Isifundo 8

Ipilo Yomndeni Ethabisa UZimu

Ubujamo bendoda buyini emndenini? (1)

Indoda kufuneka imphathe njani umkayo? (2)

Ubaba unasiphi isibopho emndenini? (3)

Iyini indima yomfazi emndenini? (4)

UZimu ufunani kubabelethi nebantwaneni? (5)

Yini umbono webhayibhili ngokuhlukana nokutlhala? (6, 7)

1. IBhayibhili ithi indoda yihloko yomdeni wayo. (1 kwebeKorinte 11:⁠3) Indoda kufuneka ibe nomfazi oyedwa kwaphela. Kufuneka batjhade ngokomthetho.​—⁠1 kuThimothi 3:2; KuTitosi 3:⁠1.

2. Indoda kufuneka ithande umkayo njengombana izithanda. Kufuneka imphathe njengombana uJesu aphatha abalandeli bakhe. (Kwebe-Efesu 5:​25, 28, 29 ) Akufuneki imbethe nanyana imphathe kumbi nganoma ngiyiphi indlela. Kunalokho, kufuneka imphathe ngehlonipho.​—⁠KwebeKholose 3:19; 1 KuPitrosi 3:7.

3. Indoda kufuneka isebenze ngamandla itjheje umdeni wayo. Kufanele iphe umkayo nabantwabayo, ukudla, izambatho, nendawo yokuhlala. Indoda kufuneka itjheje iintlhogo zomndeni wayo zomoya. (1 kuThimothi 5:⁠8) Idosa phambili ekurhelebheni umndeni wayo ekufundeni ngoZimu nangeenhloso zakhe.​—⁠Duteronomi 6:​4-9; Kwebe-Efesu 6:⁠4.

4. Umfazi kufuneka abe mrhelebhi omuhle wendoda yakhe. (Genesisi 2:18) Kufuneka arhelebhe indoda yakhe ekufundiseni nekubanduleni abantwana babo. (Iziyema 1:⁠8) UJehova ufuna umfazi atjheje umndeni wakhe ngethando. (Iziyema 31:​10, 15, 26, 27; KuTitosi 2:​4, 5) Kufuneka ahloniphe indoda yakhe khulu.​—⁠Kwebe-Efesu 5:​22, 23, 33.

5. UZimu ufuna abantwana balalele ababelethi babo. (Kwebe-Efesu 6:​1-3) Ulindele ababelethi balaye bebalungise abantwana babo. Ababelethi kutlhogeka babe nesikhathi nabantwana babo bafunde nabo iBhayibhili, batjheje iintlhogo zabo zomoya nezomzwelo. (Duteronomi 11:​18, 19; Iziyema 22:​6, 15) Ababelethi akufuneki balaye abantwana babo ngendlela emakgwakgwa nenelunya.​—⁠KwebeKholose 3:⁠21.

6. Lapho abantu abatjhadileko baba nemiraro, kufuneka basebenzise iseluleko seBhayibhili. IBhayibhili isikhuthaza bona sibonise ithando silibalele. (kwebeKholose 3:​12-14) ILizwi likaZimu alikhuthazi ukuhlukana njengendlela yokurarulula imiraro emincani. Kodwana umfazi angakhetha ukutjhiya indoda yakhe kuphela (1) ngekani ibhala ukutlhogomela umndeni wayo, (2) inenturhu nepilo yakhe isengozini, namtjhana (3) iphikisa khulu begodu yenza kubebudisi ngaye bonyana akhulekele uJehova.​—⁠1 kwebeKorinte 7:​12, 13.

7. Abantu abatjhadileko kufuneka bathembeke phakathi kwabo bobabili. Ukuhlobonga yisono kuZimu nakumngani womtjhado. (KumaHebheru 13:⁠4) Ukutlhala okusekelwe eBhayibhilini okuvumela umuntu atjhade godu kulapho omunye abe netjhebiswano lomseme nomunye umuntu angakatjhadi naye. (Matewu 19:​6-9; KwebeRoma 7:​2, 3) UJehova uyihloyile into yokubanyana umuntu atlhale ngaphandle kwesisekelo soMtlolo atjhade godu.​—⁠Malaki 2:​14-16.

[Iinthombe ekhasini 16, 17]

UZimu ulindele ababelethi balaye abantwana babo babalungise

[Isithombe ekhasini 17]

Ubaba onethando utlhogomela umndeni wakhe ngezinto eziphathekako ne zomoya