Ingcenye 16

Ukufika KwakaMesiya

UJehova uveza uJesu weNazaretha njengoMesiya owathenjiswa ekadeni

UJEHOVA uzokukgona na ukurhelebha abantu bona babone uMesiya? Iye, uzokukgona. Cabangela lokho uZimu akwenza. Kungenzeka bona besele kudlule iminyaka eyi-400 ngemva kokobana iMitlolo yesiHebheru iqediwe ukutlolwa. Edorobheni elibizwa bona yiNazaretha, etlhagwini yeGalile, umfazi omutjha obizwa bona nguMariya wakweriyelwa yingilozi. Ingilozi ebizwa bona nguGabriyeli yeza kuye yamtjela bona uZimu bekazokuberegisa amandla wakhe amakhulu, umoya wakhe ocwengekileko, bonyana umbangele bona abelethe indodana namtjhana agade alitlawana. Indodana le, beyizokuba yiKosi eyathenjeswa ekadeni,leyo ezokubusa ngokungapheliko! Umntwana lo, bekazokuba yiNdodana kaZimu, leyo ukuphila kwayo uZimu akususa ezulwini wakuthumela esibelethweni sakaMariya.

UMariya ngokuzithoba wasemukela isabelo esiqakathekilekwesi. Isokana lakhe elimbazi uJosefa, lamtjhada uMariya ngemva kokobana uZimu athumele ingilozi bona imqinisekise ngonobangela wokuba sidisi kwakaMariya. Kuthiwani ke ngesiphorofido esithi uMesiya uzokubelethelwa eBhetlehema? (Mika 5:2) Idorobha elincanelo belilinganiselwa bona belimakhilomitha ayi-140 ukusuka eBhetlehema ukuya eNazaretha!

Umbusi weRoma wamemezela bona kubalwe abantu. Abantu batjelwa bona batlolise enarheni abadabuka kiyo. Kwafumaneka bona uJosefa noMariya babelethelwa eBhetlihema, yeke-ke, baya khona. (Luka 2:3) UMariya wabelethela umntwanakhe esitalini esisebujamweni obuphasi, wamlalisa emkhombeni. Ngemva kwalokho uZimu wathumela iingilozi zakhe ezinengi bonyana zitjele isiqhema sabelusi egade siseqadi kommbundu, bonyana umntwana osanda kubelethwa bekunguMesiya owathenjiswako namtjhana uKrestu.

Ngokukhamba kwesikhathi abanye godu beza bazokuhlola bona uJesu bekunguye uMesiya owathenjiswako. Umphorofidi u-Isaya wabikezela bonyana bekunendoda egade izokuvela begodu ilungiselele uMesiya umberegwakhe oqakathekileko. (Isaya 40:3) Indoda leyo gade kunguJwanisi uMbhabhadisi. Kuthe nakabona uJesu, wababaza: “Nasiya iMvana kaZimu esusa isono sephasi!” Abanye babafundi bakaJwanisi msinyana bamlandela uJesu. Omunye wabo wathi: “Simfumene uMesiya.”—Jwanisi 1:29, 36, 41.

Bekunobunye godu ubufakazi. Lokha uJwanisi nabhabhadisa uJesu, uJehova ngokwakhe wakhuluma asezulwini. Aberegisa umoya ocwengileko, wabeka uJesu njengoMesiya begodu wathi: “Le yiNdodana yami ethandekako, ngithabe khulu ngayo.” (Matewu 3:16, 17) Besele afikile uMesiya owathenjiswa kade!

Lokhu kwenzeka nini? Ngomnyaka ka-29, ngesikhathi lokha iminyaka eyi-483 eyabikezelwa nguDanyela iphelile. Lokho kwaqinisekisa bona kwamambala uJesu nguMesiya namtjhana uKrestu. Ngimuphi umlayezo abekazowutjhumayela phakathi nesikhathi sakhe asephasini?

—Isekelwe kuMatewu izahluko 1 ukuya ku 3; uMarkosi isahluko 1; uLuka isahluko 2; noJwanisi isahluko 1.

◼ UJehova waziberegisa njani iingilozi bonyana zitjengise bona uJesu nguMesiya?

◼ UZimu wamberegisa njani uJwanisi uMbhabhadisi bonyana atjengise bona uJesu nguMesiya?

◼ UJehova ngokwakhe watjengisa njani bonyana indodanakhe inguMesiya?

[Ibhoksi elisekhasini 19]

UJESU YINDODANA KAZIMU NGAYIPHI INDLELA?

UJehova nguBaba kaJesu—kodwana ingasi ngendlela efana nale amadoda abobaba ngayo. UJesu akhenge abelethwe ngendlela evamileko yokuhlangana kwendoda nomfazi—wabunjwa nguJehova ngokwakhe. Eqinisweni bekamumuntu wokuthoma uZimu ambumbako. (Kholose 1:15-17) Njengombana uJehova anikela uJesu ukuphila ngokumbumba, ngalokho-ke angabizwa bona ngubaba kaJesu. Ngemva kokubumba iNdodana yomoya le, uJehova wamberegisa njenge “siberegi esinekgono” bonyana enze zoke ezinye izinto ezikhona, ezihlanganisa izulu nephasi.—Iziyema 8:30.

[Itjhadi ekhasini 19]

Genesisi

Eksodosi

Lefitikosi

Numeri

Duteronomi

Joshuwa

Abahluleli

Rude

1 Samuweli

2 Samuweli

1 Amakhosi

2 Amakhosi

1 Imilando

2 Imilando

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Isililo

Ezekiyeli

Danyela

Hosiya

Juweli

Amosi

Obadiya

Jona

Mika

Nahumi

Habakuki

Zefaniya

Hagayi

Zakariya

Malaki

Matewu ●

Markosi ●

Luka ●

Jwanisi ●

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika