Ingcenye 9
Ikolo Yeqiniso Ingakuzuzisa Ngokungapheliko!
1. Kuzakwenzekani nesi “tjhidela kuZimu”?
UJEHOVA uyabathanda labo abamberegelako. Nengabe uberegela uJehova, uzokutjhudubaza nje, nesikhathini esizako. IBhayibhili ithi: “Tjhidelani kuZimu, naye uzatjhidela kini.”—KaJakobosi 4:8.
2. Singatjhidela njani kuZimu, lokhu kuzawuthinta njani umthandazo wethu?
2 Newuzakutjhidela kuZimu, kufuneka ufunde bewuberegise iLizwi lakhe. Newuthandaza ngokuvumelana nentando yakhe, uJehova uzakulalela aphendule imithandazo yakho. Umpostoli ongumKrestu uJwanisi wabhala: “Sibandamela [kuZimu] ngesibindi, ngombana siyazi bonyana uyasizwa nasimbawa nayini emalungana nentando yakhe. Uyasizwa njalo lokha nasimbawako; njengombana sazi lokhu kuliqiniso, siyazi bona sesikuzuzile esikubawa kuye.”—1 KaJwanisi 5:14, 15.
3-7. Singakukereya njani ukuhlakanipha okuvela kuZimu, begodu kungasirhelebha njani?
3 Ngaphezu kwalokho, njengombana utjhidela kuZimu, uzakunikela ukuhlakanipha kokuqalana nokuphila kwangamalanga. IBhayibhili ithi: “Nengabe kukhona hlangana nani onganabo ubuhlakani, akabawe uZimu ophako abantu boke ngesihle, uzaphiwa.”—KaJakobosi 1:5.
4 Kungakurhelebha njani ukuhlakanipha okuvela kuZimu? Enye into, kungakurhelebha wazi izinto ezingamthabisiko uJehova. Ungafunda bona kubayini iintwezi zizimbi nokubanyana wena ungazibalekela njani. Ilwazi elinjalo lingakuvikela emirarweni eminengi egandelela abantu ngokujayelekileko. Isibonelo, ukuthembeka emlayweni kaZimu wokuziphatha kuhle kurhelebha ekuvikeleni abantu bakhe ekuzithwaleni okungafunwa, emalwelweni adluliselwa ngomseme, nemitjhado engakathabi namtjhana ukutlhala.
5 Yini enye ukuhlakanipha okuvela kuZimu okungakwenzela yona? Kungakwenza uthabele ukuphila. Kungakurhelebha wenze iinqunto ezihlakaniphileko eentweni ezinjengokuphatha imali. Uzakulandelela iinhloso ezihle wale iinhloso ezingahlaliko.
6 Ukuhlakanipha okuvela kuZimu godu kungakurhelebha ebudlelwaneni bakho nabanye. Ungaba nomndeni othabileko. Ungakha ubungani bamambala nobuhlala isikhathi eside nabanye, ukereye nokuhlonitjhwa, ngitjho nakulabo abangaberegeli uZimu.
7 Ngaphezu kwalokho, ukuba nokuhlakanipha kwaphezulu kuzokuthuthukisa indlela oqala ngayo ukuphila. Kuzakurhelebha ukgone ukuqalana nobudisi bokuphila nokudana. Begodu, uzakwazi ukuqala ingomuso ngethabo nokuqiniseka. Ukuqiniseka okunjalo, kuzokwenza ube nepilo ehle emkhumbulweni nemzimbeni.—Iziyema 14:30; Isaya 48:17.
8. Yini ongeze wayisaba newukhonza uZimu?
8 Newukhulekela uZimu wamambala, uzakutjhaphuluka ekusabeni okutshwenya labo abangamkhulekeliko. Njengombana wazi bonyana abahlongakeleko abaphili emazindleni, ngeze wabasaba abahlongakalako. Njengombana unethemba esithembisweni sakaZimu sokuvusa abahlongakeleko, ngeze wakusaba. Njengombana wazi bona uZimu unamandla woke, ngeze wasaba ubuloyi.—Jwanisi 8:32.
Abalungileko Bazakudla Ilifa Lephasi
9-11. Bobani abazakuhlala ePharadeyisini, begodu bobani abangeze bahlala khona?
9 Newutjhidela kuZimu, ngeze walisaba ingomuso. Njengoba sesibonile, iBhayibhili labikezela ngemiraro eminengi esiyibonako ephasini namhlanje. UJehova usitjhela bonyana iintwezi ngezesikhatjhana; msinyana uMbuso kaZimu uzokwenza iphaseli libe ipharadeyisi.—Luka 21:10, 11, 31; 23:43.
10 Ngilabo kwaphela abatjhidela hlanu kwakaJehova nabamkhonzako abazakuhlala ePharadeyisini. IBhayibhili ithi: “Kusengumzuzwana, omubi angabe esabakho; kuyakuthi lapho uhlola indawo yakhe, uyakube engasekho. Kepha abathobekileyo bazakulidla ifa lomhlaba, bathokoze ngokuthula okukhulu.”—AmaRhalani 37:10, 11.
11 Labo abangafuni ngekani ukulalela umthetho kaZimu wokulunga bazakulahlekelwa kuphila kwabo unomphela. (2 kwebeTesalonika 1:8, 9) Ngeze basaba khona. Bazokubhujiswa noSathana namadimonakhe unomphela. (ISambulo 20:10, 14) Kodwana labo abafunda ngoJehova bamkhonze bazakufumana ithabo elikhulu ePharadeyisini ephasini.
Ingomuso Elikarisako!
12. Ithini iBhayibhili ngengomuso?
12 UJehova ubabekele okuhle labo abamthandako! Akhe uqale bonyana iLizwi lakhe lithini ngephasi eliyiPharadeyisi:
● Kuzakuba nenala yokudla: “Kuyakuba-khona inala kakolweni [namtjhana ukudla] ezweni esiqongweni sezintaba.”—AmaRhalani 72:16.
● Kuzakuba nezindlu ezihle: “Bayakwakha izindlu, bahlale kuzo.”—Isaya 65:21.
● Bazakuba nomberego ojabulisako: “Nomsebenzi wezandla zabakhethiweyo bami uyakugugela kubo. Abayikushikashikela ize.”—Isaya 65:22, 23.
● Ngeze kusaba nokugula: “Abakhé khona abayikusho ukuthi: ‘Ngiyagula.’”—Isaya 33:24.
● Ngeze kusaba nabarholopheleko: “Khona amehlo ezimpumputhe ayakuvulwa, zivuleke nezindlebe zezithulu. Khona unyonga luyakutshekula njengendluzele, nolimi lwesimungulu luyakuhuba.”—Isaya 35:5, 6.
● Ngeze kusaba nobuhlungu, ukulila, nokufa: “[UZimu] uzobesula zoke iinyembezi emehlweni wabo. Ukufa ngekhe kusaba khona, nokulila nobuhlungu ngekhe kusaba khona, ngombana izinto zokuthoma zidlulile.”—ISambulo 21:4.
● Ngeze kusaba nepi: “[UZimu] uphelisa ukulwa kuze kube-semikhawulweni yomhlaba.”—AmaRhalani 46:9.
● Ukuphila okungapheliko: “Abalungileyo bazakudla ifa lomhlaba, bahlale kuwo njalonjalo.”—AmaRhalani 37:29.
13. Ngubani kwaphela ongenza iphaseli ipharadeyisi, begodu kubayini kunguye kwaphela?
13 Abantu ngeze baziletha izinto ezinjalo, kodwana uJehova unamandla wokwenza namtjhana yini athi uzoyenza. Akunanto engamvimbela ukwenza namtjhana yini afuna ukuyenza. IBhayibhili ithi: “Ngombana ayikho into uZimu angekhe ayenze.”—Luka 1:37.
14. Ungaba njani sendleleni eya ekuphileni okungapheliko?
14 NgaBofakazi bakhe, kuyo yoke indawo uJehova unikela abantu bakhe ithuba loku ‘ngena ngesango elincancani’ nokukhamba indlela eyisa ekuphileni okungapheliko. Kwanga ungaba hlangana nabantu abathabileko abamukele isimemwesi. Kwanga ungalandela ikolo yeqiniso uthabele iimbusiso zakaJehova ezingapheliko!—Matewu 7:13, 14.
[Ikhasi lesithombe esizeleko ekhasini 31]