Yesibili YeenKronike
36 Ngemva kwalokho, abantu benarha leyo bathatha uJehowarhazi+ indodana kaJosiya, bamenza ikosi eJerusalema esikhundleni sakayise.+ 2 UJehowarhazi bekaneminyaka ema-23 nakaba yikosi begodu wabusa iinyanga ezintathu eJerusalema. 3 Ikosi yeGibhide yamsusa esikhundleni sakhe eJerusalema, yahlawulisa inarha amatalende* wesiliva ali-100 netalende legolide.+ 4 Ngaphezu kwalokho, yabeka u-Eliyakhimu umfowabo kaJehowarhazi bona abe yikosi kwaJuda neJerusalema begodu yatjhugulula igama lakhe yamthiya ngokuthi nguJehoyakhimu; kodwana uNekho+ wathatha uJehowarhazi umfowabo wamusa eGibhide.+
5 UJehoyakhimu+ bekaneminyaka ema-25 nakaba yikosi begodu wabusa iminyaka eli-11 eJerusalema. Waraga nokwenza okumbi phambi kwakaJehova uZimakhe.+ 6 UNebukadinetsari+ ikosi yeBhabhiloni weza wazokulwa naye bona ambophe ngamakhamandela amabili wekhopha amuse eBhabhiloni.+ 7 UNebukadinetsari wathatha ezinye zezitja zendlu kaJehova wazisa eBhabhiloni wazifaka ngesigodlweni sakhe eBhabhiloni.+ 8 Malungana nawo woke omunye umlando kaJehoyakhimu, izinto ezinyenyisako azenzileko nakho koke okumbi akwenzileko, kutloliwe eNcwadini yamaKhosi wakwa-Israyeli newakwaJuda; indodanakhe uJehoyakini yaba yikosi esikhundleni sakhe.+
9 UJehoyakini+ bekaneminyaka eli-18 nakaba yikosi, wabusa iinyanga ezintathu namalanga alitjhumi eJerusalema; waraga nokwenza okumbi phambi kwakaJehova.+ 10 Ekuthomeni komnyaka,* iKosi uNebukadinetsari yathumela umlayezo bona uJehoyakini alethwe eBhabhiloni+ nezinto eziligugu zendlu kaJehova.+ Yabeka uTsedekhiya umfowabo kayise bona abe yikosi kwaJuda neJerusalema.+
11 UTsedekhiya+ bekaneminyaka ema-21 nakaba yikosi, wabusa iminyaka eli-11 eJerusalema.+ 12 Waraga nokwenza okumbi phambi kwakaJehova uZimakhe. Akhenge azithobe kumphorofidi uJoromiya+ owakhuluma ayalwa nguJehova. 13 Wahlubuka neKosini uNebukadinetsari,+ eyamfungisa ngoZimu, wasolo anekani, wala nokubuyela kuJehova uZimu ka-Israyeli. 14 Zoke iinduna zabaphristi kuhlanganise nabantu baraga ngezenzo zabo zokungathembeki, benza zoke izinto ezinyenyisako egade zenziwa ziintjhaba, basilaphaza nendlu kaJehova+ ayicwengisa eJerusalema.
15 UJehova uZimu wabokhokho babo wasolo abayelelisa asebenzisa iinthunywa zakhe, abayelelisa ngokubuyelelweko ngombana wabarhawukela abantu bakhe nethempeli lakhe.* 16 Kodwana basolo bahlekisa ngeenthunywa zakaZimu weqiniso,+ banyaza namezwakhe,+ bahleka nabaphorofidi bakhe+ ubudlhadlha bekwaba kulapho ilaka lakaJehova lehlela phezu kwabantu bakhe+ bekwaba kulapho bangasasizeki.
17 Yeke wathumela ikosi yamaKhaledi,*+ eyabulala amasokanabo ngesabula+ endaweni ecwengileko;+ akhenge irhawukele amasokana namkha iintombi, abalupheleko namkha abarholopheleko.+ UZimu wanikela koke esandleni sayo.+ 18 Zoke izitja zendlu kaZimu weqiniso ezikulu nezincani kuhlanganise namagugu wendlu kaJehova namagugu wekosi namakhosanayo, koke yakuletha eBhabhiloni.+ 19 Yatjhisa indlu kaZimu weqiniso,+ yagiriza iboda leJerusalema,+ yatjhisa yoke imibhotjhongwalo evikelekileko, yatjhabalalisa nakho koke okuligugu.+ 20 Yathumba labo abasinde esabuleni yabasa eBhabhiloni,+ baba ziinsebenzi zayo+ nezamadodanayo bekwaba kulapho umbuso wePheresiya uthoma ukubusa,+ 21 bona kuzaliseke amezwi uJehova awakhuluma ngoJoromiya,+ bekwaba kulapho inarha seyibuse amasabathayo.+ Ngesikhathi imarubhi beyiphetha isabatha bona kuzaliseke iminyaka ema-70.+
22 Ngomnyaka wokuthoma wokubusa kwakaKoretjhi ikosi yePheresiya,+ bona kuzaliseke okwakhulunywa nguJehova ngoJoromiya,+ uJehova wahlohlozela uKoretjhi ikosi yePheresiya bona amemezele kiwo woke umbuswakhe bese atlole phasi+ athi: 23 “Nakhu okutjhiwo nguKoretjhi ikosi yePheresiya, ‘UJehova uZimu wezulwini unginikele yoke imibuso yephasi,+ ungilayele bona ngimakhele nendlu eJerusalema, kwaJuda.+ Nanyana ngubani omlotjhako hlangana nani, kwanga uJehova uZimakhe angaba naye. Akakhuphuke.’”+