Iimbetho Ezintathu Zokuthoma

Ama-Israyeli akatelelwa bona asebenze budisi njengeengqila. UJehova wathumela uMosi no-Aroni kuFaro nomlayezo othi: ‘Tjhaphulula abantu bami bakhambe, bayongilotjha emmangweni.’ UFaro wazibetha isifuba wathi: ‘Anginandaba nokuthi uJehova uthini, angekhe ngiwatjhaphulule ama-Israyeli.’ Ngebangelo uFaro waqinisa isandla, wawasebenzisa budisi khulu. UJehova waqunta ukufundisa uFaro isifundo. Uyazi bona wakwenza njani lokhu? Wabetha iGibhide ngeeMbetho eziliTjhumi. UJehova wathi kuMosi: ‘UFaro akangilaleli. Ekuseni uzakuya emlanjeni weNayili. Khamba umtjele ukuthi njengombana angafuni ukutjhaphulula abantu bami nje, woke amanzi weNayili azokuphenduka iingazi.’ UMosi walalela wayomtjela. UFaro bekaqale u-Aroni njengombana abetha amanzi ngedondolo lakhe, umlambo uphenduka iingazi. Amanzi athoma ukunuka, iimfesi zafa begodu akhenge kusaba namanzi ahlwengileko wokusela avela eNayili. Nanyana kunjalo uFaro wala ukutjhaphulula ama-Israyeli.

Ngemva kwamalanga alikhomba, uJehova wathumela uMosi bona abuyele kuFaro nomlayezo othi: ‘Nange ungatjhaphululi abantu bami, iGibhide yoke izokuzala iinrhwarhwa.’ U-Aroni waphakamisa idondolo lakhe, iinrhwarhwa zazala inarha yoke. Abantu bafumana iinrhwarhwa ngeendlini zabo, emibhedeni nezitjeni. Bekuneenrhwarhwa kiyo yoke indawo! UFaro warabhela uMosi wathi abawe uJehova asuse iinrhwarhwezo. Wathembisa nokutjhaphulula ama-Israyeli. Nje-ke uJehova azange asaziletha, amaGibhide abuthelela iinrhwarhwa ezifileko, kwaba maqubi. Kwathoma ukunuka enarheni. Kodwana nalapho uFaro akhenge abatjhaphulule abantu.

Ngalokho uJehova wathi kuMosi: ‘U-Aroni kufuze abethe phasi ngedondolo lakhe, bese ithuli lizakuphenduka abonompopoloza.’ Kwarhaba kwaba nabonompopoloza kiyo yoke indawo. Abanye abantu bakaFaro bamtjela bathi: ‘Isibethwesi sivela kuZimu.’ Kodwana uFaro akhenge awatjhaphulule ama-Israyeli.