UJesu Ulapha Abantu NgeSabatha

AbaFarisi bebamhloyile uJesu, nje-ke bebafuna ibanga lokumbopha. Bathi akukafaneli alaphe abagulako ngeSabatha. Ngelinye iSabatha, uJesu wahlangana nendoda esiphofu ibawa indleleni. Watjela abafundi bakhe wathi: ‘Khenibone ukuthi amandla kaZimu ayisiza njani indoda le.’ UJesu wakhafulela ihlabathi wayihlanganisa namathe, wayinamathisela emehlweni wendoda leyo. Wayitjela wathi: ‘Khamba uyokuhlamba amehlwakho esizibeni seSilowama.’ Indoda leyo yenza njalo, amehlwayo avuleka. Beyithoma ukubona epilwenayo!

Abantu barareka, bathi: ‘Umuntu lo akusuye na loya obekajayele ukuhlala phasi abawe?’ Indoda leyo yathi: ‘Ngabelethwa ngisiphofu!’ Abantu bayibuza bathi: ‘Alo kuze njani ukuthi ubone?’ Nayibatjela okwenzekileko, bayisa kubaFarisi.

Indoda leyo yatjela abaFarisi yathi: ‘UJesu ungininde ngedaka emehlweni, wathi ngikhambe ngiyolihlamba. Ngenza njalo, begodu nje ngiyabona.’ AbaFarisi bathi: ‘UJesu nakalapha ngeSabatha, kutjho ukuthi amandlakhe awaveli kuZimu.’ Kodwana abanye bathi: ‘Nangabe amandlakhe bewangaveli kuZimu, bengekhe akghone ukulapha indoda le.’

AbaFarisi babiza ababelethi bendoda leyo, bababuza ukuthi: ‘Kuze njani bona indodanenu ibone?’ Ababelethi bayo bebasaba ngombana bezwa abaFarisi bathi nanyana ngubani okholelwa kuJesu uzokukhitjhwa ngesinagogeni. Yeke bathi: ‘Asazi. Buzani yona.’ AbaFarisi babuza indoda leyo eminye imibuzo yaze yathi: ‘Nginitjele koke engikwaziko. Kanti yini engakangaka eniyifunako?’ AbaFarisi basilingeka, bebayiqothela ngaphandle.

UJesu wathi nakayibona godu wayibuza wathi: ‘Uyakholelwa na kuMesiya?’ Indoda leyo yathi: ‘Bengizomkholwa thana bengimazi ukuthi ungubani.’ UJesu wathi kiyo: ‘Nginguye uMesiya.’ UJesu bekanesirhawu samambala ngombana azange agcine ngokulapha indoda leyo kodwana wayisiza nokuthi ibe nokukholwa.