Indaba 115

IPharadeyisi Elitjha Ephasini

QALA imithi emide le, amabhlomu amahle neentaba eziphakamilekwezi. Qala bona kuhle kangangani lapha! Akhese uqale indlela iqina elidla ngayo esandleni somsanyana lo. Akhese uqale amabhubesi neempera ezilapha engadini. Ungakuthabela na ukuhlala endaweni efana nale?

UZimu ufuna uhlale ngokungapheliko ephasini epharadeyisini. Akafuni bona uzwe ubuhlungu obuzwiwa babantu namhlanje. Nasi isithembiso seBhayibhili kilabo abazokuhlala epharadeyisini elitjha, sithi: ‘UZimu uzokuba nabo. Ukufa ngeze kusaba khona nokulila nobuhlungu. Ngombana izinto zokuthoma zidlulile.’

UJesu uzokuqiniseka bona amatjhuguluko la ayenzeka. Uyazi bona lokhu kuzokwenzeka nini? Iye, ngemva kokobana ahlanze iphasi, wasusa boke ubumbi nabo boke abantu abangakalungi. Khumbula, lokha uJesu nasephasini wapholisa abantu abanezifo ezihlukahlukaneko, wavusa ngitjho nabantu abafileko. UJesu wenza lokhu ukutjengisa bona yini azoyenza ephasini lokha nekaba yiKosi yombuso kaZimu.

Akhusucabange bona kuzokuba kuhle kangangani epharadeyisini elitjha ephasini! UJesu, nalabo abakhethileko, bazabe babusa ezulwini. Ababusaba bazabe batlhogomela woke umuntu ephasini begodu baqiniseke bona woke umuntu uthabile. Akhe sibone bona yini okufuneka siyenze engasiqinisekisa bonyana uZimu uzosinikela ukuphila okungapheliko epharadeyisini lakhe elitjha ephasini.

ISambulo 21:3, 4; 5:9, 10; 14:1-3.