Bantu Abalupheleko Niligugu Ebandleni

Mhlamunye nawe sewuphelelwa mamandla ngebanga lokuluphala. Nanyana ulotjhe uJehova ngokuthembeka iminyaka eminengi, kungenzeka ube nemicabango engakhiko nawubona ukulinganiselwa esele unakho. Ngokwesibonelo, kungenzeka umadanise lokho ebewukghona ukukwenza esikhathini esidlulileko nalokho okghona ukukwenza nje. Nangabe kunjalo, khuyini ongakghona ukukwenza bona uqalane ngokuphumelelako nemicabango enjalo?

LOKHO UJEHOVA AKULINDELE KUWE

Zibuze, ‘Khuyini uJehova ayilindele kimi?’ Ungafumana induduzo emezwini akuDuteronomi 6:​5, athi: “Kufuze nithande uJehova uZimenu ngeenhliziyo zenu zoke, ngemiphefumulwenu yoke nangawo woke amandlenu.”

Ngokuya ngokweveseli, uJehova ulindele bona umlotjhe ngehliziyo, umphefumulo namandlakho woke. Ukwazi lokho kungakusiza ungazimadanisi nabanye abantu namkha umadanise lokho okghona ukukwenza nje nalokho ebewukghona ukukwenza esikhathini esidlulileko.

Cabanga ngalokhu: Nawusese mutjha khuyini ebewukghona ukuyenzela uJehova? Abantu abanengi ebebalotjha uJehova bazokuthi bengimnikela koke okusemandlenami. Lokho bekungokuphuma phambili kuye ngokobujamo ebewukibo ngesikhatheso. Khuyini nje okghona ukuyinikela uJehova? Kungenzeka kungokuphuma phambili kuye ngokobujamo okibo nje. Lokho ngilokho okghona ukukwenza namhlanjesi. Nawuqala izinto ngendlela le ungaphetha ngokuthi unikela uJehova lokho ebewukghona ukumnikela khona esikhathini esidlulileko. Bewumnikela koke okusemandlenakho ngesikhatheso begodu nanje, umnikela koke okusemandlenakho.

UNGAZUZA OKUKHULU KWABANYE

Nasi enye indlela ongaqala ngayo ubujamo okibo: Kunokobana ucabange kwaphela ngezinto ongasakghoni ukuzenza linga ukucabanga ngamathuba amanengi wokusiza abanye njengombana sele uluphele. Njengombana sele umKrestu olupheleko kunezinto ongakghona ukuzenza nje ebengekhe ukghone ukuzenza usese mutjha. Ngokwesibonelo, ungakghona ukwenza izinto ezilandelako:

Yabelana nabanye ngezinto ozifunde ekuphileni. Cabanga ngamezwi alandelako atlolwe eBhayibhelini:

IKosi uDavida: “Bengimutjha kodwana nje ngiluphele, kodwana akhenge ngibone umuntu olungileko alahliwe, namkha abantwabakhe bafuna uburotho.”—Rhu. 37:25.

UJotjhuwa: “Nje-ke qalani! Sengizokuhlongakala, nazi kuhle ukuthi alikho nalinye ilizwi kizo zoke iinthembiso ezihle uJehova uZimenu azikhulume kini elingazange liphumelele. Koke anithembise khona kwenzekile. Alikho nalinye ilizwi leenthembiswezo eliwele phasi.”—Jotj. 23:14.

Kungenzeka nawe ukhe watjho amezwi afanako. UDavida noJotjhuwa bakhulume ngalokho okwenzeka ekuphileni kwabo. Iinceku ezithembekilekwezi zakaJehova, zakhuluma ezakubonako nezakuzwako iminyaka eminengi zibona indlela uJehova asebenzelana ngazo nazo, kungebangelo amezwabo anesisindo.

Nasele kuphela iminyaka ulotjha uJehova nawe ungakhuluma ngalokho okwenzeke ekuphileni kwakho nalokho okuzuzileko. Kukhona na okukhumbulako, okwenzekileko, okuthandako, okwenzekako nawubona indlela uJehova abusisa abantu bakhe? Tjhaphuluka ukutjela abantu ngakho. Kungabaqabula abantu lokho njengombana nawe kwakuqabula. Abanye nabezwa okwenzeka kuwe njengombana balotjha uJehova kubakhuthaza khulu. —Rom. 1:​11, 12.

Enye indlela yokukhuthaza abanye kukubakhona esifundweni bunqopha ngendlela ongakghona ngayo. Nawenza njalo uzokuzuzisa abantu olotjha nabo uJehova kuhlanganise nawe. U-Connie, ekukhulunywe ngaye phambilini uthi: “Ukuba sesifundweni kungisiza ngingagandeleleki. Akusilula bona ngingagandeleleka ngebanga lethando elingaka engilifumana eWolweni lomBuso? Ngilinga ukutjengisa abanye ngendlela engithokoza ngayo ngokubanikela izipho ezincani. Okhunye ngiqinisekisa bona ngiragela phambili nokwabelana nabafowethu nabodadwethu.”

KUYAMTHABISA UJEHOVA OKGHONA UKUMENZELA KHONA

EBhayibhelini, kuneembonelo ezinengi zabantu abanobujamo obulinganiselako. Nanyana kunjalo, uJehova uyabathanda. Cabanga ngoSimiyoni, umIsrayeli olupheleko, obekaphila ngesikhathi uJesu abelethwa. Kungenzeka uSimiyoni nakaya ethempelini bekabona amadoda asese matjha atlhogomela imisebenzi eqakathekileko. Kuthiwani ngoSimiyoni? Kungenzeka wacabanga ukuthi ngebanga lokuthi sele aluphele akakaqakatheki kangako kuJehova kodwana uJehova bekabona izinto ngendlela ehlukileko. Wabona uSimiyoni njengendoda ‘elungileko esaba uJehova’ begodu wambusisa ngokuthi abone uJesu asese lisana! UJehova wabe wenza uSimiyoni waphorofida ngoMesiya obekazokufika. (Luk. 2:​25-35) Kuyakhanya bona uJehova wabona ngale kokuthi uSimiyoni bekaluphele kunalokho wabona indoda enokukholwa okuqinileko ‘begodu umoya ocwengileko bewumnqophisa.’

Nawe ungaqiniseka ukuthi uJehova uyakuthabela ukumlotjha uthembekile nanyana ungakghoni ukwenza okunengi. Kungebanga lokuthi, kuJehova umhlatjelo ‘wamukeleka ngokukhethekileko ngokwalokho umuntu anakho, ingasi ngokwalokho umuntu anganakho.’—2 Kor. 8:12.

Ngebanga lalokho cabanga ngalokho okghona ukukwenza. Ngokwesibonelo, ngiyiphi indlela yokutjhumayela osakghona ukuhlanganyela kiyo? Mhlanunye ungatjhumayela isikhatjhana? Ungakghona ukusiza abanye ngokubadosela umtato namkha ubanikele ikarada? Izenzo ezilula ezitjengisa ukuthi siyabathanda abafowethu nabodadwethu zingabathinta khulu, khulukhulu nazivela emuntwini osele anesikhathi eside alotjha uJehova.

Abanye banokulinganisela emzimbeni. Tjheja lokho okwenzeka e-East Africa ebhoksini elinesihloko esithi “Bekutjho Ukuphila Kwakhe.”

Khumbula ukuthi ukukholwa nokuthembeka kwakho kungakhuthaza abanye. Usibonelo esihle sokukghodlhelela begodu ungaqiniseka ukuthi “uZimu akasimumbi bona angakhohlwa umsebenzenu nethando enilitjengise egameni lakhe ngokusiza abacwengileko nokuragela phambili nibasiza.”—Heb. 6:10.

HLALA UMAJADU USIZE ABANYE

Irhubhululo litjengisa ukuthi abantu esele baluphele nabasiza abanye, baba nepilo engcono, bacabanga ngcono begodu baphila isikhathi eside.

Nanyana wenza izinto ezihle angekhe kususe imiphumela yokuluphala. mBuso kaZimu kwaphela ozokususa imbangela yesono, ukuluphala nokufa.—Rom. 5:12.

Nanyana wena usebenzela uJehova okutjho nokusiza abanye bazi uZimu lokho kuzokuqinisa ithemba lakho kuzuzise nepilwakho. Bantu abalupheleko hlalani nikhumbula ukuthi uJehova uyanithanda begodu nebandla lithokoza khulu ngesibonelo enilibekela sona sokukholwa.