 kwanga ungezwa usezulwini, indawo ohlala kiyo+ begodu kwangathi ungalibalela;+ ubuyisele ngamunye ngokuvumelana nazo zoke iindlela zakhe ngombana uyayazi ihliziywakhe (nguwe wedwa oyazi kwamambala ihliziyo yomuntu)+ 31 bona bakusabe ngokukhamba eendleleni zakho yoke imihla abayiphila enarheni owayinikela abokhokho bethu.

32 “Godu malungana nomuntu wakwesinye isitjhaba ongasiyingcenye yabantu bakho u-Israyeli, ovela enarheni ekude ngebanga legama lakho*+ elikhulu nangesandla sakho esinamandla nomkhonwakho olulekileko, oza bese athandaze aqale endlini le,+ 33 kwanga ungalalela usezulwini, indawo ohlala kiyo, wenze koke umuntu wakwesinye isitjhaba lo akubawa kuwe bona zoke iintjhaba zephasi zilazi igama lakho,+ zikusabe njengabantu bakho u-Israyeli, zazi nokuthi igama lakho libizwe endlini engikwakhele yona le.

34 “Nakwenzeka abantu bakho batjhinge epini bayokulwa namanababo ngendlela obathume ngayo+ bese bathandaza+ kuwe baqale edorobheni olikhethilekweli begodu baqale endlini engiyakhele igama lakho,+ 35 kwanga ungezwa umthandazwabo usezulwini nesibawo sabo somusa ubasize.+

36 “Nangabe bayakonela (ngombana akunamuntu ongoniko)+ begodu uvuthe ngelaka ngebanga labo, ubalahlele enabeni, abathumbi babo babathumbele kwenye inarha, kude namkha eduze+ 37 bese bayaqaquluka enarheni abathunjelwe kiyo, babuyele kuwe, babawe umusakho basenarheni abathunjelwe kiyo, bathi, ‘Sonile begodu senze okumbi; senze ubukhohlakali’+ 38 bese babuyele kuwe ngeenhliziyo zabo zoke+ nangomphefumulwabo* woke enarheni abathunjelwe kiyo,+ bathandaze kuwe baqale inarhabo oyinikele abakhokho babo nedorobho olikhethileko+ nendlu engiyakhele igama lakho, 39 nje-ke usezulwini, indawo ohlala kiyo, sibawa uzwe umthandazwabo nesibawo sabo somusa ubasize, ulibalele abantu bakho abakoneleko,+ ulibalele yoke imitjhapho abayenze kuwe.

40 “Nje-ke Zimami ngiyabawa, kwanga amehlwakho angabona neendlebe zakho zizwe umthandazo owenziwa endaweni le.+ 41 Nje-ke khuphuka, Jehova Zimu, uye endawenakho yokuphumula,+ wena nomFaji wamandlakho. Abaphristi bakho, Jehova Zimu, abambathiswe isindiso begodu abathembekileko bakho abathabe ebuhleni bakho.+ 42 Maye! Jehova Zimu, ungamlahli ozesiwekwakho.+ Kwanga ungakhumbula ithando* obenalo encekwinakho uDavida.”+