JOBHO
1 Bekunendoda ethileko enarheni ye-Utsi igama layo kunguJobho.*+ Bekayindoda elungileko,+ ethembekileko, esaba uZimu nekubalekelako ukwenza okumbi.+ 2 Bekanamadodana alikhomba namadodakazi amathathu. 3 Bekafuye izimvu ezizii-7 000, amakamela azii-3 000, iinkomo* eziyi-1 000 nabodumbana abama-500 begodu aneensebenzi ezinengi kangangobana waba mkhulu ukudlula boke abantu bePumalanga.
4 Amadodanakhe bewaphele enze umnyanya endlini yomunye nomunye ngokudlhegana. Bewamema nabodadwabo abathathu bona bazokudla bebasele nabo. 5 Bekuthi nasele abantwabakhe baqede ukwenza umnyanya ngokudlhegana kwabo, uJobho athumele umlayezo wokobana bazicwengise. Bekavuka ekuseni enzele omunye nomunye wabo umhlatjelo otjhiswako+ ngombana bekacabanga athi: “Kungenzeka abantwabami bonile begodu bathuke uZimu eenhliziyweni zabo.” Ngilokho-ke uJobho ebekahlala akwenza.+
6 Nje-ke ngelinye ilanga amadodana kaZimu*+ weqiniso angena bona ajame phambi kwakaJehova+ noSathana+ wangena hlangana nawo.+
7 UJehova wathi kuSathana: “Ubuyaphi?” USathana wathi kuJehova: “Ekuzulazuleni ephasini nekukhambakhambeni kilo.”+ 8 UJehova wathi kuSathana: “Ucabanga ngencekwami uJobho na? Akunamuntu ofana naye ephasini. Uyindoda emsulwa, elungileko,+ esaba uZimu nekubalekelako ukwenza okungakalungi.” 9 USathana waphendula uJehova wathi: “Ngathana uJobho bekanganalitho bekazomhlonipha* na uZimu?+ 10 Awukambekeli na iboda elivikela yena nendlwakhe+ nakho koke anakho? Ubusise umsebenzakhe+ nefuywakhe yande khulu enarheni. 11 Kodwana akhe ulule isandla sakho uthathe koke anakho, ngiyakutjela uzokuthuka ebusweni bakho.” 12 Yeke uJehova wathi kuSathana: “Qala! Koke anakho kusezandleni zakho. Ungamlimazi uJobho!” USathana wasuka phambi kwakaJehova.+
13 Kuthe ngelinye ilanga amadodana namadodakazakhe adla, asela newayini ngendlini yomfowabo omkhulu,+ 14 kwafika isithunywa sathi kuJobho: “Iinkomo bezilima, abodumbana badla utjani eqadi kwazo 15 lokha nakufika amaSeba asahlela, azithatha, abulala neensebenzi ngesabula. Ngimi kwaphela ophunyurhileko bona ngizokutjela.”
16 Kuthe isithunywa sisakhuluma njalo, kwafika esinye sathi: “Kwehle umlilo uvela kuZimu ezulwini, watjhisa izimvu neensebenzi waziqeda! Ngimi kwaphela ophunyurhileko bona ngizokutjela.”
17 Kuthe naleso nasisakhuluma njalo, kwafika esinye sathi: “AmaKhaledi*+ akhe iinqhema ezintathu, asahlela amakamela awathatha, abulala neensebenzi ngesabula. Ngimi kwaphela ophunyurhileko bona ngizokutjela.”
18 Sisakhuluma njalo, kwafika esinye sathi: “Amadodanakho namadodakazakho bewadla asela newayini ngendlini yomfowabo omkhulu. 19 Sekwavela umoya omkhulu uvela emmangweni, wamadlha amakhona amane wendlu, yawela phezu kwabantwabakho bafa. Ngimi kwaphela ophunyurhileko bona ngizokutjela.”
20 Khonokho uJobho wasikima warathula isambatho sakhe, waguda ihlokwakhe; wawela phasi wakhothama 21 wathi:
“Ngiphume esibelethweni sakamma ngibulanzi,
Ngizokubuyela ngibulanzi.+
UJehova uphile,+ uJehova uthethe.
Igama lakaJehova aliragele phambili nokudunyiswa.”
22 Naphezu kwakho koke lokhu, uJobho akhenge one namkha asole uZimu ngobumbi.
2 Godu ngelinye ilanga amadodana kaZimu*+ weqiniso angena bona ajame phambi kwakaJehova,+ uSathana naye wangena wajama phambi kwakaJehova.+
2 UJehova wathi kuSathana: “Ubuyaphi?” USathana wathi kuJehova: “Ekuzulazuleni ephasini nekukhambakhambeni kilo.”+ 3 UJehova wathi kuSathana: “Ucabanga ngencekwami uJobho na? Akunamuntu ofana naye ephasini. Uyindoda emsulwa, elungileko,+ esaba uZimu nekubalekelako ukwenza okungakalungi. Usathembekile+ ngitjho nanyana wena ufuna ukungenza+ ngimtjhabalalise ngaphandle kwesizathu.” 4 USathana waphendula uJehova wathi: “Isikhumba ngesikhumba. Umuntu angenza nanyana yini bona asindise ukuphila kwakhe. 5 Kodwana akhe ulule isandla sakho umbethe emathanjeni nenyameni, ngiyakutjela uzokuthuka ebusweni bakho.”+
6 Yeke uJehova wathi kuSathana: “Qala! Usesandleni sakho, kwaphela ungathathi ukuphila* kwakhe!” 7 USathana wasuka phambi kwakaJehova, wabetha uJobho ngamathumba abuhlungu,+ kusukela ngaphasi kweenyawo zakhe ukuyokufika ehloko. 8 Nje-ke uJobho wathatha isiqetjhana somjeka ophukileko, wazinghwaya ngaso begodu bekahlezi emlotheni.+
9 Emaswapheleni umkakhe wathi kuye: “Nanje usathembekile kuZimu na? Thuka uZimu ufe!” 10 Kodwana uJobho wathi kuye: “Ukhuluma njengomfazi onganangqondo. Kghani kufuze samukele okuhle kwaphela kuZimu weqiniso singamukeli nokumbi?”+ Naphezu kwakho koke lokhu, uJobho akhenge one ngomlomakhe.+
11 Abangani bakaJobho bezwa ngobudisi aqalene nabo, boke bebavela eendaweni ezihlukahlukeneko, kungu-Elifazi+ umTemani, uBhilidadi+ umTjhurhi+ noTsofara+ umNama. Nje-ke bavumelana ngokuthi bazokuhlangana bayokuzwelana noJobho bebamduduze. 12 Kwathi nabaseza bakude babona umuntu, bebangaboni ukuthi umuntu abambonako lo nguJobho, yeke kwathi nasele baseduze balila barhuwelela, barathula izambatho zabo, bavusa ithuli bazirhatjha ngehlabathi eenhloko.+ 13 Amalanga alikhomba nobusuku obulikhomba bahlala noJobho lapha bekahlezi khona, akekho namunye owatjho okuthileko kuye ngombana bebabona ukuthi useenhlungwini.+
3 Ngemva kwalokho, uJobho wavula umlomakhe waqalekisa ilanga abelethwa ngalo.+ 2 Wathi:
3 “Alitjhabalale ilanga engabelethwa ngalo,+
Nobusuku umuntu othileko athi ngabo: ‘Umfazi uzithwele umntwana womsana!’
4 Alibe mnyama ilangelo.
Kwanga uZimu angalilibala;
Akungabi nomkhanyo kilo.
5 Kwanga ubumnyama bungalembesa.
Kwanga amafu wezulu angahlala phezu kwalo.
Kwanga nanyana yini elenza libe mnyama ingalithusa.
6 Ubusukobo kwanga bungasulwa bumnyama;+
Abungathabi hlangana namalanga womnyaka,
Abungabalwa hlangana neenyanga.
7 Kwamambala bekuzaba ngcono ngathana akukho namunye owabelethwa ngelangelo.
Ukuthaba okukhulu kungafiki kibo.
9 Kwanga iinkwekwezi zamasa zingaba mnyama;
Ubusukobo abulindele ukukhanya kodwana kungabi khona,
Abungayiboni imisebe yamathathakusa.
10 Ngombana akhenge buvale iminyango yesibeletho sakamma;+
Namkha bufihlele amehlwami imiraro.
11 Kubayini ngingakhenge ngihlongakale nangibelethwako?
Kubayini ngingakhenge ngitjhabalale nangiphuma ngesibelethweni?+
12 Kubayini bekunamadolo angamukelako
Namabele angimunyisako?
14 Namakhosi wephasi nabeluleki bawo,
Abazakhela iindawo kwanjesi esele zitjhabalele,*
15 Namkha ngabe ngilele namakhosana egade anegolide,
Izindlu zawo ebezizele isiliva.
16 Kubayini ngingakhenge ngirhuluke njengombungu,
Njengabantwana abangakhenge khebabone umkhanyo?
17 Ngitjho neenkhohlakali zilisile ukutshwenyeka khulu;
Nabaphele amandla baphumulile.+
18 Zoke iimbotjhwa zitjhaphulukile;
Azilizwa nelizwi lomuntu ozikatelela bona zisebenze.
19 Lapho omncani nomkhulu bayafana,+
Nesigqila sitjhaphulukile ekosinaso.
20 Kubayini anikela abatlhagako umkhanyo
Abanikela nokuphila labo abagandelelekileko?+
21 Kubayini bakhanukela ukufa kodwana kungafiki?+
Bakwemba ukudlula indlela abemba ngayo amagugu afihlekileko,
22 Bathaba khulu,
Bayathokoza nabafumana ithuna.
23 Kubayini anikela indoda eneendlela ezingabonakaliko ukukhanya,
Leyo uZimu ayivikeleko?+
25 Ngombana ebengikusaba kungifikele,
Ebengikusaba kungehlele.
26 Akhenge khengibe nokuthula nokuphumula,
Imiraro isolo ingifikela.”
4 Ngemva kwalokho u-Elifazi+ umTemani wathi:
2 “Umuntu nakangalinga ukukhuluma nawe, uzomphelela ihliziyo na?
Kodwana ngubani ongazibamba angakhulumi?
3 Wena ufundise abanengi,
Bewujayele ukuqinisa abantu abatlhoga isizo.
4 Amezwakho bewaqinisa nanyana ngubani ophelelwa mamandla,
Bewuqinisa namadolo walabo abaphelelwa mamandla.
5 Kodwana nje nasekwenzeka kuwe, uphelelwa mamandla;
Nawuthintekako, uyadana.
6 Kghani ukuhlonipha kwakho uZimu akukunikeli isibindi?
Kghani ukuthembeka kwakho+ akukunikeli ithemba?
7 Ngibawa ucabangisise: Ngubani omsulwa okhe watjhabalala?
Kunini lapho olungileko atjhatjalaliswa khona?
8 Ngokwalokhu engikubonileko, labo abalima okulimazako
Nalabo abatjala isizi bazokuvuna abakutjalileko.
9 UZimu nakaphefumulako bayatjhabalala,
Nakavuthela ilaka lakhe bayatjhabalala.
10 Ibhubezi liyabhodla, ibhubezana lenze itjhada,
Kodwana ngitjho namazinyo wamabhubezi anamandla* aphukile.
11 Ibhubezi liyatjhabalala nalingabambi inyamazana,
Nabantwana balo bayaphadlhalala.
12 Ngithunyelwe ilizwi ngemsitheleni,
Indlebami yezwa amahlebezanalo.
13 Ebusuku abantu nabaye ngobuthongo,
Ngafikelwa mibono etshwenya umcabangwami,
14 Ngehlelwa kusaba okukhulu,
Amathambami woke ahlengezela.
15 Okuthileko* kwadlula ebusweni bami;
Uboya bomzimbami badoseka.
16 Okuthilekokho kwajama rwe,
Akhenge ngibone ukuthi khuyini.
Bekunesithunzi phambi kwamehlwami;
Kwathula du, ngemva kwalokho ngezwa ilizwi lithi:
17 ‘Kghani umuntu angalunga ukudlula uZimu?
Kghani umuntu angaba msulwa ukudlula uMbumbakhe na?’
18 Qala! Akazithembi iinceku zakhe,
Ufumana imitjhapho eengilozini* zakhe.
19 Kangangani-ke ngalabo abahlala eendlini zomdaka,
Isisekelo sazo sisethulini,+
Abapitjizeka lula njengomuhlwa!
20 Batjhatjalaliswa ngokupheleleko kusukela ekuseni bekube sebusuku;
Batjhabalala ngokungapheliko, akekho obonako.
21 Banjengetende intambalo ekhutjhelwe ngaphandle.
Bafa ngaphandle kokuhlakanipha.
5 “Ukhona ozakuphendula nawunghonghoyilako na?
Uzokubiza bani kwabacwengileko bona azokusiza?
2 Ukusilingeka kuyasibulala isidlhadlha,
Umona uzombulala ongatjhejiko.
3 Ngibone isidlhadlha siphumelela,
Kodwana ngokuphazima kwelihlo indawaso izokwehlelwa yihlekelele.
4 Amadodanaso awakaphephi,
Ayagandelelwa esangweni ledorobho+ begodu akunamuntu ozawaphephisa.
5 Olambileko udla akuvunileko,
Ukukhupha ngitjho nahlangana nameva,
Begodu izinto zakhe ziyathathwa.
6 Izinto ezimbi aziveli ethulini,
Nomraro awuveli ehlabathini.
7 Njengombana ilangabi litjhinga phezulu,
Nomuntu ubelethelwe imiraro.
8 Kodwana mina ngizakubawa kuZimu,
Indabami ngizayibikela uZimu,
9 Ngombana wenza izinto ezikulu nezibabazekako,
Wenza izinto ezinengi khulu ezikarisako.
10 Wenza bona izulu line ephasini
Begodu uthumela amanzi emasimini.
11 Abathobekileko ubaphakamisela phezulu,
Abaphela amandla uyabaphakamisa bekabasindise.
12 Uhlangahlanganisa amahlelo wabahlakaniphileko,
Bona imisebenzi yezandla zabo ingaphumeleli.
13 Ubamba abahlakaniphileko ngeenthiyo zabo,+
Bona amanwabo angaphumeleli.
14 Baphahlwe bumnyama emini ka-bha!
Bafane nabantu abafuna izinto ebumnyameni.
15 Usindisa abantu kilabo abanamagama ahlabako,*
Otlhagileko umsindisa esandleni sonamandla,
16 Bona abangasililitho babe nethemba,
Kodwana umlomo wesikhohlakali uzokuvalwa.
17 Qala! Uyathaba umuntu okhalinywa nguZimu;
Yeke ungakuphayeli eqadi ukukhalinywa Mninimandla Woke!
18 Ubangela ubuhlungu kodwana abophe inceba;
Uyaphula abe alungise ngezandla zakhe.
19 Uzokusindisa eenhlekeleleni ezisithandathu,
Ngitjho neyekhomba angeze ikulimaze.
20 Ngesikhathi sendlala uzokusindisa ekufeni,
Nangesikhathi sepi uzokusindisa emandleni wesabula.
21 Uzokuvikelwa emlonyeni okhuluma izinto ezihlabako,+
Nehlekelele nayifikako angeze uyisabe.
22 Ihlekelele nendlala uzozihleka,
Neembandana angeze uzisabe.
23 Amatje wemasimini angeze akulimaze,*
Iimbandana zemasimini zizokuba nokuthula nawe.
24 Uzokwazi bona itende lakho livikelekile,
Begodu akunalitho ozolifumana lilahlekile nawuhlola amadlelwakho.
25 Uzokuba nabantwana abanengi,
Iinzukulwana zakho zizokuba zinengi njengotjani.
26 Uzokuhlongakala usesenamandla,
Njengekoroyi nayivunwako ngesikhathi sayo.
27 Qala! Lokhu sikuhlolisisile.
Akhucabange ngakho, nawe uzozibonela ukuthi izintwezi nangambala zinjalo.”
6 Ngemva kwalokho uJobho wathi:
2 “Ngathana isizi lami+ belingakaleka
Libekwe esikaleni nehlekelelami!
3 Ngombana kwanjesi libudisi ukudlula ihlabathi yelwandle.
Kungebangelo-ke amezwami abe yikulumo engatjho litho.+
4 Imicibitjholo yoMninimandla Woke ingihlabile,
Begodu ummoyami usela itjhefayo;+
UZimu uyangisahlela begodu ngizizwa ngisaba.
5 Udumbana wommango+ angalila na nakunotjani,
Namkha ikunzi ingalila na nakunefuru?
6 Ukudla okuduma kungadleka na ngaphandle kwetswayi,
Namkha ijuzi yesithelo esiduma ingaseleka na?
7 Ngalile ukuthinta izinto ezinjalo.
Zinjengetjhefu ekudleni kwami.
8 Kwanga isibawo sami singenzeka
Kwanga uZimu anganginikela engikufisako!
9 Kwanga uZimu angangipitliza,
Begodu kwanga angalula isandla sakhe angitjhabalalise!+
10 Ngombana lokho kungangiduduza;
Ngithabe nanyana ngihlala ngisebuhlungwini,
Ngombana akhenge ngale amezwi woCwengileko.+
11 Kghani ngisesenamandla wokulinda?+
Kusesenokuhle na engikulindeleko, okungangenza ngiragele phambili nokuphila?
12 Kghani amandlami anjengelitje?
Namkha inyamami yenziwe ngekhopha?
13 Ikhona na enye indlela engingazisiza ngayo
Lokha zoke iindlela zami zokuzisekela sezithethwe kimi?
15 Abangani* bami akhenge bathembeke,+ bafana nomlanjana webusika,
Nanjengamanzi wemilanjana yebusika eyomileko.
16 Imilanjana le imnyama ngebanga lerhwaba,
Begodu igabhogo lizifihla kiyo.
17 Ngokukhamba kwesikhathi iphelelwa mamanzi bese kuyaphela ngayo;
Nakutjhisako, iyoma.
18 Indlelayo iphambukisiwe;
Igelezela erhalawumbeni bese inyamalale.
19 Isiqhema sabantu beTema,+ abakhamba iindawo ngeendawo sifuna imilanjana le;
Abantu beTjheba+ abakhamba iindawo ngeendawo bayilindile.
20 Baphathwa ziinhloni ngombana bebanethemba lokobana bazokufumana amanzi;
Beza lapho bafika badana.
22 Kghani khengathi, ‘Ngiphani okuthileko,’
Namkha ngibawe isipho emnothwenenu?
23 Khengabawa na ukusindiswa esandleni senaba
Namkha ngabawa ukusindiswa kilabo abangigandelelako?
24 Ngifundisani, ngizakuthula ngilalele;+
Ngisizani ngibone umtjhaphwami.
25 Iqiniso alilimazi!+
Kodwana kungisiza ngani ukusola kwenu?+
26 Inga-kghani nihlele ukusola amezwami,
Kukulapho amezwi womuntu odanileko+ aphetjhulwa mumoya?
28 Nje-ke akhenijike ningiqale,
Ngombana angeze ngaleya amala phambi kwenu.
29 Ngibawa nicabangisise kuhle, ningangahluleli
Nicabangisise kuhle ngombana ukulunga kwami kusaphelele.
30 Nicabanga ukuthi ngikhuluma ngendlela engakalungi?
Nicabanga ukuthi angikghoni na ukubona umraro?
7 “Kghani ukuphila komuntu* akufani nokukatelelwa bona usebenze budisi,
Amalangakhe awafani na newesisebenzi esiqatjhiweko?+
2 Njengesigqila, ukhanukela umthunzi,
Njengesisebenzi esiqatjhiweko, ulindele umrholwakhe.+
3 Sekudlule iinyanga ezinengi ipilwami ililize
Begodu ngibe seenhlungwini ubusuku obulandelanako.+
4 Nangilalako ngiyazibuza, ‘Kazi ngizokuvuka nini?’+
Kodwana ubusuku nabudosako, ngihlubayela bekube mathathakusa.
8 Ilihlo elingiqalileko nje angekhe lisangibona;
Amehlwakho azongifuna, kodwana ngizabe ngingasekho.+
10 Angekhe asabuyela endlinakhe,
Abantu bendawenakhe bazomkhohlwa.+
11 Nje-ke angekhe ngiwuvale umlomami.
12 Kghani ngililwandle namkha isilwana esikhulu nesisabekako selwandle,
Bona ungibekele unogada?
13 Nangithi, ‘Umbhedami uzongiduduza;
Indawo engilala kiyo izokwehlisa isizi lami,’
14 Wena ungithusa ngamabhudango
Begodu ungithuse nangemibono,
15 Lokho kungenza ngikhethe ukufa ngombana angisakghoni ukuphefumula.
Iye ngikhetha ukufa kunomzimbami lo.+
16 Ngiyakuhloya ukuphila kwami;+ angisafuni ukuphila.
Ngilisa, ngombana amalangami anjengentuthu.*+
17 Kubayini utshwenyeka ngomuntu
Begodu umtjheje kangaka?+
18 Kubayini umhlola qobe ekuseni
Umlinge umzuzu omunye nomunye?+
19 Ngibawa ulise ukungiqala
Ungiphe nesikhatjhana sokuginya amathe.+
20 Nangabe ngisisoni, ngingakulimaza njani, wena okghona ukubona koke okwenziwa babantu?+
Kubayini uqothela mina?
Kghani ngimthwalo kuwe?
21 Kubayini ungalibaleli umtjhaphwami
Ususe nesono sami?
Ngombana kungasikade ngizokuhlongakala ngibuyele ethulini,+
Uzongifuna kodwana angekhe ungifumane.”
8 Ngemva kwalokho uBhilidadi+ umTjhurhi+ waphendula wathi:
2 “Kuzabe kube nini usolo ukhuluma ngendlela le?+
Amezwakho ayikulumo engatjho litho!*
3 Kghani uZimu uzokusebenzisa ubulungiswa ngendlela engasiyo,
Namkha uMninimandla Woke uzokusebenzisa ukulunga ngendlela engasiyo?
4 Nangabe amadodanakho onile kuye,
UZimu uwajezise ngebanga lokuvukela kwawo;
5 Kodwana wena nawungafuna uZimu+
Ubawe uMninimandla Woke bona akurhawukele,
6 Nawumsulwa begodu ulungile,+
Uzokutjheja*
Uzokubuyisela indlwakho, abuyisele koke esigeni.
7 Ngitjho nanyana isithomo sakho besisincani,
Ingomuso lakho lizokuba likhulu.+
8 Ngibawa ubuze isizukulwana saphambilini,
Utjhejisise izinto ezafunyanwa boyise baso.+
9 Ngombana thina sibelethwe izolo, asazi litho,
Amalangethu ephasini asithunzi.
10 Isizukulwanesi angeze na sakufundisa
Sakutjela esikwaziko?*
11 Kghani isitjalo sephaphirasi singakhula sibe side na, lapha kunganamanzi khona?
Umhlanga ungakhula ube mude ngaphandle kwamanzi?
12 Kuzakuthi sesitlhurhile begodu singakavunwa sitjhwabe,
Sizokomelela msinyana ngaphambi kwezinye iintjalo.
13 Lo kuzokuba mphumela* wabo boke abalibala uZimu,
Ngombana ithemba laloyo ongasabi uZimu* lizokutjhabalala,
14 Akasanathemba
Ngombana izinto ebekathembele kizo zibe njengendlu yesiswebu etjhatjalalisiweko.
15 Uzokusama ngendlwakhe kodwana angekhe isolo ijamile;
Uzokulinga ukubambelela kiyo kodwana angekhe ijame unomphela.
16 Usitjalo esigcwele amanzi esiselangeni,
Iimpande zaso zinabela esivandeni.+
17 Imirabhaso, irarela esiqorhweni samatje;
Sifuna indlu hlangana namatje.
18 Kodwana nasiruthulwa endawenaso,
Indawo leyo izosiphika ithi, ‘Angikwazi.’+
19 Sizokunyamalala njalo;+
Bese kuvele ezinye iintjalo esikhundleni saso.
Begodu urhuwelele ngethabo godu.
22 Labo abakuhloyako bazokwembathiswa iinhloni,
Netende labantu abambi angekhe lisaba khona.”
9 UJobho wathi:
2 “Ngiyazi ukuthi lokhu kuliqiniso.
Alo umuntu* angaba njani ngolungileko phambi kwakaZimu?+
3 Nange kuba nomuntu ofuna ukuphikisana naye,+
Angeze aphendula ngitjho nombuzo munye emibuzwenakhe eyikulungwana.
4 Uhlakaniphile begodu unamandla.+
Ngubani ongajamelana naye begodu angalimali?+
5 Ususa iintaba begodu abantu abakulemuki lokho;
Ngelaka lakhe ugubuda iintabezo.
6 Wenza iphasi lisikinyeke,
Bona iinsekelo zalo zidengezele.+
7 Utjela ilanga bona lingakhanyi
Usitha nomkhanyo weenkwekwezi;+
8 Wendlala izulu libe njengetjhila,+
Ukhamba phezu kwamagagasi amakhulu welwandle.+
9 Wenze iinkwekwezi ezibizwa ngokuthi yi-Atjhi,* ezibizwa ngokuthi yiKhesili,* ezibizwa ngokuthi yiKhimarha,*+
Neenkwekwezi zesewula;*
10 Wenza izinto ezikulu nezingazwisiseki,+
Nezinto ezinengi khulu ezikarisako.+
11 Udlula phambi kwami kodwana angimboni;
Ukhamba phambi kwami kodwana angimlemuki.
12 Nakathatha into, ngubani ongamvimba?
Ngubani ongambuza athi, ‘Wenzani?+
14 Kangangani-ke nakuzakufuze ngimphendule
Nangizakuphikisana naye kufuze ngikhethe amagamami kuhle!
15 Ngitjho nanyana ngingaba msulwa, angeze ngimphendule.+
Engingakubawa kumahlulelami* mumusa kwaphela.
16 Nange ngingambiza, uzangiphendula na?
Angikholwa nokuthi uzalilalela ilizwi lami,
17 Ngombana ungimadlha ngesiwuruwuru
Wandisa nomtlhagwami ngaphandle kwesizathu.+
18 Akangivumeli bona ngidose umoya;
Begodu uhlala angandisela ubuhlungu.
19 Nakuziwa endabeni yamandla, unguSomandla.+
Nakuziwa endabeni yobulungiswa, uthi: ‘Ngubani ongangibeka umlandu?’
20 Nanyana ngingaba msulwa, umlomami uzangibeka umlandu;
Ngitjho nanyana ngingathembeka, uzakuthi ngimlandu.
21 Ngitjho nanyana ngingathembeka, angazi bona kuzokwenzekani ngami;
Ngiyakunyenya ukuphila kwami.
22 Koke kuyafana, kungebangelo ngithi,
‘Utjhabalalisa olungileko nokhohlakeleko ngendlela efanako.’
23 Nange isirhurhula esifika ngokuphazima kwelihlo sibulala abantu bangakayeleli,
Uzomhleka olungileko nakambona anganathemba.
Nange kungasinguye, alo ngubani?
25 Amalangami agijima ukudlula isithunywa;+
Ayagijima begodu akaboni okuhle.
26 Agijima njengesikepe somhlanga,
Njengekhozi nalehla liyokubamba inyamazana.
27 Nange ngingathi, ‘Ngizokulibala ubuhlungu bami,
Angeze ngisabonakala ukuthi ngidanile kunalokho ngizokuthaba,’
28 Ngisazokuba nevalo ngebanga labo boke ubuhlungu bami,+
Ngiyazi ukuthi angeze wathi ngimsulwa.
29 Ngisazokufunyanwa ngimlandu.
Alo kubayini kufuze ngitlhagele ilize?+
30 Nange ngingahlamba ngamanzi wegabhogo,
Ngihlanze nezandla zami ngamanzi anomlotha,+
31 Uzongiphosela ngemgodini,
Kangangokuthi nezambatho zami zizonginyenya.
32 Bengingamphendula kodwana akasimumuntu njengami,
Engingamusa ekhotho.+
33 Akekho ozakuba mlamuli phakathi kwethu,
Nozaba ngumahlulelethu.
34 Nakangalisa ukungibetha*
Alise nokwenza izinto zakhe ezithusako zingibethise ivalo,+
35 Ngizakukhuluma naye ngingabi nevalo,
Ngombana angisimumuntu okhuluma ngokusaba.
10 “Ngiyakunyenya ukuphila kwami.+
Ngizokuveza iinghonghoyilo zami.
Ngizokukhuluma ngobuhlungu bokutlhuwa kwami!
2 Ngizokuthi kuZimu: ‘Ungangiphathi njengomuntu omlandu.
Ngitjela ukuthi kubayini ulwa nami.
3 Kghani uyazuza nawungigandelelako,
Nawunyenya umsebenzi wezandla zakho+
Kukulapho uthanda iseluleko sokhohlakeleko?
4 Kghani unamehlo afana newabantu,
Namkha indlela obona ngayo iyafana neyomuntu?
5 Kghani amalangakho anjengamalanga womuntu,
Namkha iminyakakho injengeyomuntu,+
6 Bona uphenyisise umtjhaphwami
Nokuthi usolo uqalene nesono sami?+
8 Ungenze ngezandla zakho,+
Kodwana nje sewufuna ukungitjhabalalisa ngokungapheliko.
10 Akhenge na ungithulule njengebisi
Wangitjhujisa njengetjhizi?
11 Ungembathise ngesikhumba nangenyama,
Wangenza ngamathambo nemisipha.+
13 Kodwana ngemsitheleni bewunqophe ukwenza izinto ezimbi kimi.*
Ngazi kuhle ukuthi izintwezi zivela kuwe.
14 Nangabe ngonile ubone koke,+
Begodu angekhe uyilibalele imitjhaphwami.
15 Maye! Ngami nangabe ngimlandu.
Ngitjho nanyana ngimsulwa, angeze ngiphakamise ihlokwami ngokuzithemba,+
Ngombana ukuphila kwami kubhodwe lihlazo nobuhlungu.+
16 Nangilinga ukuvusa ihlokwami, ungizuma njengalokha ibhubezi nalizuma ukudla+
Godu amandlakho uwasebenzisela ukungilimaza.
17 Ulethe abofakazi abatjha ngokujamelene nami
Wandisa nelaka lakho ngokujamelene nami,
Amatshwenyekwami ayalandelana.
18 Alo ungikhupheleni esibelethweni sakamma?+
Ngathana ngihlongakele ngaphambi kobana kube nothileko ongibonako.
19 Bekuzokuba ngasuthi akhenge ngibe khona;
Bengizokuthathwa esibelethweni sakamma ngisiwe ethuneni.’
20 Kghani angikasalelwa malanga ambalwa?+ UZimu akangilise;
Akalise ukungiqala bona ngithabe kancani+
21 Ngaphambi kobana ngikhambe begodu ngingasabuyi+
Ngiye enarheni enobumnyama obunzima tshu!+
22 Ngiye enarheni egubuzeswe bumnyama,
Inarha ebuswa sithunzi nehlangahlangano,
Lapho ngitjho nokukhanya kunjengobumnyama.”
11 UTsofara+ umNama wathi:
2 “Kghani amezwi amanengi la akazukuphendulwa,
Namkha ukukhuluma khulu kuzokwenza umuntu abe ngolungileko?
3 Ucabanga bona ikulumakho engatjho litho le ingathulisa abantu?
Ucabanga ukuthi uzasolo uhleka ubudlhadlha kungabi nomuntu okukhalimako?+
5 Kodwana uZimu nakangakhuluma
Begodu avule umlomakhe akhulume nawe!+
6 Uzokwambulela iimfihlo zokuhlakanipha,
Ngombana ukuhlakanipha kwamambala akusilula.
Yeke wena uzokulemuka bona uZimu uvumela bona eminye yemitjhaphwakho ilibaleke.
7 Ungakghona na ukufumana ukuhlakanipha kwakaZimu
Namkha ungakghona na ukufumana yoke into* ngoMninimandla Woke?
8 Ukuhlakanipha kwakhe kuphakeme kunezulu. Ungakufikelela njani?
Kutjhingela khulu kuneThuna.* Ungakwazi njani?
9 Kukhulu kunephasi
Begodu kubanzi kunelwandle.
10 Nakadlulako, abambe umuntu begodu amuse ekhotho,
Ngubani ongalwa naye?
11 Ngombana ubazi kuhle abantu abangakathembeki.
Nakabona okumbi, angekhe atjheja na?
12 Kodwana indoda enganangqondo izokuzwisisa
Kwaphela lokha udumbana wommango nakangazala umuntu.
13 Kwaphela nawungalungiselela ihliziywakho
Ululele izandla zakho kuye.
14 Nangabe isandla sakho senza okungakalungi, sibekele kude,
Begodu ungavumeli ukungalungi kuhlale ematendenakho.
15 Ngombana uzokukghona ukuphakamisela ihlokwakho phezulu ngaphandle kokusaba;
Uzokudzimelela ngaphandle kokusaba.
16 Ngombana uzoyilibala imirarwakho ngesikhatheso;
Uzoyikhumbula njengamanzi ageleze adlula.
17 Ukuphila kwakho kuzokukhanya ukudlula imini;
Ngitjho nobumnyama bokuphila kwakho buzokuba njengekuseni.
18 Uzokuba nesibindi ngombana kunethemba,
Uzokuqala mahlangothi woke, ulale uvikelekile.
19 Uzokulala kungabi nomuntu okuthusako,
Abantu abanengi bazozincengela kuwe.
20 Kodwana amehlo wabakhohlakeleko azokufifiyela;
Begodu angekhe bafumane indawo yokubalekela,
Ithemba labo kuzokuba kukufa.”+
12 Ngemva kwalokho, uJobho wathi:
2 “Kwamambala nina nibabantu abanelwazi,
Begodu ukuhlakanipha kuzokufa nani!
3 Kodwana nami nginelwazi njengani.
Angisingaphasi kwenu.
Ngubani-ke ongazaziko izinto enizikhulumileko?
Umuntu olungileko nomsulwa sekayihlekisa.
5 Umuntu izinto ezimkhambela kuhle udelela labo abaqalene nehlekelele,
Ucabanga ukuthi ihlekelele yehlela labo abaqalene nemiraro kwaphela.*
6 Amasela ahlala ngokuthula ngeendlini zawo,+
Nalabo abadelela uZimu bavikelekile,+
Labo abanozimabo ezandleni zabo.
7 Yeke ngibawa ubuze iinlwana zizokufundisa;
Neenyoni zomkayi zizokutjela.
8 Namkha bukela iimbunjwa zephasi* zizokufundisa;
Neenhlambi zelwandle zizokutjela.
9 Ngisiphi hlangana nazo zoke lezi esingaziko
Ukuthi sibunjwe ngesandla sakaJehova?
10 Esandleni sakhe kunepilo yakho koke okuphilako
Namandla wokuphila wabo boke abantu.+
11 Kghani indlebe ayilalelisisi amezwi
Njengombana nelimi linambitha ukudla?+
12 Kghani ukuhlakanipha akufunyanwa na ebantwini abadala,+
Nokuzwisisa akufunyanwa na ngokuphila isikhathi eside?
14 Nakagiriza okuthileko, angekhe kwakhiwe godu;+
Nakavalileko akunamuntu ongavula.
16 Kuye kunamandla nokuhlakanipha;+
Kuye kunodurhako nodurhisako;
17 Uhlazisa abahlakaniphileko;
Ahlekise nangabahluleli.+
18 Utjhaphulula okubotjhwe makhosi,+
Awembathise izambatho zesigqila.
19 Uhlazisa abaphristi,+
Aketule nalabo abanamandla;+
20 Uvala imilomo yabathembekileko
Asuse nokuhlakanipha kwabantu abadala;
21 Uhlazisa ababusi,+
Begodu abanamandla ubenza babogaboge;
22 Wembula izinto ezifihlwe ebumnyameni,+
Begodu uletha ukukhanya ebumnyameni obunzima tshu!
23 Wenza iintjhaba zande khulu bona azitjhabalalise;
Ukhulisa iintjhaba bona azithumele ekudingisweni.
24 Wenza abadosiphambili babantu bona bangazwisisi
Abenze bakhambakhambe emmangweni onganandlela.+
13 “Ngikubone koke lokhu,
Indlebami ikuzwile beyakuzwisisa.
2 Enikwaziko nami ngiyakwazi;
Angisingaphasi kwenu.
3 Yeke ngibone kungcono ukuthi ngizikhulumele noMninimandla Woke;
Ngifisa ukuzivikela phambi kwakhe.+
4 Ngombana ningininda ngamala;
Noke nje nibodorhodere abanganamsebenzi.+
5 Nabe ningavala imilomenu,
Bekungatjengisa ukuthi nihlakaniphile.+
6 Ngibawa khenilalele ipikiswanami,
Benilalele nendlela engizivikela ngayo.
7 Nifuna ukungisola ngokunganabulungiswa ngegama lakaZimu,
Nizakukhuluma amala na egameni lakhe?
8 Kghani nizambandlulula na,
Nizakulinga ukukhuluma egameni lakaZimu weqiniso?
9 Kuzanikhambela kuhle na nakanganihlahluba?+
Nizamenza isidlhadlha njengalokha nanenza umuntu?
10 Kwamambala uZimu uzanikhalima
Nange nilinga ukumbandlulula ngemsitheleni.+
11 Isithunzi sakhe angeze sanithusa na
Nokumsaba kwenu angeze kwanithusa na?
12 Amezwenu wokuhlakanipha azizaga ezinyazekako njengomlotha;
Indlelenu yokuzivikela ibuthaka njengesiviko somdaka.
13 Akhenithule khona nami ngizakukhuluma.
Begodu koke ebekufuze kungehlele, akungehlele!
14 Kubayini ngizifaka engozini
Begodu ngifaka nokuphila kwami engozini?
15 Ngitjho nanyana angangibulala kabuhlungu ngesihlungu, ngisazokulinda;+
Ngisazozivikela phambi kwakhe.
17 Akhe nilalelisise engikutjhoko;
Nilalele nesimemezelo sami.
18 Nje indabami ngiyihlele kuhle;
Begodu ngiyazi ukuthi ngimsulwa.
19 Ngubani ozakuphikisana nami?
Nabe ngingathula bengingafa!
20 Zimu zimbili kwaphela izinto ongangipha zona,*
Bona ngingazifihli phambi kwakho:
21 Susa isandla sakho esinamandla, sibe kude nami,
Ungangenzi ngirhidlwe livalo.+
22 Nawungakhuluma nami ngizakuphendula,
Namkha kukhulume mina qangi, wena ungiphendule.
23 Ziyini izono zami nemitjhaphwami?
Ngambulela umtjhaphwami nesono sami.
25 Kghani uzakulinga ukuthusa ikari eliphetjhulwa mumoya
Namkha ugijimise ihlanga elomileko
26 Ngombana usolo utlola izinto ezimbi abangimangalela ngazo,
Ungibhadalisa izono engazenza ebutjheni bami.
28 Ngombana umuntu* ubola njengento ebolileko,
Njengesambatho esidliwe mumuhlwa.
4 Ngubani ongabeletha umuntu ohlwengileko yena angakahlwengeki?+
Akakho namunye!
6 Lisa ukumqala bona aphumule,
Bekube kulapho afumana ithabo njengombana kwenza isisebenzi esiqatjhiweko.+
7 Ngombana ngitjho nomuthi unethemba.
Nawuquntwako, uyatlhurha godu,
Namahlumelawo azokuragela phambili akhula.
8 Umrabhawo nawuluphalela ehlabathini
Nesidindi sawo sifela ehlabathini,
9 Nasizwa umnuko wamanzi sizokutlhurha;
Siveze iimpande njengesitjalo esitjha.
10 Kodwana umuntu nakafako uphelelwa mamandla;
Umuntu nakahlongakalako uyaphi?+
11 Amanzi ayanyamalala elwandle,
Nomlambo utjhelwa mamanzi.
12 Kunjalo-ke nangabantu, bayalala kodwana bangavuki.+
Angekhe bavuke bekube kulapho izulu lingasekho,
Namkha bavuswe ebuthongweni babo.+
13 Kwanga ungangifihla eThuneni,*+
Ungifihle bekudlule ilaka lakho,
Kwanga ungangibekela isikhathi sokungikhumbula!+
14 Umuntu nakafako, angaphila godu na?+
Ngizokulinda woke amalanga engibekelwe wona
Bekube kulapho ngifumana ipumuzo.+
15 Uzokubiza, mina ngizokuphendula.+
Uzokukhanukela ukubona umsebenzi wezandla zakho godu.
16 Kodwana nje uqalisise yoke into engiyenzako;
Uqala izono zami kwaphela.
17 Imitjhaphwami ivalelwe ngesikhwanyeni,
Begodu unamathisele umtjhaphwami ngesinamathiselo.
18 Njengentaba nayiwako beyigirike
Nelitje nalisuswa endawenalo,
19 Njengamanzi nakarhubha amatje
Nemilanjana nayirhurhula ihlabathi,
Ulitjhabalalise njalo-ke ithemba lomuntu.
20 Umhlule bekwaba kulapho atjhabalala,+
Utjhugulule indlela aqaleka ngayo, wamthumela ethuneni.
21 Amadodanakhe ayahlonitjhwa kodwana akazi litho ngalokho;
Aba babantu abangakaqakatheki kodwana yena akakulemuki.+
22 Uzwa ubuhlungu nakasaphilako kwaphela;
Uzila kwaphela nakasaphilako.”
15 U-Elifazi+ umTemani wathi:
2 “Kghani umuntu ohlakaniphileko angaphendula ngepikiswano engatjho litho,*
Namkha angazalisa ihliziywakhe ngemicabango emimbi?
3 Ukusola ngamezwi angatjho litho akusizi ngalitho,
Nokukhuluma kwaphela akuzuzisi ngalitho.
4 Ngombana unyaza ukusaba uZimu,
Begodu wenza abanye bangacabangi ngoZimu.
5 Kungebanga lomtjhaphwakho bona ukhulume ngendlela le,*
Begodu usebenzisa ilimu labanobuqili.
6 Akusingimi okulahlako, kodwana mlomakho loyo;
Okutjhoko kuphikisana nawe.+
7 Kghani umumuntu wokuthoma owabelethwako,
Namkha ubelethwe ngaphambi kweentaba?
8 Kghani ukghona ukuzwa izinto ezihlelwa nguZimu ngemsitheleni?
Namkha uzibona kunguwe kwaphela ohlakaniphileko?
9 Khuyini oyaziko thina esingayaziko?+
Khuyini oyizwisisako thina esingayizwisisiko?
10 Hlangana nathi kunabalupheleko nabadala,+
Okumadoda amadala kunoyihlo.
11 Induduzo evela kuZimu ayikaneli kuwe na,
Namezwi akhulunywa nawe ngesineke awakaneli na?
12 Khuyini eyenza ihliziywakho izikhukhumeze,
Kubayini amehlwakho anelaka?
13 Ngombana usilingekile ngebanga lakaZimu,
Uvumele namezwi la bona aphume ngemlonyenakho.
14 Umuntu angaba msulwa njani?
Umuntu obelethwe mfazi angaba ngolungileko njani?+
15 Qala-ke! UZimu akabathembi abacwengileko bakhe,
Ngitjho nezulu alisimsulwa phambi kwakhe.+
16 Kangangani-ke ngomuntu owenza izinto ezisilapheleko anyenyise uZimu,+
Umuntu osela ukungalungi njengalokha nakasela amanzi!
17 Ngizokutjela; ngilalela!
Ngizokuhlathululela ngalokho engikubonileko,
18 Lokho abantu abahlakaniphileko abakuzwe ngaboyise,+
Izinto abangakhenge bazifihle.
19 Inarha yanikelwa bona kwaphela,
Begodu umuntu ongaziwako akhenge adlule hlangana nabo.
20 Umuntu okhohlakeleko uphilela ukutlhoriswa, ukuphila kwakhe koke,
Ubona isizi kiyo yoke iminyaka yokuphila kwakhe.
21 Ngeendlebe zakhe uzwa amatjhada athusako;+
Ngesikhathi sokuthula abadlelezeli bayamsahlela.
22 Akakholwa bona uzokubalekela ubumnyama;+
Ubekelwe bona afe ngesabula.
23 Uyazulazula afunana nokudliwako* uthi: “Kuphi?”
Wazi kuhle ukuthi ilanga lobumnyama litjhidele.
24 Ukugandeleleka nobuhlungu kuragela phambili nokumthusa;
Koke lokhu kumhlula njengekosi elungele ukusahlela.
25 Uphakamisa isandla sakhe bona ajamelane noZimu
Ulinga ukuhlula uMninimandla Woke;
26 Uphikisana naye ngekani,
Athembe isiviko sakhe esikhulu nesiqinileko;
27 Uyazikhakhazisa
Begodu umnothwakhe umenza anone;
28 Uhlala emadorobheni azokuba marubhi,
Eendlini ezingekhe zihlalwe mumuntu,
Ezizokuba maqubi wamatje.
29 Angekhe abe yinjinga begodu umnothwakhe angekhe wande,
Nepahlakhe angekhe yande enarheni yoke.
30 Angekhe abalekele ubumnyama;
Ilangabi lizokutjhwabisa amahlumelakhe,*
Uzokunyamalala ngokuvuthelwa mlomo kaZimu.+
31 Akukafuzi azikhohlise begodu athembele kilokho okungasizi ngalitho,
Ngombana uzokuzuza okungasizi ngalitho;
32 Lokho kuzomehlela msinyana,
Begodu iimpande zakhe angekhe zitlhurhe.+
33 Uzokuba njengesimu yamadiribe ethintitha amadiribayo angakavuthwa,
Nanjengomuthi we-oliva othintitha amathuthumbawo.
34 Ngombana ihlangano yabakhohlakeleko ililize,+
Begodu umlilo uzokuqeda amatende walabo ababandakanyeka ekufumbathiseni.
35 Bacabanga izinto ezikhohlakeleko begodu bahlala balimaza abanye,
Eenhliziyweni zabo baluka amano wezinto ezikhohlakeleko.”
16 UJobho wathi:
2 “Ngizwe izinto ezinengi ezinjengalezi ngaphambilini.
Nina noke nibaduduzi abangakalungi!+
3 Amezwi angatjho litho la azakhe aphele na?
Elifazi, yini ekwenza uphendule ngendlela le?
4 Nami bengingakhuluma njengani.
Ngathana benisebujamweni bamobu,
Bengingatjho izinto ezinengi ngokujamelene nani
Benginikine ihloko nanginibonako.+
5 Kodwana kunokobana ngenze njalo, bengizoniqinisa ngamezwami,
Induduzo yomlomami beyizokuletha ipumuzo.+
6 Nangikhulumako, ubuhlungu bami abubi ngcono,+
Nangilisa ukukhuluma, ubuhlungu bami buzokuphunguleka kangangani?
7 Kodwana uZimu ungenze ngaphela amandla;+
Utjhabalalise boke abahlala ngendlinami.
8 Ungenze ngatlhaga begodu abantu bayakwazi lokho,
Njengombana ngondile abantu bacabanga bona ngimlandu.
9 Ilaka lakhe lingirathule ngaba ziintokana begodu ufukamele ihloyo ngami.+
Usilingeka khulu nakangibonako.
Inaba lami lingihlaba ngamehlwalo.+
10 Bavule imilomabo bona bangigomojele,+
Begodu bangibethe emihlathini ngokungidelela;
Babuthene bababanengi bona balwe nami.+
11 UZimu unginikele ezandleni zabesanyana,
Begodu ungiphosele ezandleni zabakhohlakeleko.+
12 Bengingatshwenywa lilitho kodwana yena wangihlakaza;+
Wangibamba ngentamo wangipitliza;
Wangiqothela.
13 Abadumuzi bakhe bemisubela bayangibhoda;+
Ungihlaba iziso+ begodu akangirhawukeli;
Uthululela inyongwami ehlabathini.
14 Ungibhoboza njengeboda alibhoboza ngokubuyelelweko;
Ugijimela kimi njengengorho.
16 Ubuso bami bube bomvu ngebanga lokulila,+
Namehlwami abe mnyama,
17 Nanyana izandla zami zingakhenge zenze inturhu
Nomthandazwami umsulwa.
18 Wena phasi, ungafihli iingazi zami!+
Isililo sami asingathuliswa!
19 Ngitjho nanje, ufakazami usezulwini;
Ufakazami useendaweni eziphakemeko.
21 Akube nomlamuli phakathi kwami noZimu,
Njengombana kunomlamuli phakathi komuntu nomuntu wekhabo.+
22 Angekhe ngiphile isikhathi eside,
Ngizokukhamba, angekhe ngibuye.+
17 “Ummoyami uphukile, amalangami aphelile;
Nethuna lingilindile.+
2 Ngiphahlwe babantu abangihlekako,+
Ngisolo ngiqale indlela abavukela ngayo.
3 Zimu, ngibawa ungithembise ukuthi uzongisiza.
Ngubani omunye ongangisiza?+
4 Ngombana abantwaba ubafihlele ukuhlakanipha;+
Begodu kungebangelo ungabaphakamisi.
5 Batjela abangani babo ukuthi bazababela kilokho abanakho,
Kukulapho abantwababo bangasaboni ngebanga lendlala.
7 Amehlwami ayafifiyela ngebanga lobuhlungu,+
Nomzimbani wondile.
8 Umuntu olungileko uyarareka nakabona lokhu,
Omsulwa uyatshwenyeka ngebanga leenhlubuki.
10 Nje-ke, noke ningeza nizokuthoma ipikiswanenu godu,
Ngombana bekube nje, akekho namunye kinapho okhulume into ehlakaniphileko.+
12 Ubusuku babenza bube yimini,
Bathi, ‘Nakumnyama nje kutjho bona ukukhanya kuseduze.’
14 Ngizakubiza ithuna ngithi kilo,+ ‘Ungubaba!’
Iimbungu ngithi kizo, ‘Ungumma nodadwethu!’
15 Alo, liphi ithemba lami?+
Kusesenomuntu ocabanga bona nginethemba?
18 UBhilidadi+ umTjhurhi wathi:
2 “Nizokulisa* nini ukukhuluma ngendlela le?
Akhenizwisise, bona nathi sikhulume.
4 Ngitjho nanyana ungazirathula ube ziinquqwana ngebanga lokusilingeka kwakho,
Ucabanga bona iphasi lizokulahlwa ngebanga lakho,
Namkha ucabanga bona idwala lizokusuka endawenalo ngebanga lakho?
5 Iye, umkhanyo womuntu okhohlakeleko uzokucinywa,
Nomlilwakhe uzokucima.+
6 Ukukhanya kwetendakhe kuzokuba mnyama,
Nesibani esingaphezu kwakhe sizokucinywa.
7 Akanamandla wokukhamba,
Woke amanwakhe angekhe aphumelele.+
8 Ngombana iinyawo zakhe zizomdosela enedeni,
Begodu uzokukhambakhamba ngaphakathi kwayo.
9 Uzokubanjwa sithiyo;
Isithiyweso sizombamba eenyaweni.+
10 Ufihlelwe irobho ehlabathini,
Begodu ubekelwe isithiyo endlelenakhe.
11 Izinto ezithusako ziyamthusa mahlangothi woke+
Zigijima ngemuva kwakhe bona zimbambe.
13 Isikhumba sakhe siyabola;
Ukugula okubulalako* kudla amalunga womzimbakhe.
14 Iinhlekelelezi zizomhlukanisa nesivikelo setende lakhe+
Begodu zizomusa ekosini yezinto ezithusako.*
16 Njengomuthi, imirabhakhe izokoma
Neempande zakhe zizokutjhwaba.
17 Ephasini, abantu bazomkhohlwa,
Endleleni, abantu angekhe balazi igama lakhe.
18 Abantu bazomsusa ekukhanyeni, bamuse ebumnyameni
Bazomqotha enarheni evundileko.
19 Angekhe abe nabantwana neenzukulwana hlangana nabantu bekhabo,
Begodu angekhe kube nosindako endaweni ahlala kiyo.
20 Nakufika ilanga lakhe lokutjhabalala, abantu beTjingalanga bazokuthukwa
Begodu abantu bePumalanga bazokurhidlwa livalo.
21 Ngilokho-ke okwenzekako ematendeni wabenzi bobumbi
Nendaweni yalowo ongamaziko uZimu.”
19 UJobho wathi:
3 Sekumahlandla alitjhumi nisolo ningisola;*
Aniphathwa ziinhloni na ukuthi ningiphatha kumbi?+
4 Nangabe kwamambala ngenze umtjhapho,
Umtjhaphwami uhlala nami.
5 Nangabe nikatelela ukuzenza abangcono kunami,
Nithi ihlazo lameli lingifanele,
6 Yeke kufuze nazi bona uZimu nguye ongidurhisako,
Begodu ungibambe ngenedakhe yokuzuma.
7 Ngisolo ngirhuwelela ngithi, ‘Ngilinyaziwe!’ kodwana angitholi ipendulo;+
Ngisolo ngirhuwelela ngifuna isizo kodwana akunamuntu ongisizako.+
8 Uvale indlelami ngeboda lelitje, angikghoni ukudlula;
Uvale iindlela zami ngobumnyama.+
9 Ungithathele iphazimulwami
Wasusa nesihlohlo ehlokwami.
10 Ungiphula mahlangothi woke bekube kulapho ngitjhabalala;
Ithemba lami ulisiphula njengomuthi.
11 Ilaka lakhe liyangivuthela,
Begodu ungiqala njengenaba lakhe.+
12 Amabuthwakhe abuthene ndawonye bona angivimbezele,
Begodu ahlome amatendawo magega netendami.
13 Abafowethu ubabekele kude nami,
Nalabo abangaziko bangijikele.+
14 Iinhlobo zami zingilahlele izandla,
Nalabo engibazi kuhle bangilibele.+
15 Iimvakatjhi ezisemzinami+ neengqilakazi zami zingiqala njengomuntu ongaziwako;
Ngimumuntu ovela kwenye inarha emehlwenazo.
16 Ngibiza isisebenzi sami kodwana asingiphenduli;
Ngiyasincenga bona singirhawukele.
17 Ukuphefumula kwami sekube yinto enyenyisako kumkami+
Begodu ngiliphunga elimbi kubafowethu.
18 Ngitjho nabantwana abancani bayangidelela;
Nangisikimako bakhuluma izinto ezihlaza ngami.
20 Amathambami anamathele esikhumbeni sami nenyamenami,+
Ngipheze ngafa.
21 Ngirhawukelani, ngirhawukelani bangani bami,
Ngombana isandla sakaZimu singithintile.+
23 Ngathana amezwami bewatlolwe phasi,
Ngathana bewatlolwe encwadini!
24 Ngathana bewatlolwe elitjeni angasuki,
Atlolwe ngepeni yesimbi enomsizi!
25 Ngombana ngazi kuhle bona umhlengami+ uyaphila;
Uzokuza, aphakame ngaphezu kwephasi.
26 Ngemva kobana isikhumba sami silinyazwe ngendlela le,
Mina nangisaphilako, ngizombona uZimu,
27 Ngizozibonela yena,
Amehlwami azombona, ingasi womunye.+
Kodwana ngaphakathi ngizizwa ngidiniwe!
28 Ngombana nithi, ‘Simhlunguphaze njani?’+
Ngasuthi ngimi okufuze asolwe ngakho koke lokhu.
29 Sabani isabula+
Ngombana isabula iletha isijeziso kilabo abonako;
Kufuze nazi ukuthi kunomahluleli.”+
20 UTsofara+ umNama waphendula wathi:
2 “Ngitshwenyekile kangangokuthi angikghoni nokuzibamba
Kungebangelo kufanele ngikhulume.
3 Ngikuzwile ukuhlambalaza kwakho;
Nje-ke ngizokuphendula ngombana ngihlakaniphile.
4 Angeze wahlala ungakwazi lokhu engizokutjho,
Ngombana bekunjalo kusukela ngesikhathi umuntu* aba khona ngaso ephasini,+
5 Ukuthaba kokhohlakeleko kufitjhani
Begodu isihlubuki sithaba kwesikhatjhana.+
6 Ngitjho nanyana ukuzikhakhazisa kwaso kufika ezulwini
Nehlokwaso ifika emafini,
7 Sizokutjhabalala ngokungapheliko njengobuthuvi baso;
Ebebajayele ukusibona bazokuthi, ‘Siyephi?’
8 Isihlubuki sizokunyamalala njengebhudango, akakho osazasibona godu;
Sizokunyamalala njengombono webusuku.
9 Ilihlo ekhelasibona angeze lisasibona,
Begodu angeze sisabonakala endlinaso.+
10 Abantwabaso bazokubawa abatlhagileko bona babasize,
Izinto isihlubuki esazebako sizozibuyisela.+
11 Amathambaso bewanamandla wobutjha,
Kodwana amandla lawo sizokutjhinga nawo ethulini.
12 Nangabe okumbi kuzwakala kusudu emlonyenaso,
Nangabe sikufihla ngaphasi kwelimu laso,
13 Nangabe siyakunambitha singakukhafuli
Sikumumathe emlonyenaso,
14 Ukudla kwaso kuzakuba siri nakufika ngendeni;
Kuzakuba njengetjhefu yenyoka.
15 Siginye izinto zabantu kodwana sizozihlanza;
Ngombana uZimu uzozikhupha ngendeninaso.
16 Sizokumunya itjhefu yenyoka;
Inyoka izosiluma beyisibulale.
17 Angeze sisathabela ibisi
Neliju eligeleza njengamanzi.
19 Sitjhabalalisa abatlhagileko, sibatjhiye banganasizo;
Sithatha indlu esingakhenge siyakhe.
20 Kodwana angeze sibe nokuthula kwangaphakathi;
Noburego baso angeze busisindise.
21 Akunalitho eliseleko elizosirhiribidela;
Kungebangelo ukuphumelela kwaso kuzokuba ngokwesikhatjhana.
22 Sizokuthi nasele sinjinge khulu sitshwenyeke;
Zoke izinto ezimbi zizosehlela.
23 Sizokuthi nasisadlako njalo,
UZimu athumele ilaka lakhe libe phezu kwaso
Uzokwenza ilakelo line, liwulukele ngezitjeni zesihlubuki.
24 Sizokuthi nasibalekela iinkhali zesimbi,
Sihlatjwe misebe yomsubela wekhopha.
25 Sisusa umsebe osihlabe ngemva,
Okusikhali esimanyazelako esihlabe isihlubukesi enyongweni,
Begodu sizokuba nevalo.+
26 Izinto zaso eziligugu zizokuphoselwa ebumnyameni;
Emlilweni ongaphembethwa mumuntu;
Begodu nanyana ngubani osindileko etendenaso ihlekelele imlindile.
27 Izulu lizokwambula ubutjhapho baso;
Nephasi lizokujamelana naso.
28 Iinkhukhula zizokuthanyela indlwaso;
Kuzabe kumlambo ogeleza ngamandla ngelanga lelaka lakaZimu.
29 Lo-ke mvuzo uZimu awupha umuntu okhohlakeleko,
Lilifa uZimu amupha lona.”
21 UJobho wathi:
2 “Akhe nilalelisise engikutjhoko;
Nanenza njalo nizongiduduza.
3 Ngibekezelelani nangikhulumako;
Nangiqeda ukukhuluma, ningahlekisa ngami-ke.+
4 Kghani isinghonghoyilo sami siqaliselwe emuntwini?
Nangabe bekunjalo bengekhe na ngiphelelwe sineke?
5 Akhe ningiqale begodu nibabaze ngenikubonako;
Nivale la nidla khona.
6 Nangicabanga ngokungenzakaleleko, ngiyathikaziseka,
Umzimbani woke uyahlengezela.
8 Abantwababo bahlala baphambi kwabo,
Baphila isikhathi eside bebabone iinzukulwana zabo.
9 Izindlu zabakhohlakeleko zivikelekile, abasabi litho,+
Begodu isijeziso sakaZimu asikafiki kibo.
10 Iinkunzi zabo ziyamithisa;
Iinkomo zabo ziyazala begodu azipholoji.
11 Abesanyana babo bagijima ngaphandle njengomhlambi,
Begodu badlala kamnandi.
12 Abantwana babo babhina basebenzisa abosotjherere namaharibha
Begodu bathabela itjhada lefuludi.+
14 Kodwana bathi kuZimu weqiniso, ‘Hlukana nathi!
Asikhanukeli ukwazi iindlela zakho.+
15 Ngubani uMninimandla Woke bona simlotjhe?+
Sizakubuyelwa yini nasimthandazako?’+
16 Kodwana ngazi kuhle ukuthi abakghoni ukulawula ipumelelwabo.+
Begodu angicabangi njengabo.+
17 Isibani sabakhohlakeleko sicinywa kanengi kangangani?+
Ihlekelele ibehlela kanengi kangangani?
Ngelaka lakhe, uZimu ubatjhabalalisa kanengi kangangani?
18 Kghani banjengomhlanga phambi komoya
Nanjengeenhluba eziphetjhulwa siwuruwuru?
19 Kodwana uZimu uzokujezisa amadodana wokhohlakeleko ngebanga lomtjhapho kayise.
Kwanga uZimu angajezisa okhohlakeleko bona azi umtjhaphwakhe.+
21 Usazokutshwenyeka na ngalokho okusazokwenzeka emadodanenakhe
Nangabe ufa ngaphambi kwesikhathi?+
24 Uzokufa iinyonga zakhe zinonile
Namathambakhe asaqinile.*
25 Kodwana omunye umuntu ufa alisizi khulu,
Angakhenge abone izinto ezihle.
27 Qalani! Ngazi kuhle ukuthi nicabangani
Ngazi namano eniwalukako bona ningone.*+
28 Ngombana nithi, ‘Iphi indlu yendoda edumileko leya,
Liphi itende ebelihlala umuntu okhohlakeleko?’+
29 Kghani akhenge nibuze abantu abakhamba iindawo ngeendawo?
Anikukholwa na abakutjhoko,
30 Ukuthi umuntu okhohlakeleko uyaphephiswa ngelanga lehlekelele
Begodu uyasindiswa ngelanga lesizi?
31 Ngubani ozomtjela ngendlelakhe yokuphila,
Ngubani ozombuyisela ngakwenzileko?
32 Uzokubulungwa,
Begodu ithuna lakhe lizokugadwa.
33 Uzokuthatjiswa yindawo alaliswe kiyo,+
Begodu boke abantu bazomlandela+
Kuzokuba njengombana kwenzeka ngabanengi ebebaphambi kwakhe.
34 Nje-ke kubayini ningiduduza ngendlela engatjho litho?+
Iimpendulo zenu ziyikohliso kwaphela!”
22 U-Elifazi+ umTemani waphendula wathi:
2 “Kghani umuntu angaba lisizo kuZimu na?
Kghani umuntu onelemuko angaba lisizo kuZimu?+
3 Kghani uMninimandla Woke* unendaba nokuthi wena ulungile,
Namkha uzuza okuthileko ngebanga lokuthi uthembekile?+
4 Uzokujezisa na
Begodu akwahlulele ngebanga lokumhlonipha kwakho?
5 Inga-kghani lokhu kwenzeka ngebanga lokukhohlakala kwakho okukhulu
Nokuthi imitjhaphwakho ayipheli?+
6 Ngombana uthatha isibambiso kubafowenu ngaphandle kwesizathu,
Begodu uhlubulisa abantu izambatho zabo, ubatjhiye babulanzi.+
7 Awubaphi abadiniweko amanzi wokusela,
Begodu ubadima ukudla abalambileko.+
8 Inarha ngeyomuntu onamandla,+
Begodu kiyo kuhlala abathandwako.
9 Kodwana wena uqothe abahlolokazi badududu,
Walimaza iintandani.
10 Kungebangelo ubhodwe ziinthiyo,+
Neengozi ezingakalindeleki zikuthusa;
11 Kungebangelo kumnyama ungakghoni ukubona,
Namanzi weenkhukhula akugubuzesile.
12 UZimu uphakeme ezulwini, kghani akusinjalo?
Nazo zoke iinkwekwezi ezulwini ziphakeme.
13 Kodwana wena uthe: ‘UZimu wazini?
Angahlulela na ebumnyameni obunzima tshu?
14 Amafu amsithile bona angaboni
Njengombana akhambakhamba engcenyeni ephakamileko yezulwini.’
15 Kghani uzokukhamba endleleni yekadeni
Leyo abantu abakhohlakeleko abakhambe kiyo,
16 Abantu abahlongakele msinyana basesebatjha,
Labo isisekelo sabo esarhurhulwa ziinkhukhula?+
17 Bebathi kuZimu weqiniso: ‘Akhusilise!’
Begodu bathi, ‘Yini uMninimandla Woke angayenza kithi?’
18 Nanyana kunjalo, uZimu nguye ozalisa izindlu zabo ngezinto ezihle.
(Ukucabanga kwami akufani nokucabanga kwabo okukhohlakeleko.)
19 Olungileko uzokubona ukutjhatjalaliswa kwabo bese athabe,
Nomsulwa uzobahleka ubudlhadlha athi:
20 ‘Amanabethu atjhatjalalisiwe,
Nomlilo uzokutjhisa uqede okuseleko kwabo.’
21 Zinikele isikhathi sokumazi, uzokuba nokuthula;
Izinto ezihle zizokuza kuwe.
22 Lalela umthethwakhe,
Ufake amezwakhe ehliziywenakho.+
23 Nawubuyela kuMninimandla Woke, uzokuvuselelwa;+
Nawususa ukungalungi etendenakho,
24 Nawulahlela igolide lakho ehlabathini
Begodu ulahlela igolide le-Ofira+ emrhobeni,
25 UMninimandla Woke uzokuba ligolide lakho,
Begodu uzokuba lisiliva lakho elikhethekileko.
26 Ithabo lakho lizokuba kuMninimandla Woke,
Begodu wena uzokuphakamisela ubuso bakho kuye.
27 Uzomncenga begodu uzokuzwa;
Uzokufeza iimfungo zakho.
28 Nanyana yini oqunta ukuyenza izokuphumelela,
Nokukhanya kuzokukhanyisa indlelakho.
29 Ngombana uzokuhlaziseka nawuzikhakhazisako,
Kodwana yena uzokusindisa othobekileko.
30 Uzokusindisa abamsulwa;
Nje-ke nangabe izandla zakho zihlwengile, kwamambala uzokusindisa.”
23 UJobho wathi:
2 “Angeze ngilise ukunghonghoyila;+
Sebele ngiphelelwe mamandla ngebanga lokunghonghoyila kwami.
3 Ngathana bengazi bona ngingamfumanaphi uZimu!+
Bengizakuya lapha ahlala khona.+
4 Ngifike ngimbikele umlandwami
Ngibeke nobufakazi bami bona ngizivikele;
5 Bengizokulalela nakangiphendulako
Ngiyelele nalokho angitjela khona.
6 Kghani bekazokusebenzisa amandlakhe amakhulu bona alwe nami?
Awa, bengeze kodwana bekazongilalela.+
7 Phambi kwakaZimu umlandu wolungileko ungasulwa,
Begodu uMahlulelami bengizombhadela kube kanye.
8 Kodwana ngithi nangiya ngepumalanga, ngingamfumani;
Ngithi nanyana ngibuyile, ngingamfumani.
9 Lokha nakasebenza ngesinceleni, angikghoni ukumqala;
Nakaya ngesidleni nakhona angimboni.
10 Kodwana uyazi bona ngenze okulungileko.+
Ngemva kokuthi angihlahlubile, ngizokuba njengegolide elicwengileko.+
11 Iinyawo zami zikhambe emtlhalenakhe;
Begodu akhenge ngiphambuke endlelenakhe.+
12 Imiyalo anginikele yona akhenge ngiyitjhiye.
Amezwakhe ngawathanda+ bengenza nokudlula lokho ebekulindeleke kimi.
13 Nakazimisele ngokwenza okuthileko, ngubani ongajama endlelenakhe?+
Nakunento afuna ukuyenza, uyayenza.+
14 Ngombana koke azimisele ukungenzela khona, uzokwenza,
Begodu unezinto ezinengi ezinjengalezi.
15 Ngibetjhwa livalo ngebanga lakhe;
Nangicabanga ngaye ngithukwa khulu.
16 UZimu ungenze ngaba litjhatjha,
UMninimandla Woke ungenze ngarhidlwa livalo.
17 Kodwana ngitjho nobumnyama akhenge bungenze ngithule
Naphezu kokuthi bebugubuzese ubuso bami.
24 “Kubayini uMninimandla Woke angabeki ilanga lakhe lokwahlulela okhohlakeleko?+
Kubayini labo abamaziko bangaliboni ilangelo?
2 Abantu batjhidisa iinkhonkhwani;+
Beba izimvu bazifake emhlambinabo.
3 Bathumba udumbana weentandani
Bathathe ikunzi yomhlolokazi njengesibambiso.+
4 Abavumeli abadududu bakhambe endleleni;
Babenza babaleke ngebanga lokusaba.+
5 Abatlhagako bafuna ukudla emmangweni njengabodumbana+ bommango;
Bafunela abantwababo ukudla erhalawumbeni.
6 Kufuze bavune kwenye isimu*
Begodu baburuje esimini yamadiribe yokhohlakeleko.
7 Ubusuku boke bahlubule, abanazembatho;+
Akunanto abangazimbesa ngayo emakhazeni.
8 Banethwa lizulu entabeni;
Baphephela emadwaleni ngebanga lokungabi nesiphephelo.
9 Intandani iyahluthulwa emabeleni kanina;+
Begodu izembatho zotlhagako ziyathathwa bona zibe sibambiso,+
10 Lokho kubakatelela bona bakhambe bahlubule banganazembatho,
Begodu balambile njengombana baphethe abakuvunileko.
11 Basebenza budisi emibundwini hlangana namaboda wamatje emini ilanga lihlabile;*
Bagadanga amadiribe bona benze iwayini, nanyana kunjalo bafile kukoma.+
12 Abahlongakalako bayaquma edorobheni;
Abalimele khulu balilela isizo,+
Kodwana uZimu akanandaba nalokho.*
Begodu ufihla nobuso bakhe.
16 Ebusuku amadoda aziinkhohlakali angena ngeendlini ebe;
Kuthi emini azivalele ngeendlini zawo.
Awakwazi ukukhanya.+
17 Ukukhanya kwekuseni kuwathusa njengobumnyama obunzima tshu!
Awabusabi ubumnyama njengabanye abantu.
18 Kodwana akhukhulwa mamanzi msinyana.
Isabelo sawo senarheni sizokuqalekiswa.+
Angekhe asabuyela emasiminawo wamadiribe.
19 Njengalokha igabhogo elincibilikileko nalinyamalalako ngesikhathi sesomiso,
Nalabo abonileko bazokunyamalala ngendlela efanako eThuneni!*+
20 Unina wabonileko uzobakhohlwa; bazokudliwa ziimbungu.
Angekhe basakhunjulwa.+
Begodu abangakalungi bazokuquntwa njengomuthi.
21 Umuntu okhohlakeleko utlhorisa inyumba,
Begodu aphathe kumbi umhlolokazi.
22 UZimu uzokusebenzisa amandlakhe bona asuse abanamandla;
Ngitjho nanyana bangaphakama, angekhe baragele phambili baphila.
23 UZimu ubavumela bona bazithembe begodu bazizwe bavikelekile,+
Kodwana amehlwakhe aqale koke abakwenzako.+
24 Bazikhakhazisa isikhatjhana, ngemva kwalokho abasekho.+
Bayehliswa,+ bafe njengabo boke abantu;
Baquntwa njengeenqwambi zekoroyi.
25 Nje-ke ngubani ongathi nginamala
Namkha ongaphikisana nelizwi lami?”
25 UBhilidadi+ umTjhurhi waphendula wathi:
2 “NguZimu kwaphela ongabusa, uyasabeka;
Wenza bona kube nokuthula ezulwini.
3 Ukhona na ongabala amabuthwakhe wezulwini?
Ukukhanya kwakhe kubakhanyela boke.
5 Ngokuya ngaye inyezi ayikhanyi kuhle
Neenkwekwezi azikhanyi kuhle,
6 Kangangani-ke ngomuntu, akasililitho,
Begodu kuZimu ufana nesibungu!”
26 UJobho wathi:
2 “Qala bona umsize kangangani umuntu onganamandla!
Qala bona umsindise kangangani umuntu obogabogako!+
3 Qala bona umnikele iseluleko esihle kangangani ongakahlakaniphi!+
Qala nendlela omambulele ngayo ukuhlakanipha ngokutjhaphulukileko!
4 Ngubani olinga ukukhuluma naye,
Begodu ngubani okukhuthaze bona utjho izintwezi?*
5 Ngebanga lamandla kaZimu, abahlongakeleko bayahlengezela;
Begodu bangaphasi kwelwandle neembunjwa zalo.
7 Ululela umkayi endaweni enganalitho,+
Alembelelise iphasi emoyeni;
8 Uphuthela amanzi ngamafu wakhe,+
Bona amafu angaphadlhuki ngebanga lobudisi bamanzi;
9 Wenza bona isihlalo sakhe sobukhosi singabonakali,
Ngokuthi andlale ilifu lakhe phezu kwaso.+
10 Ubeke umuda bona ube mkhawulo hlangana nomkayi nelwandle;+
Wabeka umkhawulo hlangana nokukhanya nobumnyama.
11 Iinsika zezulwini ziyadengezela;
Zithuswe kukhalima kwakaZimu.
12 Uhlangahlanganisa ilwandle ngamandlakhe,+
Ngokuhlakanipha kwakhe uphihliza isilwana selwandle esikhulu nesisabekako* bona sibe ziinqunqwana.+
13 Usebenzisa ummoyakhe bona athanyelisise ezulwini;
Isandla sakhe sihlaba inyoka etjhelelako.
14 Yeke, lezi zizinto ezimbalwa azenzileko;+
Thina-ke sizwe okuncani khulu ngaye!
Ngubani-ke ongazwisisa amandla wokuduma kwakhe?”+
27 UJobho waraga nekulumakhe, wathi:
2 “Ngifunga egameni lakaZimu ophilako, ongakhenge angiphathe ngobulungiswa,+
Ngifunga egameni lakaMninimandla Woke, owenze ukuphila kwami kwaba budisi,+
3 Nangisaphilako,
UZimu asanginikele amandla wokuphila,+
4 Umlomami angekhe ukhulume izinto ezingakalungi;
Namkha ububule ngezinto ezingakathembeki!
5 Nina madoda angekhe ngathi nilungile!
Angekhe ngavumela litho bona lingilahlekisele ukuthembeka kwami bengiyokufa!+
6 Ngizokuhlala ekulungeni kwami begodu angekhe ngivume kungiphunyurhe;+
Ihliziywami angekhe ingisole, ikani nangisaphilako.
7 Kwanga inaba lami lingajeziswa njengokhohlakeleko,
Abangisahlelako kwanga bangaba njengabangakalungi.
8 Ngiliphi ithemba analo umuntu ongamthandiko uZimu* lokha nakatjhatjalaliswako,+
Lokha uZimu nakathatha ukuphila kwakhe?
9 Kghani uZimu uyasizwa isililo sakhe
Lokha nakehlelwa matshwenyeko?+
10 Namkha uMninimandla Woke uzomenza athabe?
Kghani uzokubiza uZimu ngaso soke isikhathi?
11 Ngizonifundisa ngamandla kaZimu;*
Akunanto engizoyifihla ngoMninimandla Woke.
12 Qalani! Nangabe noke nibone imibono,
Kubayini nikhulume izinto ezingatjho litho?
13 Nakhu umphumela ovela kuZimu ngomuntu okhohlakeleko,+
Ilifa elivela kuMninimandla Woke elifunyanwa ngokhohlakeleko.
14 Nangabe amadodanakhe aba manengi, azokubulawa ngesabula,+
Begodu iinzukulwana zakhe angekhe zibe nokudla okwaneleko.
15 Abaseleko bakhe bazokubulungwa ngebanga lesifo esibulalako,
Begodu abahlolokazi babo angekhe babalilele.
16 Ngitjho nanyana angabuthelela isiliva inga lithuli,
Abe nezembatho ezinengi njengendunduma yomdaka,
17 Nanyana angazibuthelela,
Umuntu olungileko uzozimbatha,+
Begodu abamsulwa bazokwabelana isiliva lakhe.
18 Indlu ayakhako ayikaqini ifana nendlu yomvunya,
Njengomthunzi+ owenziwe mlindi.
19 Uzokulala anjingile kodwana akunanto azoyibuthelela;
Uzakuthi nakavula amehlwakhe, kungabi nento ayifumanako.
20 Ukusaba kuzomehlela kwanga sikhukhula;
Aphetjhulwe siwuruwuru ebusuku.+
21 Uzokuphetjhulwa mumoya wepumalanga, angekhe asafumaneka;
Uzomthanyela endawenakhe.+
23 Abantu bawahla izandla ngebanga lokutshwenyeka kwakhe
Begodu bamthuke+ baseendaweni zabo.
28 “Kunendawo lapho kufumaneka khona isiliva
Nendawo lapho kufumaneka khona igolide elizokuhlungwa;+
2 Isimbi ikhutjhwa phasi,
Nekhopha yenjiwa emadwaleni.+
3 Umuntu uhlula ubumnyama;
Utjhinga endaweni enzima tshu!
Ayokufuna izinto eziligugu.*
4 Ubethela isimbi kude nalapha kuhlala khona abantu,
Eendaweni ezingasakhunjulwa, kude nalapha kukhamba khona abantu,
Amanye amadoda ehlele ngaphasi begodu alenge ngerobho njengombana asebenza.
5 Ukudla kumila phezulu ehlabathini;
Kodwana ngaphasi kwayo itjhugululwe kwanga iyatjha.*
6 Ematjenapho kunelitje isafire,
Begodu nethuli lakhona linegolide.
7 Ikhozi aliyazi indlela leyo;
Nedlanga akhenge kheliyibone indlela leyo.
8 Akunasibandana esithusako ekhe sakhamba lapho;
Ngitjho nebhubezana akhenge khelikhambakhambe lapho.
9 Umuntu umadlha ilitje;
Iintaba uziphendulela emirajinazo.
10 Imilambo yamanzi uyemba+ edwaleni;
Ilihlo lakhe libona yoke into eligugu.
11 Uvala iindawo lapho imilambo ivela khona
Begodu okufihlekileko ukuletha emkhanyweni.
13 Akunamuntu obona ukuqakatheka kwakho,+
Begodu angeze kwafumaneka ephasini.
14 Amanzi asekuzikeni athi, ‘Akukho kimapha!’
Nelwandle lithi, ‘Akukho kimapha!’+
15 Ukuhlakanipha angeze kwathengwa ngitjho nangegolide lamambala,
Nesiliva angeze lamadaniswa nakho.+
16 Angeze kwathengwa nangegolide le-Ofira+
Nangelitje i-oniksi nesafire.
17 Igolide nerhalasi angeze kwamadaniswa nokuhlakanipha;
Ngitjho nesitja esenziwe ngegolide elihlungiweko angeze samadaniswa nakho.+
18 Iparele nekhristali, zona-ke azisaphathwa nokuphathwa,+
Ngombana ukuhlakanipha kuqakatheke ukudlula amaparele amanengi.
19 Ithopazi+ yeKutjhe angeze yamadaniswa nakho;
Ukuhlakanipha angeze kwathengwa ngitjho nangegolide elihlungiweko.
20 Alo, ukuhlakanipha kubuyaphi,
Ukuzwisisa kukuphi lapha kungafumaneka khona?+
21 Ukuhlakanipha kufihlelwe koke okuphilako ephasini+
Ngitjho neenyoni zifihlelwe ukuhlakanipha.
22 Ithuna nokufa kuthi,
‘Sikuzwela kude ukuhlakanipha.’
23 UZimu nguye ozwisisa indlela yokufumana ukuhlakanipha;
Nguye kwaphela owazi lapha kuhlala khona,+
24 Ngombana ubona nemaphethelweni wephasi,
Begodu ubona koke okwenzeka ephasini.+
25 Lokha nakapha umoya amandla+
Bekalinganise nobukhulu bamanzi,+
26 Nakabeka isikhathi sokuna kwezulu+
Nendlela yomoya namafu wakhona nomdumo,+
27 Kungesikhatheso lapho abona khona ukuhlakanipha ezintweni azenzileko bewakuhlathulula;
Wenza bona ukuhlakanipha kube khona begodu wakuhlahluba.
28 Watjela umuntu wathi kuye:
29 UJobho waraga nekulumakhe, wathi:
2 “Ngathana bengingabuyela eenyangeni ezadlulako,
Emihleni leya nangisatjhejwa nguZimu,
3 Lokha nakenza isibani sakhe sikhanyise ihlokwami,
Lokha nangisakghona ukukhambakhamba ebumnyameni ngokukhanya kwakhe,+
4 Lokha nangisathabela ukuphila kwami,
Emihleni leya ngisathabela ubungani obuhle noZimu,+
5 UMninimandla Woke nakasese nami,
Ngisabhodwe bantwabami,
6 Lokha ngisahlamba iinyawo zami ngebhodoro,
Namadwala angithululela imilanjana yamafutha.+
7 Lokha nangisakghona ukuya esangweni ledorobho+
Bengihlale netatawini lomphakathi,+
8 Amasokana nakangibonako bewajamela eqadi,*
Ngitjho namadoda amadala bewasikima ajame.+
9 Amakhosana wona bewathula du;
Avale lapha adla khona.
10 Ngitjho namadoda adumileko bewathula du;
Begodu angatjho litho.
11 Woke umuntu obekangizwa bekakhuluma kuhle ngami,
Nalabo ebebangibona bebafakaza kuhle ngami.
12 Ngombana bengisindisa otlhagako olilela isizo,+
Ngisindise intandani kuhlanganise nanyana ngubani obekanganamuntu ongamsiza.+
14 Ukulunga bengikumbethe inga zizambatho zami;
Ubulungiswa bami bebunjengejasi enganamikhono begodu bunjengetjhila elithwalwa ehloko.
15 Bengimamehlo wesiphofu
Neenyawo zorholopheleko.
16 Bengitlhogomela abatlhagako inga nginguyise kibo;+
Bengisiza abantu engingabaziko bafumane ubulungiswa.+
17 Bengiphula imihlathi yomenzi wobumbi+
Ngihluthule nenyamazana emazinywenakhe.
18 Benginande ngithi, ‘Ngizokufela ngendlinami,+
Begodu amalangami azokuba manengi inga lithuli lehlabathi.
19 Ngizokuba njengemirabhu enabela ngemanzini,
Begodu umbethe uzokuhlala ubusuku boke eempandeni zami.
20 Abantu bazokuhlala bangihlonipha,
Begodu ngizokudumuza umsubelami ngokubuyelelweko.’
21 Abantu bebathabela ukungilalela,
Bathule balindele iseluleko sami.+
22 Bekuthi nangiqeda ukukhuluma abantu bavale imilomo;
Amezwami bewazwakala kamnandi eendlebeni zabo.
23 Bebangilinda inga balindele izulu;
Balinde ngabomvu ukuzwa amezwami inga mumuntu olindele izulu letwasahlobo.+
24 Nangimomothekako bebangakholwa;
Nabangibona ngithabile bebaqina idolo.
25 Bengibayala inga ngimdosiphambilabo,
Ngihlale inga ngiyikosi hlangana namabuthwayo,+
Njengomuntu oduduza abalilako.+
30 “Nje-ke sengihlekwa+
Nababantu abancani kimi,
Aboyise ebengekhe ngivume
Ukubabeka nezinja ezigade umhlambami.
2 Amandla wezandla zabo angisiza ngani?
Amandlabo atjhabalele.
3 Baphele amandla ngebanga lokutlhaga nokungabi nokudla;
Bakhuma ihlabathi
Esele itjhatjalalisiwe.
4 Bakha amakari wetswayi emithini;
Ukudla kwabo mirabhu yemithi.
5 Bayaqothwa emphakathini;+
Abantu babaqotha inga ziinlelesi.
6 Bahlala emirhobeni,
Emigodini nematjeni.
7 Barhuwelela bahlangana nemithi
Begodu babuthene hlangana nemithi emide.
8 Amadodana womuntu onganangqondo namadodana womuntu onganagama,
Aqothiwe enarheni.
11 Ngombana uZimu ungenze ngabogaboga begodu wangithobisa,
Bangiphikisa ngaphandle kokusaba.
12 Bajame njengesiqubuthu esifuna ukungisahlela;
Bangikatelela bona ngibaleke
Begodu babeka iinqabo zokungitjhabalalisa.
13 Bone iindlela zami
Begodu benza ihlekelelami yaba yimbi khulu,+
Akhenge kube nomuntu obakhalimako bona balise.
14 Batheleka ngasuthi bangene ngetjhuba elikhulu ebodeni;
Bagedekela endaweni etjhatjalalisiweko.
15 Ngifikelwe kukwesaba;
Isithunzi sami siphephuka njengomoya,
Begodu iphuluswami inyamalele njengelifu.
18 Isambatho sami sidoseka ngamandla amakhulu;
Singikghama njengekholoro yesambatho sami.
19 UZimu ungilahlele edakeni;
Senginjengethuli nomlotha.
20 Ngibawa isizo kodwana awungiphenduli;+
Ngiyasikima bona ngitjhidele kuwe kodwana awungitjheji.
21 Ungijikele kabuhlungu;+
Wangisahlela ngesandla sakho esinamandla.
22 Ungiphakamisile wangithwala ngomoya;
Ngemva kwalokho, wangitjhabalalisa esiwuruwurwini.*
23 Ngombana ngiyazi ukuthi uzongibangela bona ngife,
Ngiye endlini lapho woke umuntu ophilako azokuya khona.
24 Kodwana akunamuntu ozokusahlela indoda egandelelekileko+
Njengombana ibawa isizo hlangana nesikhathi sayo sehlekelele.
25 Akhenge ngibalilele na abavelelwe zizinto ezibuhlungu?
Akhenge ngibazwele ubuhlungu na abatlhagako?+
26 Nanyana bengilindele okuhle kodwana kwafika okumbi;
Bengilindele umkhanyo kodwana kwafika ubumnyama.
27 Ukuwurubajeka okungaphakathi kwami akhenge kuphele;
Ngiqalene namalanga wobuhlungu.
28 Ngikhamba ebumnyameni,+ anginathemba.
Embuthanweni ngiyasikima ngibawa isizo.
29 Ngibe mfowabo leempungutjha
Bengaba mngani wabantwana beenciliba.+
31 Iharibha lami lisetjenziselwe ukulila,
Nefuludi yami isetjenziselwe ukurhahlawula isililo.
31 “Ngenze isivumelwano namehlwami.+
Alo, ngingayiqala njani intombi ngokuyikhanukela?+
2 Kunento engizayifumana na evela kuZimu,
Ngiliphi ilifa engizalifumana kuMninimandla Woke?
3 Kghani okhohlakeleko akakalindelwa yihlekelele na
Owenza izinto ezingakalungi akakalindelwa yihlekelele na?+
4 Kghani akakuboni koke engikwenzako na+
Begodu akazitjheji na zoke izinto engizenzako?
5 Ngakhe ngaleya amala na?
Ukhona ekhe ngamdurhisa?+
7 Nangabe iinyawo zami ziphambuke endleleni elungileko+
Namkha ihliziywami yalandela amehlwami+
Namkha izandla zami zasilaphazwa,
8 Lokha nangitjala imbewu ayidliwe ngomunye umuntu,+
Engikutjalako akusitjhulwe.
9 Nangabe ngakhe ngayengwa mfazi+
Begodu ngalinda+ ithuba lokuthi ngone nomfazi kamakhelwanami,
10 Umkami akasilele enye indoda iinthoro,
Begodu enye nenye indoda ayitjhinge naye emabhayini.+
11 Nangenze njalo, bengizabe ngiziphethe kumbi khulu,
Begodu bekuzokuba mlandu wokujeziswa bahluleli.+
12 Ukuziphatha okunjalo bekuzokuba njengomlilo orhiribidelako notjhabalalisako,+
Utjhabalalisa koke enginakho.
13 Nangabe akhenge ngenzele iinsebenzi zami ubulungiswa
Lokha nazilila ngami,
14 Alo, ngizokubona ngenzeni uZimu nakajamelana nami?
Ngizokuphendula ngithini nakangiphosa ngemibuzo?+
15 Owangenzako esibelethweni akhenge abenze nabo na?+
Akusinguye na owasenza ngaphambi kokobana sibelethwe?+
16 Nangabe akhenge ngiphe abatlhagileko abakutlhogako+
Namkha ngenza umhlolokazi waphelelwa lithemba;*+
17 Ngadla ukudla kwami ngedwa
Begodu ngangakwabeli neentandani;+
18 (Kusukela ebutjheni bami ngakhulisa intandani kwanga nginguyise,
Begodu kusukela ebuntwaneni bengisolo ngisiza umhlolokazi.*)
19 Nangabe ngabona umuntu atjhabalala ngebanga lokutlhoga izambatho
Namkha umuntu otlhagileko angananto yokuzembesa;+
20 Nangabe akhenge angibusise+
Njengombana azifuthumeza ngoboya bezimvu zami;
21 Intandani akhenge ngiyiphakamisele amaguduva+
Lokha nayitlhoga bona ngiyisize esangweni ledorobho;*+
22 Nangabe kunjalo umkhonwami awuphuke ehlombe lami,
Begodu uphuke endololwaneni.
23 Ngombana ngisabe ihlekelele evela kuZimu,
Begodu bengeze ngajama phambi kwephazimulwakhe.
24 Nangabe ngibeka ithemba lami egolideni
Namkha ngitjela igolide elihlungiweko ngithi kilo, ‘Ngithembe wena!’+
25 Nangabe ngathatjiswa bunjinga bami+
Ngebanga lezinto ezinengi ebenginazo;+
26 Nangabe ngabona ilanga likhanya
Ngabona nenyezi ikhamba ngephazimulwayo;+
27 Ihliziywami yayengeka,
Begodu umlomami wammanga isandla sami ngokuzilotjha;+
28 Nangabe bengenze njalo, bengizabe ngenze umlandu ebewuzokwenza ngifanelwe kujeziswa bahluleli,
Ngombana bengizabe ngiphike uZimu weqiniso.
29 Ngakhe ngathaba na ngebanga lehlekelele eyehlakalele inaba lami+
Namkha ngathatjiswa bubumbi obulehlakaleleko?
31 Kghani abantu abangendlinami akhenge na bathi,
‘Ngubani ongakhenge adle ukudla kwakaJobho bekaneliseke?’+
33 Kghani ngakhe ngafihla imitjhaphwami njengombana kwenza abanye abantu,+
Ngokuyifihla esikhwameni sesambatho sami?
34 Kghani ngakhe ngasaba
ngebanga lokuthi isiqubuthu sabantu sizakuthini,
Namkha ngathuswa kukuthi eminye imindeni izakuphathwa ziinhloni ngebanga lami,
Kghani ivalo lingenze ngathula bengazivalela ngendlinami?
35 Ngifisa kwanga bekungaba nomuntu ozongilalela!+
Bengizakutlikitla igama lami kilokho engikukhulumileko.
UMninimandla Woke akangiphendule!+
Ngifisa kwanga ummangalelami bekakutlole phasi lokho angimangalela ngakho!
36 Bengizakuthwala emahlombe,
Begodu ngikubophe ehloko kwanga sihlohlo.
37 Bengizamtjela koke engikwenzako;
Begodu bengizokutjhidela kuye ngaphandle kokusaba, kwanga ngimntwana wekosi.
38 Nange amasimami anganghonghoyila ngami
Nemisele yawo ilile;
39 Nangabe ngidle iinthelo zawo simahla,+
Namkha ngenza abanikazi bazo balahle itewu;+
40 Akumile ameva kunokuthi kumile ikoroyi
Begodu akumile ikhula elinuka kumbi kunokuthi kumile ibhali.”
Amezwi kaJobho aphelela khona lapha.
32 Nje-ke amadoda amathathu lawo alisa ukuphendulana noJobho ngombana uJobho bekazibona alunge khulu.+ 2 Kodwana u-Elihu indodana kaBharakeli umBhuzi+ womndeni kaRamu wasilingeka khulu ngebanga lakaJobho ngombana ulinge ukuzenza olungileko kunoZimu.+ 3 Wasilingeka ngebanga labangani bakaJobho abathathu ngombana babhalelwe kumphendula kuhle kunalokho basola uZimu.+ 4 Ngebanga lokuthi amadoda la bewamakhulu kunaye, u-Elihu walinda ngaphambi kobana aphendule uJobho.+ 5 Kuthe nakabona ukuthi amadoda amathathu la akunanto enetlha angayitjho kuJobho, kwathi akafe ngokusilingeka. 6 U-Elihu indodana kaBharakeli umBhuzi, wathi:
Nje-ke ngehlonipho ngizibambile,+
Akhenge nginitjele engikwaziko.
7 Ngacabanga ngathi, ‘Akukhulume abantu abadala,
Begodu labo abaphile isikhathi eside abaveze ukuhlakanipha kwabo.’
8 Kwamambala nguZimu onikela abantu ummoya ocwengileko,
Begodu kuphefumula koMninimandla Woke okubenza bazwisise.+
9 Ubudala abumenzi umuntu ahlakaniphe,
Begodu akusibabantu abadala kwaphela abazwisisa okulungileko.+
10 Nje-ke ngithi kuwe, ‘Akhungilalele,
Nami ngizokutjela engikwaziko.’
11 Bengisolo ngilindele amezwenu;
Bengisolo ngilalele indlela enicabanga ngayo+
Nanisolo nifunana nezinto eningazitjho.+
12 Bengisolo ngilalelisise enikutjhoko,
Begodu noke nje nibhalelwe kusola uJobho
Namkha niphendule amezwakhe.
13 Yeke ningazitjeli nithi, ‘Sifumene ukuhlakanipha;
Akube nguZimu omlungisako, kungabi mumuntu.’
14 Amezwakhe akhenge awaqalisele kimi,
Nje-ke angekhe ngimphendule ngalokho akutjhwileko.
15 Bararekile, abasakghoni ukuphendula;
Akusekho okhunye abangakutjho.
16 Bengisolo ngilindile kodwana abasakghoni ukukhuluma;
Sebajame kwaphela abasenapendulo.
17 Nje-ke nami ngizokuphendula;
Ngizonitjela engikwaziko,
18 Ngombana kunengi engingakutjho;
Ummoya ongaphakathi kwami uyangisunduza.
19 Amathumbami afana newayini elivalelekileko lingafumani umoya,
Afana nemigodla yewayini efuna ukuthuthumba.+
20 Akhe ngikhulume bona ngikghone ukutjhaphuluka!
Ngizokuvula umlomami, ngiphendule.
21 Akunamuntu engizomkhethulula;+
Namkha ngimtshime,
22 Ngombana angikwazi ukutshima;
Ngathana bengikwazi, uMbumbami bekazongisusa khonokho.
33 “Nje-ke Jobho ngibawa ungilalele;
Ulalele yoke into engiyitjhoko.
2 Ngibawa ungilalele! Ngizokukhuluma;
Umlomami kufuze ukhulume.
3 Amezwami akhuluma ukulunga kwehliziywami;+
Nomlomami ukhuluma engikwaziko,
4 Ummoya kaZimu ungenzile,+
Nokuphefumula koMninimandla Woke kungenze ngaphila.+
5 Yeke ngibawa ungiphendule nawukghonako;
Hlela amezwakho phambi kwami, uzilungiselele ukuzivikela.
6 Qala! Nginjengawe phambi kwakaZimu weqiniso;
Nami ngibunjwe ngomdaka.+
7 Yeke akukafuzi ungisabe,
Begodu engizokutjela khona angeze kube budisi kuwe.
8 Kodwana nawukhulumako bengikulalele,
Ngasolo ngizwa amezwi la,
9 ‘Ngimsulwa, anginasono;+
Ngihlwengile begodu anginamtjhapho.+
10 Kodwana uZimu unamabanga wokungiphikisa;
Ungithatha njengenaba lakhe.+
12 Kodwana uphambukile ngokutjho lokhu, nje-ke ngizokuphendula:
UZimu mkhulu kunomuntu.+
13 Kubayini unghonghoyila ngaye?+
Inga-kghani kungombana akhenge aphendule woke amezwakho?+
14 Ngombana uZimu ukhuluma ngokubuyelelweko
Kodwana akunamuntu omlalelako,
15 Lokha nakakhuluma ngebhudango, embonweni webusuku,+
Lokha abantu babanjwe buthongo obukhulu.
Balele emibhedenabo.
16 Uvula iindlebe zabo+
Abanikele isinqophiso sakhe,
17 Bona asuse umuntu ekwenzeni okumbi,+
Bekamvikele ekuzikhakhaziseni.+
18 UZimu uyamphephisa bona angayi ethuneni,+
Ukuphila kwakhe kutjhabalala ngesabula.
19 Umuntu angafunda okuthileko nakalele embhedenakhe ezwa ubuhlungu
Nalokha amathambakhe amzwisa ubuhlungu ngaso soke isikhathi,
20 Bona angakhanukeli uburotho,
Begodu ale nokudla okumnandi.+
21 Uthoma ukonda khulu
Bekube kulapho amathambakhe abonakala.
22 Umphefumulwakhe utjhidela ethuneni;
Ukuphila kwakhe kutjhidela ebantwini ababulalako.
23 Kodwana nakungafika isithunywa* kuye,
Umkhulumeli munye kwabayikulungwana,
Bona azomtjela ukuthi khuyini okulungileko,
24 UZimu uba nomusa kuye athi,
‘Mvikeleni, angayi ethuneni!+
Ngombana ngifumene isihlengo!+
26 Uzokuthandaza kuZimu,+ uZimu amamukele,
Uzokubona ubuso bakhe ngethabo elikhulu,
Uzokubuyisela ukulunga kwakhe emuntwini.
27 Umuntu loyo uzokuthi ebantwini,
‘Ngonile+ begodu ngahlanakela okulungileko,
Kodwana akhenge ngifumane okungifaneleko.
28 Uhlenge umphefumulwami bona ungayi ethuneni,+
Begodu ngizokuragela phambili ngiphila.’
29 UZimu wenzele umuntu zoke izintwezi
Ngokubuyelelweko,
30 Bona ambuyise ethuneni,
Akhanyiselwe ngokukhanya kokuphila.+
31 Lalela amezwami Jobho, ngibawa ungilalele!
Thula ngirage nokukhuluma.
32 Nangabe unokuthileko ofuna ukukutjho, ngiphendula.
Khuluma ngombana ngifuna ukukuveza umumuntu olungileko.
33 Nangabe awunalitho ongalitjho, ngilalela;
Thula ngizokufundisa ukuhlakanipha.”
34 Nje-ke u-Elihu waraga nokukhuluma wathi:
2 “Akhe ningilaleleni, nina enihlakaniphileko;
Akhe ningizweni nina eninelwazi.
3 Ngombana indlebe ilalelisisa amezwi
Njengalokha ilimu nalinambitha ukudla.
4 Akhe sizihloleleni ngokwethu, sibone ukuthi khuyini emsulwa;
Sizikhethele ngokwethu, ukuthi khuyini elungileko.
6 Kghani kufuze ngileye amala, ngithi akukafaneli ngahlulelwe ngendlela elungileko?
Inceba lami alilapheki, ngitjho nanyana ngingakenzi isono.’+
7 Ngimuphi umuntu ofana noJobho,
Osela iinhlamba kwanga usela amanzi?
8 Umngani weenkhohlakali
Begodu uqhema nabantu abakhohlakeleko.+
9 Ngombana wathi, ‘Umuntu akunalitho alifumanako
Ngokulinga ukuthabisa uZimu.’+
10 Akhe ningilaleleni, nina madoda azwisisako:
11 Ngombana uZimu upha umuntu umvuzo ngokwalokho akwenzileko+
Begodu umupha okumfaneleko.
13 Alo-ke, ngubani ophe uZimu umsebenzi wokubusa iphasi,
Ngubani ombeke bona atlhogomele iphasi loke?
14 Nange angajamelana nabantu,
Begodu abuthelele imimoyabo nokuphefumula kwabo kuye,+
15 Boke abantu bebazokuhlongakala,
Babuyele ethulini.+
16 Nje-ke nangabe uyazwisisa, akhutjheje nakhu;
Ulalelisise engizokutjho.
17 Umuntu ohloye ubulungiswa angabusa na,
Namkha ungamsola umuntu onamandla kodwana alungile?
18 Ungatjho na ekosini uthi, ‘Awunabubhadekelo,’
Namkha utjele amakhosana uthi, ‘Niziinkhohlakali’?+
19 Munye kwaphela ongaboni amakhosana angcono kunabanye
Akabandlululi abatlhagileko kwabanjingileko,+
Ngombana boke bamsebenzi wezandla zakhe.+
21 Ngombana amehlo kaZimu aqale izenzo zomuntu,+
Ubona yoke into ayenzako.
22 Abenza izinto ezikhohlakeleko angeze bazifihla kuye
Ngitjho nanyana bangaba sendaweni enzima tshu!+
23 UZimu akunamuntu ambekele isikhathi
Sokobana eze phambi kwakhe azokwahlulelwa.
24 Utjhabalalisa abanamandla ngaphandle kokuthi aphenyisise
Afake abanye abantu eendaweni zabo.+
26 Ngebanga lokukhohlakala kwabo,
Ubamadlha phambi kwabo boke abantu,+
27 Ngombana balisile ukumlandela+
Begodu abayihloniphi imiyalwakhe;+
28 Ngombana benza abatlhagileko bamlilele,
Begodu uyabezwa nabamlilela banganasizo.+
29 UZimu nakangathula, ngubani ongamsola?
Nakafihla ubuso bakhe, ngubani ongambona?
Lokha nakabufihlela isitjhaba nalokha nakabufihlela umuntu, umphumela uyafana,
30 Bona umuntu okhohlakeleko* angabusi+
Namkha abekele abantu isithiyo.
31 Ukhona na ongathi kuZimu,
‘Ngihlunguphaziwe, ngitjho nanyana ngingakoni;+
32 Ngitjengisa engingakwaziko;
Bona nakunento embi engiyenzileko, ngingasayibuyelela.’
33 Ngombonwakho ucabanga ukuthi uZimu kufuze akunikele umvuzo ngebanga lokuthi awuvumelani naye?
Nguwe okufuze uqunte, ingasi mina.
Nje-ke ngitjela okwaziko.
34 Amadoda azwisisako nahlakaniphileko,
Nakangizwako azokuthi,
35 ‘UJobho ukhulunyiswa kungazi,+
Begodu amezwakhe awakahlakaniphi.’
36 UJobho akahlolwe*
Ngombana iimpendulo zakhe zifana nezomuntu okhohlakeleko!
37 Naphezu kwesono anaso, usangezelela ngokuba lihlubuka;+
Ubetha izandla ngokunyefula phambi kwethu
Utjho namezwi amanengi aveza indlela asola ngayo uZimu weqiniso!+
35 U-Elihu waraga nekulumakhe wathi:
2 “Kghani uzibona ulunge khulu lokha nawuzitjela uthi,
‘Mina ngilunge khulu kunoZimu’?+
3 Ngombana uthi, ‘Nangabe ngilungile lokho kukuzuzisa ngani?*
Kghani ngisebujamweni obungcono ngebanga lokuthi angikoni?’+
4 Ngizokuphendula-ke
Begodu ngiphendule nabangani bakho.+
5 Akhuqale ezulwini ubone,
Utjheje amafu+ naka ngehla kwakho.
6 Nawonako umsilinga njani uZimu?+
Nangabe imitjhaphwakho iba minengi, khuyini oyenza kuye?+
7 Ucabanga ukuthi ngokwenza kwakho okulungileko, wenzela uZimu umusa?
Kghani uZimu khewakubawa bona umenzele umusa?+
8 Ubukhohlakali bakho buthinta kwaphela umuntu onjengawe,
Begodu ukulunga kwakho kuzuzisa kwaphela indodana yomuntu.
9 Abantu bayalila nabagandeleleke khulu;
Balilela isizo ngebanga lezinto abantu abanamandla abazenza kibo.+
10 Kodwana akekho othi, ‘Uphi uZimu, uMbumbami omKhulu,+
Obangela abantu babhine iingoma zokudumisa ebusuku?’+
11 Indlela asifundisa ngayo+ isenza sihlakaniphe ukudlula iimbandana zephasi,+
Usenza sihlakaniphe ukudlula iinyoni.
12 Abantu bayalila kodwana akaphenduli,+
Ngebanga lokuthi bayazikhakhazisa begodu bakhohlakele+
13 Kwamambala uZimu akasilaleli isililo salabo abangakhulumi iqiniso;+
Begodu akababoni.
14 Kangangani-ke ngawe nawunghonghoyila ngokuthi awumboni!+
Yena uyazi kuhle imirarwakho, yeke okufuze ukwenze kumlinda.+
15 Ngombana akhenge asilingeke ngebanga lakho begodu akhenge akujezise;
Akhenge alalele ngitjho nekulumakho yokuphahluka.+
16 UJobho utjho izinto ezinengi ezingatjho litho;
Ukhuluma amezwi amanengi atjengisa ukungabi nelwazi.”+
36 U-Elihu waraga wathi:
2 “Akhungibekezelele isikhatjhana ngihlathulule,
Ngombana ngisesenamezwi engifuna ukuwakhulumela uZimu.
3 Ngizokukhuluma koke engikwaziko,
Begodu ngizokumemezela ukuthi ukulunga ngekoMbumbami.+
4 Amezwami awasimamala;
Amezwi la avela kiloyo owazi koke.+
5 UZimu unamandla+ begodu akanyazi muntu;
Uzwisisa khulu.
6 Angekhe avumele okhohlakeleko aragele phambili nokuphila,+
Kodwana ubenzela ubulungiswa abagandelelekileko.+
7 Akawasusi amehlwakhe ebantwini abalungileko;+
Ubahlalisa namakhosi+ eenhlalweni zawo begodu baphakanyiswa ngokungapheliko.
8 Kodwana nababotjhwe ngeenketani
Begodu babanjwe ngeenrobho zokugandeleleka,
9 Ubembulela abakwenzileko,
Imitjhaphwabo ebangelwe kuzikhakhazisa kwabo.
10 Uyabakhalima
Bekabatjele bona balise ukwenza okumbi.+
12 Kodwana nabangalaleliko, bazokutjhabalala ngesabula+
Begodu bafe banganalwazi.
13 Abangasabi uZimu bayasilingeka.*
Abalibawi isizo ngitjho nanyana abajezisa.
15 Kodwana uZimu usindisa abagandelelekileko ekugandelelekeni kwabo;
Ukhuluma nabo* lokha nabagandelelekileko.
16 Ukukhupha ekugandelelekeni+
Akuse endaweni ebanzi, enganamibandela,+
Begodu wena uzokududuzeka ngokudla okunothileko etafulenakho.+
17 Ngemva kwalokho uzokubona isahlulelo sakaZimu esifaneleko ngokujamelene nokhohlakeleko,+
Lokha isahlulelo nobulungiswa kusekelana.
18 Kodwana tjheja bona ilaka lingakwenzi ube nomona,+
Ungavumeli ukufunjathiswa kukuphambukise.
19 Kghani ukubawa isizo
Namkha imizamwakho yamandla izokwenza ungagandeleleki?+
20 Ungabukhanukeli ubusuku,
Lapho abantu banyamalala khona eendaweni zabo.
21 Yelela bona ungenzi okumbi,
Kunalokho khetha ukukghodlhelelela ubuhlungu.+
22 UZimu uphakeme ngebanga lamandlakhe;
Ngimuphi umfundisi onjengaye?
25 Boke abantu bawubonile,
Umuntu uwuqalela kude.
27 Wenyusa amathosi wamanzi;+
Ekugcineni amathosi wamanzi la aba lizulu nekungu;
28 Ngemva kwalokho amafu awakghuthulela phasi;+
Anethele abantu.
29 Ukhona na ozwisisa indlela amafu andlaleke ngayo,
Umdumo ovela etendeni lakhe?+
30 Qala indlela andlale ngayo umbani+ phezu kwawo
Begodu wenza bona amanzi afike ekuzikeni kwelwandle.
32 Uvala umbani ngezandla zakhe,
Awunqophise lapha afuna uye khona.+
33 Umdumo umemezela ukuba khona kwakhe
Ngitjho nefuyo yenza kwaziwe ukuthi ngubani ozako.
37 “Lokhu kwenza ihliziywami ibethe msinya
Begodu yeqayeqe isendawenayo.
2 Akhe nilalelisise ilizwi lakaZimu elinamandla
Ilizwi lakhe lizwakala njengomdumo wombani.
3 Ukuduma kwalo kuzwakala ezulwini
Begodu uthumela umbanakhe+ nemaphethelweni wephasi.
4 Ngemva kwalokho, kuzwakala umdumo othusako;
Ilizwi lakaZimu elinamandla linjengomdumo wombani,+
Nakakhulumako umbani uyamanyaza.
6 Ngombana utjela igabhogo athi, ‘Khithikela ephasini,’+
Begodu atjele nezulu athi, ‘Wuluka ngamandla.’+
7 UZimu ujamisa yoke imisebenzi yabantu
Bona abantu bazokwazi umsebenzakhe.
8 Iimbandana zibalekela eendlwaneni zazo,
Zihlale lapho.
11 Uthwesa amafu umswakama;
Begodu umbanakhe+ uwusabalalisa emafini;
12 Atjhinga lapha afuna aye khona;
Enze lokho awalayele bona akwenze+ ephasini.
14 Akhulalele nakhu Jobho;
Jama ucabangisise ngemisebenzi kaZimu ebabazekako.+
15 Kghani uyazi ukuthi uZimu uwalawula njani amafu?
Kghani uyazi ukuthi uwenza njani umbani bona umanyaze emafinakhe?
16 Uyazi na ukuthi amafu akhamba njani?+
Le misebenzi ebabazekako yaloyo owazi koke.+
17 Kubayini izembatho zakho zifuthumala
Kukulapho iphasi lithulile ngebanga lomoya wesewula?+
18 Wendlala izulu, alenze liqine njengesimbi+
Kghani nawe ungakwenza lokho?
19 Akhusitjele bona kufuze sithini kuye;
Asikghoni ukuphendula ngombana sisebumnyameni.
20 Kghani uZimu kufuze ngimtjele na ukuthi ngifuna ukukhuluma naye?
Namkha kufuze atjelwe na ukuthi ngifuna ukukhuluma naye?+
21 Abakghoni ukubona umkhanyo,*
Ngitjho nanyana kukhanya emkayini,
Bekube kulapho kufika khona umoya uphembethe amafu.
22 Ngetlhagwini kuvela iphazimulo emanyazela njengegolide;
Ubukhosi bakaZimu+ buyababazeka.
23 Ukuzwisisa uMninimandla Woke yinto ekude nathi;+
Unamandla khulu,+
Akathomi enze into engakhambisani nobulungiswa bakhe+ begodu ulunge khulu.+
24 Nje-ke abantu kufuze bamsabe.+
Ngombana akabathandi abantu abacabanga bona bahlakaniphile.”+
38 Ngemva kwalokho uJehova asesiwuruwurwini waphendula uJobho wathi:+
2 “Ngubani ositha iseluleko sami
Begodu akhulunyiswe kungabi nelwazi?+
3 Ngibawa uzilungiselele njengendoda;
Ngizokubuza, wena ungiphendule.
4 Bewukuphi nangibumba iphasi?+
Ngitjela nakube uyazi.
5 Ngubani owabeka ubukhulu balo, ngitjela nakube uyazi,
Namkha ngubani obeke umuda wokulinganisa kilo?
6 Lisekelwe phezu kwani,
Namkha ngubani obeke ilitje lalo elisisekelo,+
7 Lokha iinkwekwezi zekuseni+ nazirhuwelela kanyekanye zithabile,
8 Ngubani obekele ilwandle umkhawulo+
Lokha naligijimako livela emthonjenalo,
9 Lokha nangilimbathisa ngamafu
Begodu ngiliphuthele ngobumnyama obunzima tshu,
10 Lokha nangilibekela umkhawulo
Begodu ngifaka iinsimbi neminyango kilo,+
11 Bengathi, ‘Nakhu lapha uzokuphelela khona, ungadluleli phambili;
Amagagasakho aphakamileko azokuphelela lapha’?+
12 Solo wabelethwako, ukhe wayala isikhathi sekuseni
Namkha wenza amathathakusa azi bona kufuze avele kuphi,+
13 Kghani nguwe na owatjela ukukhanya kwekuseni bona kutjhinge emaphethelweni wephasi
Kususe nabakhohlakeleko kilo?+
14 Iphasi litjhuguluka njengomdaka* nalingaphakathi kwento yokutshwaya,
Begodu umtlamwalo ubonakala njengomhlobiso wesambatho.
15 Kodwana abakhohlakeleko bafihlelwa ukukhanya kwabo,
Begodu abakghoni ukulimaza abantu.
16 Ukhewafika lapho ilwandle lithoma khona
Namkha wakhambakhamba ebutjhingelweni bamanzi?+
18 Uyayizwisisa na indlela iphaseli elilikhulu ngayo?+
Ngitjela nakube uyakwazi koke lokhu.
19 Umkhanyo uhlala ngakiliphi ihlangothi?+
Ubumnyama bona buvela kuphi,
20 Ungabubuyisela endawenabo
Uzwisise neendlela ezitjhinga endawenabo?
21 Kghani lokhu ukwazi ngombana besele ubelethiwe
Begodu sekade uphila na?
23 Engizibekele isikhathi sesizi,
Isikhathi sepi?+
24 Ngiyiphi indlela etjhinga lapha ukukhanya kukunengi khona,*
Begodu umoya wepumalanga uthoma ukuvuthela kuphi ephasini?+
25 Ngubani ovule indlela yeenrhurhula
Begodu wenza nendlela yomoya namafu nomdumo wakhona,+
26 Ngubani owenze izulu line eendaweni ezingahlalwa babantu,
Emmangweni lapha kunganabantu khona,+
27 Bona anelise iindawo ezingahlalwa mumuntu
Bekenze notjani bumile?+
29 Irhwaba livela esibelethweni sakabani,
Begodu ngubani owenze igabhogo elivela ezulwini+
30 Ngubani owenza amanzi welwandle bona abe njengelitje,
Ngubani owenze amanzi asekuzikeni aba lirhwaba?+
31 Ungazibopha na iinrobho zeenkwekwezi ezibizwa ngokuthi yiKhimarha*
Namkha utjhaphulule iintambo zeenkwekwezi ezibizwa ngokuthi yiKhesili?*+
32 Ungakghona na ukunqophisa iinkwekwezi* ngeenkhathi zazo
Namkha unqophise iinkwekwezi ezibizwa ngokuthi yi-Atjhi* namadodanazo?
33 Uyayazi na imithetho enqophisa ezulwini,+
Namkha ungayikatelela bona ilawule ephasini?
34 Ungakghona na ukuyala amafu
Ubangele iinrhurhula bona zikugubuzese?+
35 Ungakghona na ukuthumela imibani?
Ingeza kuwe ithi, ‘Ngithi laba!’
37 Ngubani ohlakaniphe khulu bona angabala amafu,
Namkha ngubani ongathulula amanzi wezulwini+
38 Bona ithuli liphenduke idaka
Begodu ihlabathi eyomileko ibe lidaka?
39 Ungakghona ukuzumela ibhubezi inyamazana
Namkha usuthise amabhubezana alambileko+
40 Lokha nawakhokhoba endawenawo
Namkha nawakhukhutha endawenawo?
41 Ngubani olungiselela igubulu ukudla+
Lokha abantwabalo nabalilela isizo kuZimu
Begodu bazulazule ngombana abakufumani okudliwako?
39 “Uyasazi na isikhathi iimbuzi zommango ezizala ngaso?+
Kghani wakhe wabukela iqina lizala na?+
2 Uyazibalela na iinyanga okufuze zizale ngazo?
Uyasazi isikhathi okufuze zizale ngaso?
3 Ziyagugubala nazizalako,
Bese imirhelwazo iyaphela.
4 Abantwanyana bazo bayaqina begodu bakhulela emmangweni;
Bayaphuma, bangabuyeli kizo.
5 Ngubani otjhaphulula udumbana wommango,+
Ngubani otjhaphulule iinrobho okubotjhwe ngazo udumbana wommango?
6 Ngenze ummango othabaleleko waba likhaya lakhe
Nendawo yetswayi ngayenza yaba yindawakhe yokuhlala.
7 Ugegeda idorobho eliminyeneko;
Akalizwa nelizwi laloyo omnqophisa bona asebenze.
8 Uzulazula emibundwini, afune amadlelo,
Afune yoke imihlobo yeentjalo ezihlaza.
9 Inga-kghani ikunzi yommango ingavuma na ukukusebenzela?+
Ingavuma na ukuhlala ubusuku boke esitalini sakho?
10 Ungayibopha ikunzi yommango ngeenrobho bona izokulimela,
Namkha izokulandela na bona ilime emrhobeni?
11 Ungathembela na emandlenayo amakhulu
Uyivumele bona yenze umsebenzakho obudisi?
12 Ungathembela kiyo na bona ibuyise isivuno sakho,
Beyisibuthelele eselelweni sakho?
13 Amaphiko wenciliba abetha ngethabo,
Kghani amaphikwayo la angamadaniswa newakadoyi?+
14 Ngombana ibekela amaqandayo ehlabathini,
Iwafuthumeza ngehlabathi.
15 Iyakhohlwa ukuthi angagadangwa apitlike
Namkha angagadangwa ziimbandana.
16 Iphatha abantwabayo kumbi, ngasuthi akusingebayo;+
Ayisabi ukuthi ingasebenzela ilize.
17 Ngombana uZimu uyidime ukuhlakanipha
Wayidima nokuzwisisa.
18 Kodwana nayisikimako ivule amaphikwayo bona iphaphele phezulu,
Ihleka injomani nomkhwelayo.
19 Kghani nguwe onikela injomani amandla?+
Nguwe na oyimbathisa uboya obuhle entanyeni?
20 Ungayenza na bona yeqayeqe njengentethe?
Iphimbo layo liyathusa.+
22 Ihleka ukusaba begodu ayisabi litho.+
Ayijiki ngebanga lesabula.
23 Isikhwama esiphethe imicibitjholo sibetha phezu kwayo nayigijimako,
Umkhonto uyamanyazela.
24 Iyeqayeqa ngethabo, igijimele phambili,
Ayikghoni ukujama rwe nayizwa itjhada lephondo.
25 Nayizwa itjhada lephondo ithi, ‘Nakho-ke!’
Inukelela ipi isesekude
Begodu izwa itjhada leenduna nelepi.+
26 Khewafundisa imihlobo yamakhozi ukuphapha,
Khewayifundisa bona iphaphele njani esewula?
28 Lilala eliweni,
Lihlala ematjeni.
30 Abantwanyana balo basela iingazi;
Begodu nakunokubuleweko lilapho nalo.”+
40 UJehova waphendula uJobho wathi:
2 “Kghani umuntu kufuze asole uMninimandla Woke bekaphikisane naye?+
Osola uZimu akaphendule.”+
3 UJobho waphendula uJehova wathi:
4 “Qala! Angisililitho.+
Ngingaphendula ngithini kuwe?
Ngizokuvala la ngidla khona.+
5 Ngibe nomlomo omude begodu angekhe ngisaphendula;
Akusenanto engingayitjho.”
6 Ngemva kwalokho, uJehova asesiwuruwurwini waphendula uJobho wathi:+
7 “Ngibawa uzilungiselele njengendoda;
Ngizokubuza, wena ungiphendule.+
8 Kghani uzokusola ubulungiswa bami?
Ufuna ukungisola bona ubonakale ulungile?+
9 Kghani amandlakho alingana newakaZimu weqiniso,+
Namkha iphimbo lakho lingenza itjhada njengephimbo lakhe, njengomdumo wezulu?+
10 Ngibawa uveze indlela ophazimula ngayo, uveze nokuthi unamandla kangangani;
Veza isithunzi sakho nobukhulu bakho.
11 Veza ilaka lakho;
Funa woke umuntu ozikhakhazisako begodu umehlise
12 Funa woke umuntu ozikhakhazisako begodu umenze athobeke,
Rhaba ufune abakhohlakeleko.
13 Bafihle boke ehlabathini;
Babophele endaweni efihlekileko,
14 Nawungenza lokhu,
Ngizokuvuma ukuthi ungazisindisa ngamandlakho.
15 Cabanga ngemvubu,* engiyenzileko njengombana ngenze nawe.
Idla utjani njengekunzi.
16 Qala bona iinyawo zayo zinamandla kangangani
Uqale namandla asemisipheni yamathumbayo.
17 Iqinisa umsilayo njengomsedari;
Imisipha yeenyonga zayo iphothene.
18 Amathambayo enziwe ngekhopha;
Iinyawo zayo zenziwe ngesimbi.
19 Hlangana nazo zoke izinto ezibunjwe nguZimu, yona ikhamba phambili;
Ingabulawa kwaphela Mbumbayo.
20 Ngombana iintaba ziyivezela ukudla,
Lapho kudlala khona zoke iimbandana.
21 Ilala ngaphasi kwemithi yameva,
Ngaphasi komthunzi womgaba osemdzweleni.
22 Imithi yameva iyenzela umthunzi,
Begodu ibhodwe mimithi ekhulela emrhobeni.
23 Lokha umlambo nawuzele uphuphuma, ayisabi.
Izizwa inesibindi ngitjho nanyana iJordani+ ingayibetha ngamandla emlonyeni.
24 Ukhona na ongayibamba imqalile
Namkha ayihlabe ngewugu* epumulweni?
41 “Ungayibamba na ingwenya*+ ngewugu yokubamba iinhlambi
Namkha ungalibopha na ilimu layo ngeenrobho?
2 Ungayifaka na irobho eempumulweni zayo
Namkha uhlabe imihlathayo ngewugu?
3 Kghani izakuncenga bona uyenzele umusa,
Namkha izakuba nomusa nayikhuluma nawe?
4 Kghani izakwenza isivumelwano nawe,
Namkha izakuba sigqila sakho umlibe?
5 Ungadlala nayo na kwanga udlala nenyoni
Namkha uyibophe bona abantazanyana bakho badlale nayo?
6 Abarhwebi bangaroyila ngayo na?
Bangabelana ngayo na?
7 Kghani isikhumba sayo ungasihlaba ngeensungulo+
Ihlokwayo ungayihlaba ngemikhonto yokubamba iinhlambi?
8 Nange ungayithinta;
Ngeze usayilibala ipi leyo begodu angeze usayibuyelela into leyo!
9 Nawuzitjela ukuthi uzoyihlula, ubethe phasi.
Ngitjho nokuyibona nje kwaphela kuzokwethusa.
10 Akekho ongaba nesibindi sokujamelana nayo.
Alo, ngubani ongajama phambi kwami?+
11 Ngubani ongiphe okuthileko okuzokufuze ngimbhadele?+
Koke okusephasini ngekwami.+
12 Ngizokukhuluma ngeenyawo zayo,
Ngamandlayo nangomzimbayo owakheke ngendlela ebabazekako.
13 Ngubani ongayihluba isikhumba sayo?
Ngubani ongangena emlonyenayo?
14 Ngubani ovule umlomayo omkhulu?
Amazinywayo ayathusa.
15 Emhlana inemisele yeempepha*
Zibambene.
16 Zoke zihlalelene
Kangangokuthi nomoya angeze wadlula hlangana nazo.
17 Zinamathelene;
Zibambene begodu angeze zahlukaniswa.
18 Nayiphefumulako kuba nomkhanyo,
Amehlwayo afana nemisebe yokuphuma kwelanga.
19 Ngemlonyenayo kuphuma umbani;
Kuphuma amalangabi womlilo.
20 Ngeempumulweni zayo kuphuma intuthu,
Njengendawo enamalangabi womlilo.
21 Ukuphefumula kwayo kuvuthisa amalahle,
Begodu emlonyenayo kuphuma ilangabi.
22 Intamayo inamandla amakhulu,
Boke abayibonako barhidlwa livalo.
23 Isikhumba sayo esimakghwakghwa sinamathelene;
Siqine njengesimbi begodu angeze sasuka.
24 Ihliziywayo iqine njengelitje,
Iqine njengelitje lokusila.
25 Nayiphuma ngemanzini, ngitjho nabanamandla barhidlwa livalo;
Nayikhambakhambako yenza abantu babetjhwe livalo.
26 Akunamuntu ongayihlula ngesabula,
Ngomkhonto, ngomsubela namkha ngomcibitjholo.+
27 Kiyo isimbi ifana nomhlanga,
Ikhopha injengesigodo esibolileko.
28 Umcibitjholo awuyenzi ibaleke;
Namatje wesarwayi avele afane nehlanga elomileko.
29 Kiyo isibhuku sifana nehlanga elomileko,
Abantu nabayiphosa ngomkhonto iyabahleka.
30 Ingaphasi layo libukhali njengesitja somdaka esiphukileko;
Nayikhamba phezu kwedaka kuba kwanga sigodo.+
31 Nayingena elwandle amanzi aba negwebu;
Kwanga yipoto yamafutha abilako.
32 Lapha idlule khona amanzi aba negwebu.
Omunye angabe acabange bona ukuzika kuneenhluthu ezimhlophe.
33 Akunalitho elifana nayo ephasini,
UZimu uyenze yangabi nevalo.
34 Zoke iinlwana ezizikhakhazisako ijamelana nazo.
Begodu iyikosi yazo zoke iimbandana ezinamandla.”
42 TNje-ke uJobho wathi kuJehova:
2 “Sengiyazi bona ukghona ukwenza zoke izinto
Begodu akunalitho elisemkhumbulwenakho obhalelwa kulenza.+
3 Uthe, ‘Ngubani ositha iseluleko sami anganalwazi?’+
Khona kunjalo, ngikhulumile kodwana bengingazwisisi
Izinto ezikarisako, izinto engingazaziko.+
4 Uthe, ‘Ngibawa ungilalele, ngizokukhuluma.
Ngizokubuza, wena ungiphendule.’+
5 Ngizwile ngawe,
Kodwana nje sengikubona ngamehlwami.
6 Nje-ke ngiyazisola ngengikutjhwileko,+
Begodu ngihlala ehlabathini nemlotheni ukutjengisa bona ngiyazisola.”+
7 Ngemva kobana uJehova akhulume noJobho, uJehova wathi ku-Elifazi umTemani:
“Ningisilinge khulu wena nabangani bakho ababili,+ ngombana akhenge nikhulume iqiniso ngami+ njengombana kwenze incekwami uJobho. 8 Nje-ke thathani iinkunzi ezilikhomba namaramu alikhomba, niye encekwinami uJobho, nizenzele umhlatjelo otjhiswako. Incekwami uJobho izonithandazela.+ Nami ngizokwamukela isibawo sakhe bona nginganijezisi ngebanga lobudlhadlha benu ngombana akhenge nikhulume iqiniso ngami njengombana kwenze incekwami uJobho.”
9 Yeke u-Elifazi umTemani, uBhilidadi umTjhurhi noTsofara umNama benza njengombana uJehova atjhwile. UJehova wawuzwa umthandazo kaJobho.
10 Ngemva kobana uJobho athandazele abangani bakhe,+ uJehova wasusa ubuhlungu bakhe+ bewambuyisela ubunjinga bakhe. UJehova wamnikela lokho ebekanakho ngokubuyelelwe kabili.+ 11 Boke abafowabo bakaJobho, abodadwabo nabangani bakhe bakade,+ beza bazokudla naye emzinakhe. Bazwelana naye begodu bamduduza kibo boke ubuhlungu uJehova avumele bona bumehlele. Ngamunye wabo wamupha isipho semali necici legolide.
12 Nje-ke uJehova wabusisa uJobho ukudlula ekuthomeni,+ uJobho waba nezimvu ezizii-14 000, amakamela azii-6 000, iinkomo eziyi-1 000 ezipanwa ngambili* nabodumbana abasikazi abayi-1 000.+ 13 Phezu kwabantwana ebekanabo, waba namanye amadodana alikhomba namadodakazi amathathu.+ 14 Wathiya indodakazakhe yokuthoma ngokuthi nguJemima, yesibili nguKhetsiya, yesithathu nguKhereni-Hapuku. 15 Abekho enarheni abafazi ebebabahle njengamadodakazi kaJobho. Uyise wabanikela ilifa kunye nabafowabo.
16 Ngemva kwalokho, uJobho waphila iminyaka eli-140 bewabona abantwabakhe neenzukulwana zakhe, bekwaba sizukulwana sesine. 17 Ngemva kwesikhathi eside uJobho sekanelisekile ngokuphila, wahlongakala.
Kungatjho ukuthi “Ungazimbi Wokuphikiswa.”
NgesiHebheru, “iimpani zeenkomo ezima-500.”
Sisitjho sesiHebheru esiqalisele emadodaneni kaZimu aziingilozi.
Namkha “bekazomsaba.”
Namkha “AmaKasidi.”
Sisitjho sesiHebheru esiqalisele emadodaneni kaZimu aziingilozi.
Namkha “umphefumulwakhe.”
Yaziwa ngokuthi iqalisele engwenyeni namkha kwesinye isilwana esikhulu esinamandla esihlala ngemanzini.
Namkha kungenzeka “abazakhele iindawo ezitjhatjalalisiweko.”
Namkha “amabhubezi amancani anoboya obukhulu entanyeni.”
Namkha “Isibunjwa sommoya.”
Namkha “eenthunyweni.”
NgesiHebheru, “esabuleni yomlomabo.”
Namkha “azokuba nesivumelwano nawe.”
NgesiHebheru, “abafowabo.”
NgesiHebheru, “ukuphila komuntu ofako.”
NgesiHebheru, “okuhle.”
Namkha “weTjhiyoli.” Qala Ihlathululo.
NgesiHebheru, “emmoyenami.”
Namkha “ngobumunyu bomphefumulwami.”
NgesiHebheru, “anjengomphefumulo.”
Namkha “amumoya ovunguzako.”
Namkha “Uzakuphakamela kuwe.”
NgesiHebheru, “sitjho amezwi asuka eenhliziyweni zaso.”
NgesiHebheru, “Zinjalo iindlela zalabo.”
Namkha “isihlubuki.”
Namkha “abamsulwa.”
NgesiHebheru, “umuntu ofako.”
Namkha kungenzeka isiqhema seenkwekwezi esibizwa ngokuthi liBhere eliKhulu.
Kungenzeka isiqhema seenkwekwezi esibizwa ngokuthi yi-Oriyeni.
Kungenzeka itjho iinkwekwezi ezibizwa ngokuthi yiPleyidasi ezisesiqhemeni seTharusi.
NgesiHebheru, “iinkumba ezingaphakathi zesewula.”
Kungenzeka isilwana esikhulu esisabekako selwandle.
Namkha kungenzeka “ongimangalelako.”
NgesiHebheru, “ubuso.”
NgesiHebheru, “asuse intongakhe phezu kwami.”
Namkha “ukuphila kwami.”
NgesiHebheru, “Izintwezi uzifihle ngehliziywenakho.”
Namkha “ukufumana umkhawulo wayo into.”
Namkha “weTjhiyoli.” Qala Ihlathululo.
NgesiHebheru, “labo abangakhambi kuhle.”
Namkha kungenzeka “khuluma nazo.”
NgesiHebheru, “Zimbili kwaphela izinto okungakafuzi uzenze kimi.”
“Le bekuyindlela yokujezisa, bekubotjhwa iinyawo mhlamunye izandla nentamo.”
Kungenzeka kuqaliselwe kuJobho.
Namkha kungenzeka “aquntwe.”
NgesiHebheru, “uyangahlulela.”
Namkha “eTjhiyoli.” Qala Ihlathululo.
Namkha “ngelwazi elifana nomoya.”
Namkha “umtjhaphwakho ufundisa umlomakho.”
NgesiHebheru, “uburotho.”
Kutjho nanyana ngiliphi ithemba lokubuyisa akulobileko.
Namkha “iTjhiyoli.” Qala Ihlathululo.
Namkha “weTjhiyoli.” Qala Ihlathululo.
Kungenzeka kuqaliselwe kuJobho nakilabo abazwelana naye.
Namkha kungenzeka “njengabasilapheleko.”
Namkha “ahluze.”
NgesiHebheru, “Izibulo lokufa.”
Kutjho ukuthi, sizokwenziwa sife kabuhlungu.
Namkha “ngesibabuli.”
Namkha “ningithuka.”
NgesiHebheru, “Ninganeliswa yinyamami?”
Namkha “u-Adamu.”
Namkha “singakaziginyi.”
Namkha “eTjhiyoli.” Qala Ihlathululo.
Kutjho ukufa msinyana ngaphandle kokuzwa ubuhlungu.
NgesiHebheru, “angasela.”
NgesiHebheru, “Ummongo wamathambakhe uthambile.”
Namkha kungenzeka “ningilimaze.”
Namkha “Kuyamthabisa na uMninimandla Woke.”
Namkha kungenzeka “bavuna ifuru esimini.”
Namkha kungenzeka “Bakhupha amafutha we-oliva emibundwini ehlangana namaboda wamatje.”
Namkha kungenzeka “UZimu akasoli namunye ngobumbi.”
NgesiHebheru, kusetjenziswe ibizo eliqalisela emuntwini otjhadileko oya emabhayini nomuntu angakatjhadi naye.
Namkha “eTjhiyoli.” Qala Ihlathululo.
NgesiHebheru, “Uwakhulume ngommoya kabani?”
Namkha “okuseTjhiyoli.” Qala Ihlathululo.
Namkha “e-Abadoni.”
NgesiHebheru, “uRarhabu.”
Namkha “isihlubuki.”
Namkha kungenzeka “ngesandla sakaZimu.”
NgesiHebheru, “amatje aligugu.”
Kubonakala ngasuthi ikhuluma ngemisebenzi eyenziwa emayini.
NgesiHebheru, “bewazifihla.”
NgesiHebheru, “sisaga.”
Namkha kungenzeka “wangivunguzisa hlangana nesiwuruwuru.”
Namkha kungenzeka “umgomanami.”
NgesiHebheru, “ngifiphaze amehlo womhlolokazi.”
NgesiHebheru, “esibelethweni sakamma.”
Namkha kungenzeka “nangizibona nginabasekeli esangweni ledorobho.”
Namkha “ovela kwenye inarha.”
NgesiHebheru, “ngisesemutjha ngeminyaka.”
“Le bekuyindlela yokujezisa, bekubotjhwa iinyawo mhlamunye izandla nentamo.”
Namkha “ingilozi.”
NgesiHebheru, “ingasi ngesandla somuntu.”
Namkha “umuntu osihlubuki.”
Namkha kungenzeka “Zimu, uJobho lo akahlolwe.”
Kungenzeka kuqaliselwe kuZimu.
Namkha “isihlubuki siyasilingeka.”
NgesiHebheru, “Uvula iindlebe zabo.”
Namkha kungenzeka “ongamnyefula; ongamsola.”
Namkha kungenzeka “ugweba.”
Namkha “ithando elithembekileko.”
Kutjho ilanga.
Sisitjho sesiHebheru esiqalisele emadodaneni kaZimu aziingilozi.
Namkha “njengebumba.”
Namkha kungenzeka “lapha kunombani khona.”
Kungenzeka itjho iinkwekwezi ezibizwa ngokuthi yiPleyidasi ezisesiqhemeni seTharusi.
Kungenzeka isiqhema seenkwekwezi esibizwa ngokuthi yi-Oriyeni.
NgesiHebheru, “iMazarothi.”
Namkha kungenzeka isiqhema seenkwekwezi esibizwa ngokuthi liBhere eliKhulu.
Namkha kungenzeka “umuntu.”
NgesiHebheru, “ngeBhehemothi.”
NgesiHebheru, “ayithiye.”
NgesiHebheru, “uLeviyathani.”
Namkha kungenzeka “izikhakhazisa ngomsele weempepha.”
Okuziinkomo ezizii-2 000.