Ingcenye 7
Bobani Abasekolweni Yeqiniso?
1. Nesizakuthabisa uZimu kufuneka senzeni?
NESIZAKUTHABELA ubuhlobo obufuthumeleko nobunethando noZimu, kufuneka sihlukane nekolo yamanga. Kufuneka silandele ikolo yeqiniso. Namhlanjesi iingidi zabantu ephasini zombelele ziyakwenza lokho.
2. Bafumaneka kuphi aBofakazi bakaJehova, begodu yini umberegwabo?
2 Njengombana iBhayibhili yatjho, abakhulekeli beqiniso “isiqubuthu esikhulu sabantu” bavela “kizo zoke iintjhaba, nemindeni, namakoro neenlimi.” (ISambulo 7:9) Iingidi zaBofakazi bakaJehova zimajadujadu ngokurhelebha abantu bafunde ngeendlela zethando lakaJehova neemfuneko zakhe, lokho bakwenza eenarheni ezingaphezu kwaka 235.
Ukulimuka Abakhulekeli Beqiniso
3. Bakuqophisa kubani aBofakazi ukukhulekela kwabo, begodu ngiziphi iindlela zokukhulekela abazibalekelako?
3 ABofakazi bayakhumbula bona nguJehova kwaphela okufanele simkhulekele. Abathandazi eenthombeni nemifanekisweni yekolo. (1 Jwanisi 5:21) Abahloniphi abantu abahlongakeleko ngokwenza imilindelo namtjhana eminye imigidi yokuragekisela phambili iinkolelo zekolo yamanga “neemfundiso zamadimoni.” (1 kuThimothi 4:1) Nokho, batjhiriya abantu abakhanjelwe babantu ababathandako ngokubahlathululela ngeenthembiso zakaZimu bonyana kuzakuba nokuvuswa kwabantu epharadesini ephasini.—Jwanisi 5:28, 29; IZenzo 24:15.
4. Buyini ubujamo babantu bakaZimu ngokuphathelene nemilingo?
4 ABofakazi abayiberegisi imilingo, ubuloyi, ngombana bazi kuhle bonyana iintwezi zivela kuSathana. Abathembeli emilingweni bonyana ibavikele—bathembela kuJehova.—Iziyema 18:10.
5. Kungaziphi iindlela aBofakazi bakaJehova “bangasingabephasi”?
5 UJesu wathi abafundi bakhe “abasingabephasi.” (Jwanisi 17:16) UJesu ngokwakhe khenge azibandakanye kwezepolotiki zangesikhathi sakhe. (Jwanisi 6:15) Ngokufanako, aBofakazi abazibandakanyi kwezepolotiki, abanabo ubutjhaba, nokuzabalazela iphasi. Nokho babhadela umthelo bathobela nomthetho wenarha yekhabo.—Jwanisi 15:19; KwebeRoma 13:1, 7.
6. Ngiyiphi indlela epha umkhanyo ngokuphathalene nomtjhado nokutlhala elandelwa ziimberegi zakaZimu?
6 Ngombana bathobela ilayelo laborhulumende, aBofakazi bayaqiniseka bonyana imitjhado yabo ibhaliswe ngokomthetho. (KuTitosi 3:1) Bathobela nelayelo lakaZimu, lokungathathi isithembu. (1 kuThimothi 3:2) Ukungezelela kilokho, njengombana iimberegi zakaZimu zilandela imilayezo yeBhayibhili emaphilweni wazo, azifuni ukubona imitjhado yazo iphela ngebanga lokutlhala.
7. ABofakazi batjhengisana bunjani ithando?
7 ABofakazi banethando phakathi kwabo. Ithandweli, nothando ngoZimu libahlanganisela ebuzalwaneni beqiniso, namtjhana baziintjhaba neenarha ezinengi. Nekuvela ihlekelele aBofakazi bayarhelebhana. ABofakazi batjhengisana ithando endleleni yabo yokuphila.—Jwanisi 13:35.
8. Ngimiphi imikgwa emimbi abantu bakaZimu abayibalekelako?
8 Abantu bakaJehova baberega budisi bona baphile ukuphila kokuthembeka, nokulungileko. Babalekela ukweba, amala, ukuziphatha okumbi, ukudakwa, neemberego yokungathembeki. Amadoda awababethi abafazi babo. Abanye ngaphambi kokobanyana babe Bofakazi bebayenza imikgwa le, kodwana ngerhelebho lakaJehova bayilisile. ‘Bahlanziwe’ emehlweni wakaZimu.—1 kwebeKorinte 6:9-11.
Abenzi Bentando KaZimu
9. Ithini enye ibhugu ngeenkerege zomoya e-Afika?
9 Iye, kwamambala, iinkolo ezinengi zizitjela bonyana zineqiniso. Basekela lokho abazitjela khona ngokwenza iimberego ekarisako. Isibonelo, ngokuphathelene nalokho okubizwa bonyana ziinkerege zomoya e-Afrika, enye incwadi ithi: “Iimberego kasomlingo ngobukhulu ithethwe [siqhema samaKrestu]. . . . Bazitjela bonyana bayaporofida benza neemangaliso. Abaporofidi abaphakathi kwabo bahlathulula iimbono namabhudango. Baberegisa amanzi acwengekileko, amafutha acwengekileko, umlotha, iinkeresi nepepho ekulapheni nekuvikeleni amalwelwe.”
10, 11. Kubayini iinkarisomiraro ezinjalo namhlanjesi zingatjengisi bona ikolo ivela kuZimu?
10 Amalungu weenkolwezi azitjela bonyana imilingo yabo ibufakazi bokobana ikolo yabo ibusiswe nguZimu. Kodwana iinkarisomiraro ezinjalo azitjengisi bonyana ikolo yamukelwa nguJehova. USathana unikela abakhulekeli bamanga abathileko amandla wokwenza ‘iimsebenzi yamandla.’ (2 kwebeTesalonika 2:9) Ukungezelela kilokho, iBhayibhili yatjho bonyana izipho ezivela kuZimu zeenkarisomiraro, njengokuporofida, ukukhuluma ngeenlimi, nelwazi elikhethekileko, “kuzarathuka kuphele.”—1 kwebeKorinte 13:8.
11 UJesu wayelelisa: “Ingasiwoke othi kimi ‘Kosi, Kosi’ ozangena embusweni wezulu kodwana ngilabo bodwa abenza okufunwa nguBaba osezulwini. Mhlana kufika ilanga lokwahlulelwa, abanengi bazakuthi kimi: ‘Kosi, Kosi! ebizweni lakho sakhuluma umlayezo kaZimu, ngebizo lakho saqotha imimoya eminengi emimbi senza neemangaliso ezinengi!’ Yeke ngizakuthi kibo: ‘Azange khenginazi. Sukani kimapha, nkhohlakali-ndina!’”—Matewu 7:21-23.
12. Ngubani ozakungena eMbusweni wezulu?
12 Ngubani ke, ozokungena eMbusweni wezulu? Ngilabo abenza intando kaJehova.
Abatjhumayeli BoMbuso KaZimu
13. Ngimuphi umberego uZimu alayela abantu bakhe bonyana bawenze namhlanjesi, begodu bobani abawenzako?
13 Iyini intando kaZimu ngabantu namhlanjesi? UJesu wathi: “Iindaba ezimnandi ngombuso kaZimu zizatjhunyayelwa ephasini loke.” (Matewu 24:14) Lo, mberego aBofakazi bakaJehova abawenza ngetjhiseko.
14. Uyini uMbuso kaZimu, begodu bobani abazokubusa eMbuswenakhe?
14 “Ephasini loke,” aBofakazi bakaJehova bamemezela ngoMbuso kaZimu njengorhulumende wezulwini ozokubusa iphasi loke ngokulunga. Bafundisa bona uJehova ukhethe uKrestu Jesu abe yiKosi yoMbuso, nabayi 144 000 abakhethwe hlangana nabantu bona bayokubusa naye.—Danyela 7:14, 18; ISambulo14:1, 4.
15. Yini ezokutjhatjalaliswa Mbuso kaZimu?
15 Ngokuberegisa iBhayibhili, aBofakazi bakaJehova batjengisa abantu bonyana uMbuso kaZimu uzokutjhabalalisa loke iphasi lakaSathana. Izokuphela bunjalo ikolo yamanga neemfundiso zayo zokungahloniphi uZimu neziphazimulisa uSathana! (ISambulo 18:8) Bayokuphela bunjalo godu, nabo boke aborhulumende babantu abajamelene noZimu!—Danyela 2:44.
16. Bobani abazokulawulwa nguKrestu Jesu, begodu bazokuhlala kuphi?
16 Ngaphezu kwalokho, aBofakazi bakaJehova benza kwaziwe bonyana uKrestu Jesu uzobalethela iinzuzo ezikarisa khulu labo abenza lokho okufunwa nguZimu. Nguye ozobalawula ephasini. IBhayibhili iyathembisa: “Iyakukhulula ompofu ozikhalela kuyo, nohluphekayo ongenamsizi. Iyakuhawukela odangeleyo nompofu, iyakusindisa imiphefumulo yabampofu.”—AmaRhalani 72:12, 13.
17. Bobani kwaphela abamemezela ngoMbuso kaZimu?
17 Asikho esinye isiqhema sabantu esenza intando kaZimu ngokutjhumayela iindaba ezihle zoMbuso. Bofakazi bakaJehova kwaphela abenza uMbuso kaZimu waziwe ephasini loke.
[Iinthombe ekhasini 23]
ABofakazi bakaJehova banebumbano lobuzalwane ephasini zombelele