Yesibili YamaKhosi
16 Ngomnyaka we-17 kaPhekharhi indodana kaRemaliya, u-Arhazi+ indodana kaJothamu iKosi yakwaJuda waba yikosi. 2 U-Arhazi bekaneminyaka ema-20 nakaba yikosi begodu wabusa iminyaka eli-16 eJerusalema. Akhenge enze okuhle emehlweni kaJehova uZimakhe njengombana kwenza ukhokhwakhe uDavida.+ 3 Kunalokho wakhamba emtlhaleni wamakhosi wakwa-Israyeli,+ wenza ngitjho nendodanakhe yaba mhlatjelo,*+ wenza izinto ezinyenyisako ebezenziwa ziintjhaba+ uJehova aziqotha phambi kwama-Israyeli. 4 Waraga nokwenza umhlatjelo begodu athunyisa intuthu yomhlatjelo eendaweni eziphakemeko,+ emibundwini nangaphasi kwayo yoke imithi ehlaza.+
5 Kungesikhatheso iKosi yeSiriya uRetsini noPhekharhi indodana kaRemaliya ikosi yakwa-Israyeli abakhuphuka ngaso bayokulwa neJerusalema.+ Bavimbezela u-Arhazi kodwana akhenge bakghone ukuthumba idorobho. 6 Ngesikhatheso uRetsini iKosi yeSiriya wabuyisela i-Elathi+ ku-Edomu, ngemva kwalokho waqotha amaJuda e-Elathi. Ama-Edomu angena e-Elathi, ahlala khona bekwaba kunamhlanjesi. 7 Nje-ke u-Arhazi wathumela iinthunywa kuTigilathi-Pileseri+ iKosi ye-Asiriya, wathi: “Ngisisebenzi sakho bengiyindodanakho. Ngibawa ukhuphuke uzongisindisa esandleni sekosi yeSiriya nesandleni sekosi yakwa-Israyeli abangisahlelako.” 8 Ngemva kwalokho, u-Arhazi wathatha isiliva negolide elifunyenwe ngendlini kaJehova nangemabulungelweni wamagugu wendlu yekosi,* wafumbathisa ngazo ikosi ye-Asiriya.+ 9 Ikosi ye-Asiriya yasamukela isibawo sakhe, yakhuphukela eDamaseku, yayithumba, yathatha abantu bakhona yabasa ekudingisweni eKhiri,+ yabulala uRetsini.+
10 Nje-ke iKosi u-Arhazi yakhamba yayokuhlangana noTigilathi-Pileseri ikosi ye-Asiriya eDamaseku. IKosi u-Arhazi ithe nayibona i-aldara ebeliseDamaseku, yathumela u-Uriya umphristi iplani ye-aldara, etjengisa imininingwana yokobana lenziwe bunjani.+ 11 U-Uriya+ umphristi wakha i-aldara+ ngokuvumelana nazo zoke iinqophiso azithunyelwe yiKosi u-Arhazi iseDamaseku. U-Uriya umphristi waqeda ukwakha i-aldara iKosi u-Arhazi ingakabuyi eDamaseku. 12 Ikosi nayibuya eDamaseku yabona i-aldara, yatjhidela e-aldareni yenza iminikelo kilo.+ 13 Yaragela phambili ithunyisa iminikelwayo yokutjhiswa neminikelwayo yeenthoro e-aldarenelo; yathela neminikelwayo yesiselo, yafafaza neengazi zemihlatjelwayo yetjhebiswano kilo. 14 Ngemva kwalokho, yasusa i-aldara lekhopha+ ebeliphambi kwakaJehova endawenalo phambi kwendlu, hlangana ne-aldara layo nendlu kaJehova, yalibeka ukuya ngetlhagwini ye-aldara layo. 15 IKosi u-Arhazi yayala u-Uriya+ umphristi yathi: “Thunyisa umnikelo otjhiswako wekuseni e-aldareni elikhulu,+ uthunyise nomnikelo weenthoro wantambama,+ umnikelo otjhiswako wekosi nomnikelo wayo weenthoro, kuhlanganise neminikelo etjhiswako, iminikelo yeenthoro neminikelo yesiselo yabo boke abantu. Ufafaze neengazi zoke zeminikelo yokutjhiswa neengazi zayo yoke imihlatjelo eminye. Malungana ne-aldara lekhopha, khengicabangisise ukuthi ngizokwenzani ngalo.” 16 U-Uriya umphristi wenza koke iKosi u-Arhazi eyamyala bona akwenze.+
17 Ngaphezu kwalokho, iKosi u-Arhazi yaqunta imiqebethu yeenkarana+ yaba ziinquqwana, yasusa nezitja kizo,+ yehlisa iLwandle phezu kweenkunzi zekhopha+ ebezilisekela, yalibeka emgangadelweni wamatje.+ 18 Indawo efulelweko ebeyisetjenziswa ngeSabatha, eyakhiwe ngendlini nendleleni lapho kungena khona amakhosi yasuswa endlini kaJehova; yenza lokhu ngebanga lekosi ye-Asiriya.
19 Malungana nawo woke omunye umlando ka-Arhazi, akwenzileko, akukatlolwa na encwadini yomlando weenkhathi zamakhosi wakwaJuda?+ 20 Nje-ke u-Arhazi walaliswa nabokhokho bakhe begodu wabulungwa nabokhokho bakhe eDorobheni lakaDavida; indodanakhe uHezekiya*+ yaba yikosi esikhundleni sakhe.