The Wonders of Creation Reveal God’s Glory
Abanengi bayakuthabela ukubukela indalo. Kodwana bambalwa abalemukako bona indalo yembula okukhulu ngokucabanga nangamazizo woMbumbi wethu Omkhulu. (Rom. 1:20) Esikhathini eside esidlulileko, uDavidi wafunda ngoJehova eLizwini Lakhe eliphefumulelweko. Kodwana godu “wabona” begodu watjhidela kuye ngendalo. (Rha. 8:3, 4) Ividiyo enesihloko esithi The Wonders of Creation Reveal God’s Glory isiza thina, abantwabethu, neemfundo zethu zeBhayibhili bona sibone ezinye zeembunjwa zakaJehova, sibone iimfanelo nobuntu boMbumbi wethu Omkhulu, begodu ngebanga lalokho sitjhidele kuye. Ngemva kokubukela ividiyo le, qala bona ungakghona na ukuphendula iimbuzo elandelako.
(1) Ubukhulu nokuhlophiseka kwendawo yoke ebonakalako kukudephisa njani ukuthokozela kwakho uJehova? (Isa. 40:26) (2) Nesiqalisisa amanzi, sifundani ngaLoyo owawenza? (ISam. 14:7) (3) Ubukhulu bephasi nokutjhidela kwalo elangeni kukutjengisa njani ukuhlakanipha kwakaJehova? (4) Inyanga inamuphi umsebenzi? (Rha. 89:37) (5) UJehova ubenze njani abantu bona bathabele ukuphila? (6) Khuyini i-DNA? (Rha. 139:16) (7) Abantu bahluke njani kizo zoke iimbunjwa zakaJehova zephasini? (Gen. 1:26) (8) Khuyini oqale phambili kiyo ephasini elitjha?
Okungeziweko [Extra Features]: (9) Ivelaphi iimbala? (10) Amanzi awahlula njani amandla adosela phasi bona afikelele phezulu eemthini? (11) Amanzi adlala yiphi indima emzimbenethu? (12) Nikela iimbonelo zokuvumelana okukhona hlangana kwezinto eziphilako. (13) Zazi njani izinto eziphilako bona kufuze zibambisane nezinye? (14) Khuyini i-“golden angle,” begodu ivezwe njani endalweni?
‘Tjhejisisa’ Iimsebenzi Yezandla ZakaJehova: UJesu usikhuthaza bona ‘siqale iinyoni eziphapha phezulu’ begodu ‘sifunde bona amakhwa wommango amila njani.’ (Mat. 6:26, 28) Ukwenza njalo kungaqinisa ikholo lethu, kusenze sibe nethemba kuMbumbi, begodu kwakhe ukuthokozela kwethu ukuhlakanipha kwakaJehova, amandlakhe wokuphulusa abantu nethando. Kunokobana uthikaziswe ngokungatlhogekiko misebenzi yephaseli, ziphe isikhathi begodu ulinge nokuqala iimmangaliso zendalo kaJehova, ucabange ngalokho ezisitjela khona ngoZimu wethu.—Rha. 19:1.