“Benginelunya”

UKUPHILA KWAMI KWANGAPHAMBILI:

Ngakhulela emndenini ophasi ngokomnotho hlanu kwetheku eliseduze nedorobho leTurku. Ubaba bekayikakaramba yamaguduva, mina nomnakwethu nathi besiwudlala umdlalo wamaguduva. Nengisafunda isikolo nengiya esikolweni kanengi bengizifumana ngilwa. Njengomuntu omutjha, ngaqhemana nesiqhema esigangako, okwangenza ngaba senturhwini khulu. Godu ngathoma isiqhema sombhino weheavy-metal begodu ngathoma ukuzibona ngiyikutani yombhino werock.

Ngathenga iingubhu, ngathoma isiqhema, ngaba mbhini omdosi phambili esiqhemeni. Bengithanda ukwenza izinto ezingazisiko nengisesiteji. Ngombana isiqhema sethu besirhuga begodu besiqaleka ngendlela ethusako, kancani kancani abantu basithanda. Sathoma ukudlalela abantu abanengi umbhino, sagadangisa iingoma ezimbalwa, yokugcina yathola ukusekelwa okukhulu. Ekupheleni kwabo-1980, sathatha ikhambo lokuya e-United States ukuthuthukisa isiqhema sethu. Sabhina eNew York neLos Angeles iinkhathi ezimbalwa safumana ukwaziswa nokuthintana emabubulweni wezombhino aphezulu ngaphambi kobana sibuyelele eFinland.

Nanyana bengikuthabela ukuba sesiqhemeni, bengilulukela ipilo engcono. Bengingawuthandi umoya wokuziphatha kumbi nowokuhlulisana walabo ebebaserhwebeni lombhino lo ngathoma ukungasayithandi ipilo engiyiphilako. Ngazizwa kwanga ngimumuntu omumbi begodu bengikusaba ukuyokutjha emlilweni wesirhogo. Ngalinga ukufumana iimpendulo kizo zoke iincwadi zekolo, ngathandaza ngokudephileko bona ngifumane isizo lakaZimu, nanyana kunjalo bengizizwa kwanga angekhe ngamthabisa uZimu.

INDLELA IBHAYIBHILI EYATJHUGULULA NGAYO UKUPHILA KWAMI:

Bona ngiziphilise, bengisebenza eposini yendaweni yekhaya. Langelinye, ngafumana bona omunye wabantu ebengisebenza nabo ungomunye waboFakazi BakaJehova. Ngamhloma ngeembuzo eemnengi. Ukucabanga kwakhe, nokungiphendula ngokusuka eMtlolweni kwangirara, ngalokho ngavuma bona arage nami isifundo seBhayibhili. Ngemva kobana sifunde iimveke ezimbalwa, isiqhema sami sanikelwa isivumelwano esihle sokuyogadangisa umbhino namathuba wokukhupha iingoma eUnited States. Ngazizwa kwanga leli lithuba elikhulu ekuphileni.

Ngatjela uFakazi lo ebengifunda naye bona ngifuna kwamambala ukukhupha elinye-i-cd lombhino begodu ngemva kokwenza lokho, ngizokuthoma ukusebenzisa iinkambisolawulo zeBhayibhili ekuphileni kwami. Zange agandelele umbonwakhe; wamane wangibawa bona ngifunde amezwi kaJesu asemtlolweni kaMatewu 6:24. Iveseli lithi: “Akakho ongasebenza abaphathi ababili.” Ngaquntwa umlomo nengiqaqelwa ngilokho okutjhiwo mamezwi kaJesu. Kodwana ngemva kwamalanga ambalwa, besele kungiloyo ongifundisa iBhayibheli oquntwe umlomo! Ngamtjela bona ngombana ngifuna ukulandela uJesu, Ngisitjhiyile isiqhema!

IBhayibheli beyinjengesiboniboni esiveza iimphoso zami. (Jakobosi 1:22-25) Ngabona bonyana benginelunya: Bengizikhakhazisa, ngizele iimfiso ezimbi. Bengikhuluma kumbi, bengilwa, ngibhema begodu ngisela khulu. Nengibona bona ukuphila kwami kutjhayisana kangangani neenkambisolawulo zeBhayibheli, ngazizwa kwanga ngiqhule iboda. Nanyana bekubudisi, Bengikulungele ukwenza amatjhuguluko atlhogekako.—Efesu 4:22-24.

Khulu khulu ekuthomeni, bengizisola ngokweqileko ngezinto zakade ezimbi engizenzileko. Kodwana uFakazi egade ngifunda naye wangisiza khulu. Wangitjengisa bona iBhayibhili ithini encwadini ka-Isaya 1:18: “Nanyana izono zenu zitlerebede, zizaba mhlophe njengesithwathwa.” Leli kunye namanye amavesi weBhayibhili angikholisa bona uBabethu wezulwini unomusa begodu ufuna ukulapha amanceba walabo abatjhugulukako emitjhaphwenabo.

Nesele ngazi begodu ngithanda uJehova njengomuntu, ngafuna ukunikela ukuphila kwami kuye. (IRhalani 40:8) Ngabhabhadizwa ngo-1992 emhlanganweni weentjhaba waboFakazi BakaJehova ebewubanjelwe eSt. Petersburg, Russia.

INDLELA ENGAZUZA NGAYO:

Ngenze abangani abanengi abahle hlangana nabakhulekeli bakaJehova. Ngeenkhathi ezithileko, siyahlangana sidlale umbhino ohloniphekako begodu sithabele isipho esihlesi esivela kuZimu. (Jakobosi 1:17) Isibusiso esikhethekileko kube mtjhadwami lokha nengitjhada umkami othandekako, uKristina. Ngabelene naye izinto ezinengi—ithabo neentjhijilo zepilo, namazizo wami adephileko.

Nengabe bengingazange ngibe nguFakazi kaJehova, ngabe kade ngahlongakala. Esikhathini esidlulileko, bengingena ngiphume emirarweni neengozini. Kwanje nginehloso yamambala ekuphileni, begodu ngiyezwa bona izinto zikhamba kuhle.