Isifundo 7
Isiyeleliso Ngalokho Okwenzeka Ekadeni
UJehova ngeze avumela abantu abambi bona bonakalise iPharadeyisi. Bangani bakhe kwaphela abazokuhlala lapho. Yini ezokwenzeka ebantwini abambi? Ukufumana ipendulo, tjheja indaba yamambala kaNowa. UNowa waphila iminyaka eziinkulungwana eyadlulako. Gade ayindoda elungileko, ngaso soke isikhathi alinga ngawo woke amandla ukwenza intando kaJehova. Kodwana abanye abantu ephasini gade benza iintwezimbi. Ngalokho uJehova watjela uNowa bonyana Uzokuletha ukhukhulamungu bona utjhabalalise boke abantu abambabo. Watjela uNowa bonyana akhe umkhumbi khona-ke yena nomndenakhe bangazukuhlongakala nekufika ukhukhulamungu.—Genesisi 6:9-18.
UNowa nomndenakhe bakha umkhumbi. UNowa wayelelisa abantu bonyana ukhukhulamungu uyeza, kodwana khenge bamlalele. Baragela phambili basenza izinto ezimbi. Ngemva kokobanyana umkhumbi uphelile, uNowa wangenisa iimbandana ngemkhumbini, begodu naye nomndenakhe bangena ngaphakathi. Ngemva kwalokho uJehova waletha isiwuruwuru esikhulu. Izulu lana amalanga ayi-40 nobusuku obuyi-40. Amanzi azala iphasi loke.—Genesisi 7:7-12.
Abantu abambi baloba amaphilo wabo, kodwana uNowa nomndenakhe basinda. UJehova wabaphephisa kukhukhulamungu wabaphulusela ephasini elinganabumbi. (Genesisi 7:22, 23) IBhayibhili ithi siyeza godu isikhathi lapho uJehova azokutjhabalalisa labo ababhala ukwenza okulungileko. Abantu abalungileko ngeze batjhatjalaliswa. Bazakuhlala ephasini eliyiPharadeyisi ngokungapheliko.—2ka Pitrosi 2:5, 6, 9.
Namhlanje abantu abanengi benza iintwezimbi. Iphasi lizele imiraro. UJehova uthumela aboFakazi bakhe ngokuphindiweko ukuyelelisa abantu, nokho abantu abanengi abafuni ukulalela amezwi kaJehova. Abafuni ukutjhugulula iindlela zabo. Abafuni ukwamukela lokho uZimu akutjhoko malungana nokuhle nokumbi. Kuzakwenzekani ebantwinaba? Bazakhe batjhuguluke langelinye? Inengi ngeze latjhuguluka. Isikhathi siyeza lapho abantu abambi bazakutjhatjalaliswa unomphela.—AmaRhalani 92:7.
Iphasi ngeze latjhatjalaliswa; lizakwenziwa ipharadeyisi. Labo ababa bangani bakaZimu bazakuphila ngokungapheliko epharadeyisini ephasinapha.—AmaRhalani 37:29.