Isifundo 15

Ukurhelebha Abanye Benze Intando KaZimu

Kubayini kufuneka utjele abanye ngalokho okufundako? (1)

Ungazihlanganyela nabobani iindaba ezihle? (2)

Ngimiphi imiphumela ukuziphatha kwakho okungaba nayo kwabanye? (2)

Ungatjhumayela nini nebandla? (3)

1. Okwanje sewufunde izinto ezinengi ezihle eziphuma eBhayibhilini. Ilwazeli kufuneka likudosele ekuhlawuleleni ubuntu bobuKrestu. (Kwebe-Efesu 4:​22-24) Ilwazi elinjalo liyatlhogeka ekufumaneni ukuphila okuphakade. (Jwanisi 17:⁠3) Namtjhana kunjalo, nabanye bayatlhoga ukuzwa iindaba ezihle bonyana nabo baphuluswe. Woke amaKrestu wamambala kufuneka afakaze kwabanye. Lowo mlayo kaZimu.​—​KwebeRoma 10:10; 1 KwebeKorinte 9:16; 1 kuThimothi 4:⁠16.

2. Ungathoma ukuhlanganyela nabahlanu kwakho izinto ezihle ozifundako. Tjela umndeni wakho, abangani bakho, ofunda nabo, nosebenza nabo. Yiba nomusa nesineke newenza njalo. (2 kuThimothi 2:​24, 25) Khumbula bonyana abantu baqala ukuziphatha komuntu ngaphezu kokulalela lokho akutjhoko. Ukuziphatha kwakho okuhle kungadosa abanye balalele umlayezo obatjela wona.​—⁠Matewu 5:16; 1 KaPitrosi 3:​1, 2, 16.

3. Ngokukhamba kwesikhathi, ungathoma ukutjhumayela naBofakazi bakaJehova bendawo yekhenu. Leli yigadango eliqakathekileko ekurageleni kwakho phambili. (Matewu 24:14) Kungaba lithabo elingangani ukukgona ukurhelebha umuntu bonyana abe sisebenzi sikaJehova begodu afumane ukuphila okuphakade!​—⁠1 kwebeTesalonika 2:​19, 20.