Yesibili YeenKronike

29 UHezekiya+ bekaneminyaka ema-25 nakaba yikosi, wabusa iminyaka ema-29 eJerusalema. Igama lakanina bekungu-Abhiya indodakazi kaZakariya.+ 2 Wasolo enza okuhle emehlweni kaJehova+ njengombana kwenza uDavida ukhokhwakhe.+ 3 Ngomnyaka wokuthoma wokubusa kwakhe, enyangeni yokuthoma, wavula iminyango yendlu kaJehova bese wayilungisa.+ 4 Ngemva kwalokho, wathatha abaphristi namaLevi, wabahlanganisa ngepumalanga yedorobho. 5 Wathi kibo: “Ngilalelani nina maLevi. Zicwengiseni,+ nicwengise nendlu kaJehova uZimu wabokhokho benu, nisuse nokusilapheleko endaweni ecwengileko.+ 6 Ngombana abokhokho bethu akhenge bathembeke begodu benze okumbi phambi kwakaJehova uZimethu.+ Bamlahlile, akhenge bahloniphe ithaberinakeli lakaJehova begodu bamfulathele.+ 7 Godu bavale iminyango yethuri,+ bacima neembani.+ Balisa ukutjhisa ipepho+ nokwenza imihlatjelo etjhiswako+ endaweni ecwengileko kaZimu ka-Israyeli. 8 Nje-ke ilaka lakaJehova lehlela abantu bakwaJuda nebeJerusalema,+ wabalethela nehlekelele bona labo ababonako nabezwa ngalokho barhidlwe livalo, barareke begodu babethe umlozi* njengombana nani nizibonela.+ 9 Kungebangeli abokhokho bethu babulalwa ngesabula,+ amadodanethu, amadodakazethu nabafazi bethu basiwa ekuthunjweni.+ 10 Ngifisa ngokusuka ehliziyweni ukwenza isivumelwano noJehova uZimu ka-Israyeli,+ bona ilaka lakhe elivuthako lisuke kithi. 11 Madodanami, nje akusisikhathi sokuliselela ngombana uJehova unikhethe bona nijame phambi kwakhe, nibe ziinsebenzi zakhe,+ nithunyise nemihlatjelwakhe.”+

12 Yeke amaLevi asikima: BekunguMarhathi indodana ka-Amasayi noJuweli indodana ka-Azariya wamaKhehathi;+ kumaMerari,+ bekunguKhitjhi indodana ka-Abidi no-Azariya indodana kaJehaleleli; kumaGeritjhoni,+ bekunguJowarhi indodana kaZima no-Edeni indodana kaJowarhi; 13 emadodaneni ka-Elitsafani, bekunguTjhimri noJeyeli; emadodaneni ka-Asafa,+ bekunguZakariya noMathaniya; 14 emadodaneni kaHemani,+ bekunguJerhiyeli noTjhimeyi; emadodaneni kaJedutuni,+ bekunguTjhemaya no-Uziyeli. 15 Ngemva kwalokho, abuthelela abafowabo, azicwengisa begodu eza bona azokuhlwengisa indlu kaJehova njengombana ikosi iyalile ngokwamezwi kaJehova.+ 16 Abaphristi bangena ngendlini kaJehova bona bayihlwengise, bakhupha koke okusilapheleko abakufumene ngethempelini lakaJehova bakusa esirhodlweni+ sendlu kaJehova. Yeke amaLevi akuthatha bese akulahlela ngaphandle emRhobeni iKidroni.+ 17 Bathoma ukucwengisa ngelanga lokuthoma lenyanga yokuthoma, kwathi elangeni lobunane lenyanga leyo bafika ethurini lakaJehova.+ Bacwengisa indlu kaJehova amalanga abunane, bayiqeda ngelanga le-16 enyangeni yokuthoma.

18 Ngemva kwalokho, baya eKosini uHezekiya bathi: “Siyihlwengise yoke indlu kaJehova, i-aldara lomnikelo otjhiswako+ nazo zoke izitja+ zalo netafula loburotho obubekwa ngamalarha*+ nazo zoke izitja zalo. 19 Zoke izitja iKosi engakathembeki+ u-Arhazi eyazisusa nayisabusako sizihlele kuhle begodu sazicwengisa,+ nje ziphambi kwe-aldara lakaJehova.”

20 IKosi uHezekiya yavuka ngesamarimarima, yabuthelela amakhosana wedorobho, baya endlini kaJehova. 21 Baletha iinkunzi ezilikhomba, amaramu alikhomba, iimvana eziduna ezilikhomba neempongo ezilikhomba bona zibe mnikelo wesono wesigodlo, wendawo ecwengeke khulu newabantu bakwaJuda.+ Watjela abaphristi, iinzukulwana zaka-Aroni bona bazinikele e-aldareni lakaJehova. 22 Abaphristi bahlaba iinkomo,+ bathatha neengazi bazifafaza e-aldareni; bahlaba amaramu bafafaza iingazi e-aldareni,+ bahlaba iimvana eziduna bafafaza iingazi e-aldareni. 23 Baletha iimpongo zomnikelo wesono phambi kwekosi nebandla, bazibeka nezandla. 24 Abaphristi bazihlaba, benza umnikelo wesono ngeengazi zazo e-aldareni bona kuhlawulelwe woke ama-Israyeli ngombana ikosi ithe umnikelo otjhiswako nomnikelo wesono kufuze wenzelwe woke ama-Israyeli.

25 Kusesenjalo, uHezekiya wabeka amaLevi endlini kaJehova aphethe amasimbali, iinliliso zesinara namaharibha+ ngokomyalo kaDavida,+ kaGadi+ umboni wekosi newomphorofidi uNathani+ ngombana umyalo lo bewuvela kuJehova ngabaphorofidi bakhe. 26 Nje-ke amaLevi bewajame aphethe iinliliso zakaDavida begodu abaphristi baphethe iimbhorompita.+

27 UHezekiya wayala bona kwenziwe umhlatjelo otjhiswako e-aldareni.+ Nabathoma ukwenza umnikelo otjhiswako, kwabhinelwa uJehova kwabetjhwa neenliliso zakaDavida ikosi yakwa-Israyeli zikhambisana neembhorompita. 28 Ibandla loke laguqa nakusabhinwako, kubetjhwa neembhorompita, koke lokhu kwaraga bekwaqedwa ukwenziwa umnikelo otjhiswako. 29 Msinyana ngemva kokwenziwa komnikelo, ikosi nabo boke ebebanayo baguqa bebahloma iinhloko phasi. 30 IKosi uHezekiya namakhosana batjela amaLevi bona adumise uJehova ngamarhubo kaDavida+ newaka-Asafa+ umboni. Yeke bamdumisa ngethabo elikhulu, baguqa bahloma iinhloko phasi.

31 Ngemva kwalokho, uHezekiya wathi: “Ngebanga lokuthi nizinikele emsebenzini ocwengileko kaJehova, yenize nilethe imihlatjelo neminikelo yokuthokoza endlini kaJehova.” Ibandla lathoma ukuletha imihlatjelo etjhiswako neminikelo yokuthokoza begodu woke umuntu waletha iminikelo etjhiswako ngokusuka ehliziyweni.+ 32 Inani leminikelo etjhiswako elalethwa libandla bekuziinkomo ezima-70, amaramu ali-100, iimvana eziduna ezima-200, koke lokhu kwanikelwa bona kube mhlatjelo kuJehova+ 33 neminikelo ecwengileko yeenkomo ezima-600 nezimvu ezizii-3 000. 34 Kodwana abaphristi bebambalwa bona bangahlinza yoke iminikelo etjhiswako, yeke abafowabo amaLevi abasiza bebawuqeda umsebenzi+ bekwaba kulapho abaphristi bazicwengisa+ khona ngombana amaLevi bewazimisele ukuzicwengisa ukudlula abaphristi. 35 Godu bekuneminikelo eminengi etjhiswako+ kuhlanganise nemihlwehlwe yomhlatjelo wetjhebiswano+ neminikelo yeenselo yeminikelo etjhiswako.+ Yeke umsebenzi wendlu kaJehova wavuselelwa. 36 Ngemva kwalokho, uHezekiya nabo boke abantu+ bathaba ngalokho uZimu weqiniso abenzele khona ngombana koke kwenzeka msinyana.