INcwadi EVela EsiHlopheni EsiBusako
BanaKwethu NaboDade AbaThandekako:
UBabethu wezulwini, uJehova usibonelo esihle sethando. Kungalokho iBhayibhili ithi: “uZimu ulithando.” (1 Jwa. 4:8) Nanyana uJehova amniniMandla woke, iLizwi lakhe alitjho bona, “uZimu umamandla.” Ngokuyihloko usekela ukubusa kwakhe ethandweni. Qala bona lokhu kusitjhideza kangangani kuye!
Ngokuthabisako, uJehova akasikateleli bona simkhonze. Akasi mgandeleli. Ufuna simkhonze ngombana simthanda. Nesenza njalo, sitjengisa bona sifuna ukubuswa nguye ngombana sikholelwa bonyana indlelakhe yokubusa ilungile begodu inethando. Lokhu bekusolo kubufakazi kusukela ekuthomeni komlando wabantu.
Kunokobana akatelele u-Adamu no-Efa bona bamlalele, uJehova wabanikela ithuba lokobana bazikhethele. Nengabe bebamthanda kwamambala uJehova begodu bathokoze ngalokho abenzele khona, bebazokujamelana nemizamo kaSathana yokubenza bahlubuke.
Kwamva, uMosisi wakhuluma nesitjhaba sama-Israyeli ekulumwenakhe yamaswaphela wathi: “Qala ngibeka hlanu kwakho namhlanje ukuphila nokuhle, ukufa nokumbi.” (Dut. 30:15) Abantu bebanekululeko yokuzikhethela indlela abafuna ukuphila ngayo. Ngokufanako, uJoshuwa wathi kuma-Israyeli: “Kwanjesi nengabe kukumbi emehlwenenu ukukhonza uJehova, zikhetheleni namhlanje bona ngubani enizomkhonza.” Nebamphendulako, bathi kuJoshuwa: “Kuyinto engacabangekiko, bona sitjhiye uJehova sikhonze abanye abozimu.” (Josh. 24:15, 16) Nathi sizizwa ngendlela efanako namhlanjesi. Ngombana siyamthanda uJehova, ‘akucabangeki’ ngathi bona simtjhiye.
Njengombana simaKrestu weqiniso, siyazi bona ikululeko ibandakanya ini. Nanyana abadala bagunyazwe bona basiluleke begodu basinikele isiyalo, abafuni ukulawula ukuphila nofana ikholo labanye. Umpostoli uPowula watlola wathi: “Asilingi ukuzenza amakhosi phezu kwekholo lenu, siyazi bona ngekholo nidzimelele, siziinsebenzi ezikunye nani bona nithabe.”—2 Kor. 1:24, NW.
Qala bona kwanelisa kangangani ukwenza okuthileko ngombana sifuna kunokobana sikatelelwe bona sikwenze! UJehova usibawa bona senze okuhle ngombana simthanda. Ukuqakatheka kwalokho kubonakala emezwini kaPowula aphefumulelweko: ‘Namtjhana ngikwaba koke enginakho bonyana kondliwe abatlhagako, namtjhana nginganikela ngomzimbami, kodwana nanginganalo ithando, angekhe kwangisiza ngalitho.’—1 Kor. 13:3.
Qala bona kuletha ithabo elingangani nedumo kuJehova ukubona iingidi zabanakwethu nabodade abamkhonza ngombana bamthanda ngehliziyo yabo yoke!
Ngakelinye ihlangothi, uJehova uzithanda zoke iinceku zakhe, kuhlanganise nani bantwana nabatjha abatjengisa bona bathanda uJehova kunephasi elizicabangela lona. Qinisekani bona nathi sinithanda khulu kwamambala.—Luka 12:42, 43.
Ngebanga lokuthanda uJehova, emnyakeni ogadungileko abanakwethu, abodade nabantu abatjha basebenze ama-awara ama-1 748 697 447 batjhumayela iindaba ezimnandi. Batjhukunyiswe lithando, abarhuweleli abazi-7 782 346 bahlanganyele ekonzweni yesiphasi loke. Sithaba nabamukele iqiniso abazi-268 777 hlangana nabo kunabantu abatjha ababonakalise ukuzinikela kuJehova ngokubhabhadiswa. Lokhu kutjho bona kubhabhadiswa abantu abazi-5 168 qobe veke. Qala bona lokhu kuthabisa kangangani!
Esikhathini sokuphelesi, abantu bakaZimu kufuze bakghodlhelele imiraro eminengi, iintjhijilo, itjhutjhiso, ukugula begodu abanye kufuze baqalane nemiraro yokuluphala. Kodwana sizimisele ‘ukungahlehleli emva’ namtjhana ‘singadani.’ Sinithanda kwamambala noke.—Heb. 10:39; 2 Kor. 4:16.
Abanakwenu,
IsiHlopha esiBusako saboFakazi bakaJehova