Imibuzo Evela Ebafundini
Kghani amezwi athi, “Uzobagada,” afumaneka kuRhubo 12:7, akhuluma ‘ngabahlunguphazwako’ (ivesi 5) namkha “amezwi kaJehova” (ivesi 6)?
Umongo weveseli utjengisa ukuthi iveseli likhulumela abantu.
IRhubo 12:1-4 lithi, “abantu abathembekileko banyamalele hlangana nabantu.” Bese kuRhubo 12:5-7 uthi:
“‘Ngebanga lokuthi abahlunguphazwako bagandelelwe,
Ngebanga lokububula kwabanganalitho,
Ngizokusikima ngenze okuthileko,’ kutjho uJehova.
‘Ngizobasindisa kilabo ababadelelako.’
Amezwi kaJehova acwengile;
Afana nesiliva elitsengwe emgodini womlilo, lacwengwa kalikhomba.
Maye! Jehova, uzobagada;
Uzokuvikela ngamunye wabo esizukulwanenesi ngokungapheliko.”
Ivesi 5 likhuluma ngalokho uZimu akutjhoko malungana ‘nabahlunguphazwako.’ Uzobasindisa.
Ivesi 6 lingezelela lithi, “amezwi kaJehova acwengile,” ‘afana nesiliva elitsengiweko.’ AmaKrestu azinikele ngokupheleleko ayavumelana namezwi la.—Rhu. 18:30; 119:140.
Cabanga ngevesi elilandelako, iRhubo 12:7 lithi: “Maye! Jehova, uzobagada, uzokuvikela ngamunye wabo esizukulwanenesi ngokungapheliko.” Ibizo elithi, “wabo” likhuluma ngani?
Ngebanga lokuthi ivesi 7 likhuluma ‘ngamezwi kaJehova,’ abanye bangaphetha ngokuthi amezwi athi “wabo” mamezwi kaZimu. Siyazi nokuthi uZimu uvikele iBhayibheli naphezu kwemizamo eminengi yabaphikisi yokulikhandela namkha ukulitjhabalalisa.—Isa. 40:8; 1 Pit. 1:25.
Nanyana kunjalo, lokho okutjhiwo yivesi 5 kuliqiniso. UJehova bekasolo asiza bekasindisa “abahlunguphazwako” nalabo ‘abagandelelweko’ begodu uzokuragela phambili enza njalo.—Job. 36:15; Rhu. 6:4; 31:1, 2; 54:7; 145:20.
Yeke, amezwi athi “wabo” asevesini 7 akhuluma ngani?
Umongo werhubeli uveza ukuthi ibizo elithi, “wabo” litjho abantu.
IRhubo 12:1 likhuluma ‘ngabantu abathembekileko’ okungenzeka batjelwe amala. Ngemva kwalokho, sifumana emezwi athi uJehova uzokujamelana nalabo abasebenzisa kumbi ilimu labo. Irhubeli lisiqinisekisa ukuthi singathemba uJehova bona uzokulwela abantu bakhe ngebanga lokuthi amezwakhe acwengile.
Yeke, ivesi 7 lithi uJehova uzokugada bekavikele labo abahlunguphazwa ngabakhohlakeleko.
Ibizo elithi, “wabo” lisetjenziswe evesineli emakhophini athenjwako wemiTlolo yesiHebheru. I-Septuagint yesiGirigi isebenzisa ibizo elithi, “thina” kabili evesini 7, okutjengisa ukuthi likhuluma ngabathembekileko abahlunguphazwako nabagandelelweko. Emaswapheleni, ivesi 7 lithi, “ngamunye wabo” abathembekileko uzokuvikelwa “esizukulwanenesi,” esithuthukisa ukukhohlakala. (Rhu. 12:7, 8) Ivesi 7 etjhugululweni yesi-Aramu yemiTlolo yesiHebheru ifundeka bunjesi: “Maye! KOSI, wena uzokuvikela abalungileko, uzobagada esizukulwanenesi esikhohlakeleko ngokungapheliko. Kinanyana ngiliphi ihlangothi abakhohlakeleko abaya kilo, njengonompopoloza omunya iingazi zabantu.” Lokhu kungezelela ubufakazi bokuthi iRhubo 12:7 alikhulumi ngamezwi kaZimu.
Ngebanga lalokho, iveseli linikela “abantu abathembekileko” ithemba lokuthi uZimu uzokuthatha igadango.