Yokuthoma YeenKronike
28 Yeke uDavida wahlanganisela woke amakhosana wakwa-Israyeli eJerusalema: Amakhosana weenkoro, iinduna zeengaba+ ezisebenzela ikosi, iinduna zeenkulungwana neenduna zamakhulu,+ neenduna zayo yoke ipahla nefuyo yekosi+ neyamadodanayo,+ neenkhulu zesigodlo nawo woke amadoda anamandla nanobukghoni.+ 2 Nje-ke iKosi uDavida yasikima yathi:
“Ngibawa ningiphe indlebe, bafowethu nani bantu bekhethu. Bengifisa ngehliziywami yoke ukwakha indlu ezokuba yindawo yokuphumula yomfaji wesivumelwano kaJehova beyibe sinabelo seenyawo zakaZimethu+ bengenze namalungiselelo wokwakha.+ 3 Kodwana uZimu weqiniso wathi kimi, ‘Angekhe wakhele igama lami indlu,+ ngombana uyindoda yezipi begodu uphalaze iingazi.’+ 4 Nanyana kunjalo, uJehova uZimu ka-Israyeli wakhetha mina kiyo yoke indlu kababa bona ngibe yikosi yakwa-Israyeli ngokungapheliko,+ ngombana wakhetha uJuda bona abe mrholi+ begodu endlini kaJuda wakhetha indlu kababa,+ emadodaneni kababa, ngimi owamukelekako kuye bona angibeke ngibe yikosi phezu kwaka-Israyeli woke.+ 5 Godu kiwo woke amadodanami ngombana uJehova ungiphe amadodana amanengi,+ ukhethe indodanami uSolomoni+ bona ihlale esihlalweni sobukhosi sakaJehova ibuse phezu kwaka-Israyeli.+
6 “Wathi kimi, ‘USolomoni indodanakho nguye ozokwakha indlwami neenrhodlo zami ngombana ngikhethe yena bona abe yindodanami begodu mina ngizokuba nguyise.+ 7 Ngizokunzinzisa ubukhosi bakhe ngokungapheliko+ nakangayilalela ngokuzimisela imiyalwami nezahlulelo zami,+ njengombana enza nje.’ 8 Nje-ke ngitjho phambi kwaka-Israyeli woke, ibandla lakaJehova neendlebeni zakaZimethu: Ilaleleni ngokutjheja, nifune yoke imiyalo kaJehova uZimenu, ukuze nizuze inarha ehle+ beniyidlulisele njengelifa lasafuthi emadodanenenu ngemva kwenu.
9 “Wena Solomoni ndodanami, yazi uZimu kayihlo begodu umlotjhe ngehliziyo epheleleko+ nangomphefumulo* othabileko ngombana uJehova uhlola zoke iinhliziyo+ begodu ulemuka koke ukutjhigamela kwemicabango.+ Nawumfunako, uzozenza afumaneke kuwe+ kodwana nawungamtjhiya, uzokulahla bekube nini nanini.+ 10 Tjheja-ke ngombana uJehova ukhethe wena bona umakhele indlu ezokuba yindawo ecwengileko. Yiba nesibindi bewusebenze.”
11 Ngemva kwalokho, uDavida wanikela uSolomoni indodanakhe umtlamo+ wamathuri+ nezindlu zawo, iinlulu zawo, iinkumba zawo ezisephahleni, iinkumba zawo ezingaphakathi nendlu yesigubuzeso sokubuyisana.*+ 12 Wamnikela umtlamo wakho koke okudluliselwe kuye ngokuphefumulelwa, okumtlamo weenrhodlo+ zendlu kaJehova, wazo zoke iinkumba zokudlela eziyibhodileko, wamabulungelo wamagugu wendlu kaZimu weqiniso newamabulungelo wamagugu wezinto ezenziwe zacwengeka;*+ 13 wamnikela iinqophiso zeengaba zabaphristi+ nezamaLevi, zazo zoke izabelo zomsebenzi wendlu kaJehova nezazo zoke iinsetjenziswa zomsebenzi wendlu kaJehova; 14 watjho nobudisi begolide, igolide lazo zoke iinsetjenziswa zemisebenzi ehlukahlukeneko, ubudisi bazo zoke iinsetjenziswa zesiliva nebazo zoke iinsetjenziswa zemisebenzi ehlukahlukeneko 15 nobudisi bamalithi weembani zegolide+ neembani zawo zegolide, ubudisi bamalithi weembani ahlukahlukeneko neembani zawo nobudisi bamalithi weembani zesiliva, welithi lesibani ngalinye neembani zalo ngokwalokho ezisetjenziselwa khona 16 nobudisi begolide lamatafula woburotho obubekwe ngamalarha,*+ letafula ngalinye, kuhlanganise nesiliva lamatafula wesiliva, 17 bamaforogo, bezitja nemijeka yegolide elicwengileko nobudisi bezitja ezincani zegolide,+ besitja esincani ngasinye nobudisi bezitja ezincani zesiliva, besitja esincani ngasinye. 18 Godu wanikela nobudisi begolide elitsengiweko le-aldara yepepho+ nelomfanekiso wekarana,+ okutjho, amakherubhi+ wegolide alule amaphikwawo agubuzesa umfaji wesivumelwano kaJehova. 19 UDavida wathi: “Isandla sakaJehova besiphezu kwami begodu wanginikela ilemuko lokutlola phasi yoke imininingwana yomtlamo lo.”+
20 Ngemva kwalokho, uDavida wathi endodanenakhe uSolomoni: “Qina ube nesibindi bewusebenze. Ungathukwa namkha uhlengezele ngombana uJehova uZimu, uZimami, unawe.+ Angekhe akutjhiye namkha akulahle,+ kodwana uzokuba nawe bekuphele woke umsebenzi wendlu kaJehova. 21 Nanzi iingaba zabaphristi+ nezamaLevi+ bona zenze woke umsebenzi wendlu kaZimu weqiniso. Godu uneensebenzi ezizimiseleko nezinobukghoni bokwenza yoke imihlobo yomsebenzi,+ namakhosana+ nabantu boke abazokulalela zoke iinqophiso zakho.”