Udumbana KaBhalami Uyakhuluma

Ama-Israyeli besekaneminyaka epheze ibe ma-40 asemmangweni. Ahlula iinarha ezinengi ezinamandla. Njengombana ahlome amatende hlanu kwenarha yakwaMowabi, eduze noMlambo iJordani, bekusikhathi sokobana angene eNarheni yesiThembiso. Yeke, uBhalaki, ikosi yakwaMowabi beyithukiwe bona izokulahlekelwa yinarhayo. Nje-ke, yamema uBhalami bona eze kwaMowabi azokuqalekisa ama-Israyeli.

Kodwana uJehova wathi kuBhalami: ‘Ungathomi uqalekise ama-Israyeli.’ Ngalokho uBhalami wala ukuya. Kwesibili ikosi uBhalaki yamumema begodu yathembisa ukumupha nanyana yini ayifunako. Nakilokho uBhalami wala. Yeke uZimu wathi: ‘Ungaya kodwana uzokutjho kwaphela lokho engikutjela khona.’

UBhalami wakhwela udumbanakhe waya ngesewula kwaMowabi. Bekanqophe ukuqalekisa ama-Israyeli nanyana uJehova amtjelile ukuthi angenzi njalo. Ingilozi kaJehova yavela kathathu endlelenakhe. UBhalami akhenge ayibone kodwana udumbanakhe wayibona ingilozi. Kokuthoma, udumbana waphuma endleleni wavundla ummango. Ngokulandelako, udumbana waziyama ngomthangala, waminyezela inyawo lakaBhalami ngomthangala loyo. Ekugcineni, udumbana walala phasi phakathi nendlela. Wasilingeka khulu uBhalami, wasolo ambetha ngentongakhe.

Nakambetha kwesithathu, uJehova wenza udumbana wakhuluma. Wabuza uBhalami wathi: ‘Ungibethelani kangaka?’ UBhalami wathi: ‘Kungombana ungenze isidlhayela. Ngathana bengiphethe isabula, bengizokubulala.’ Udumbana wathi: ‘Seminengi iminyaka ungikhwela, khengakwenza into enjengale na?’

UJehova wavula amehlo kaBhalami, wabona ingilozi. Ingilozi yathi: ‘UJehova ukuyelelisile bona ungawaqalekisi ama-Israyeli.’ UBhalami wathi: ‘Ngonile. Ngizakubuyela emva ekhaya.’ Kodwana ingilozi yathi: ‘Ungaya kwaMowabi kodwana utjho lokho uJehova azokutjela khona kwaphela.’

Kghani uBhalami wasithola na isifundo? Awa. Ngemva kwalokho, uBhalami walinga ukuwaqalekisa amahlandla amathathu ama-Israyeli kodwana uJehova wamenza bona awabusise kiwo woke amahlandla amathathu lawo. Ama-Israyeli asahlela inarha yakwaMowabi noBhalami wabulawa. Bengeze kwaba kuhle na ngoBhalami bona alalele uJehova zisuka?