Eksodusi
17 Woke ama-Israyeli asuka emmangweni weSini+ akhamba asuka kwenye inarha aya kwenye ngokwesinqophiso sakaJehova,+ emaswapheleni ahloma amatende eRefidimu+ kodwana bekunganamanzi wokusela.
2 Nje-ke abantu bathoma ukulwa noMosi+ bathi: “Sinikela amanzi wokusela.” UMosi wathi kibo: “Kubayini nilwa nami? Kubayini nisolo nilinga uJehova?”+ 3 Abantu bebome khulu, banghonghoyila kuMosi+ bathi: “Kubayini usikhuphe eGibhide bona sizokubulawa kukoma, thina, amadodanethu nefuywethu?” 4 Emaswapheleni uMosi walilela uJehova wathi: “Kufuze ngenzeni ngabantwaba? Sekusele kancani bona bangikghadlhe ngamatje!”
5 Ngemva kwalokho uJehova wathi kuMosi: “Khamba phambi kwabantu, uthathe abanye abadala bakwa-Israyeli nentonga leya owabetha ngayo uMlambo iNayili,+ uyibambe ngesandla urage nekhambo. 6 Qala! Ngizabe ngijame phambi kwakho elitjeni eRhorebe, kufuze ulibethe, kuphume amanzi kilo abantu basele.”+ UMosi wenza njalo phambi kwabadala bakwa-Israyeli. 7 Wathiya indawo leyo ngokuthi yiMasa*+ nangokuthi yiMeriba*+ ngombana ama-Israyeli alwa noMosi begodu alinga uJehova+ athi: “Inga-kghani uJehova uphakathi kwethu?”
8 Nje-ke ama-Amalekhi+ eza azokulwa nama-Israyeli eRefidimu.+ 9 UMosi wathi kuJotjhuwa:+ “Sikhethela amadoda akhambe ayosilwela nama-Amalekhi. Kusasa ngizokujama esiqongolweni sentaba ngiphethe intonga kaZimu weqiniso.” 10 Ngemva kwalokho uJotjhuwa wenza njengombana uMosi amtjelile,+ walwa nama-Amalekhi. UMosi, u-Aroni noRhuri+ bakhuphukela esiqongolweni sentaba.
11 Bekuthi izandla zakaMosi naziphezulu, ama-Israyeli abe namandla kodwana nakazehlisako ama-Amalekhi abe namandla. 12 Lokha izandla zakaMosi nazidiniweko, bathatha ilitje balibeka phasi kwakhe, wahlala phezu kwalo. U-Aroni noRhuri basekela izandla zakhe, omunye wajama ngapha omunye ngapha ukwenzela bona izandla zakhe zihlale ziphezulu bekutjhinge ilanga. 13 UJotjhuwa wahlula ibutho lama-Amalekhi ngesabula.+
14 Nje-ke uJehova wathi kuMosi: “Tlola lokhu encwadini kube sikhumbuzo bewukutjele uJotjhuwa, ‘Ngizokutjhabalalisa ama-Amalekhi angekhe asakhunjulwa ephasini.’”+ 15 UMosi wakha i-aldara walithiya ngokuthi yiJehova-nisi,* 16 wathi: “Ngebanga lokuthi isandla sawo silwa nesihlalo sobukhosi sakaJah,+ uJehova uzokulwa nama-Amalekhi neenzukulwana zawo zoke.”+