Umphathi Wejele Uthola Iqiniso

EFilipi bekunesigqila somntazana ebesinedimoni. Idimonelo belenza umntazana lo aphengule begodu bekabenzela imali engangemali labo abamphetheko. Kwathi nakufika uPowula noSilasi eFilipi, bekahlala abalandela mihle namalanga. Idimoni lakhe belimenza arhuwelele athi: “Amadoda la aziinsebenzi zakaZimu ongoPhezulu.” Emaswapheleni, uPowula wathi kilo: ‘Ebizweni lakaJesu, phuma kuye!’ Idimoni laphuma emntazaneni.

Kwathi abanikazi bakhe nabalemuka bona angekhe basathola imali ngomntazana lo, kwabasilinga lokho. Babamba uPowula noSilasi, babasa kwebomthetho bathi: ‘Amadoda la aphula umthetho begodu abanga umguruguru edorobheni!’ Bomthetho balayela bona uPowula noSilasi babetjhwe bese bafakwa ejele. Umphathi wejele wabakghurumejela ngaphakathi ekabeni yesikhungo enzima, bewabafaka namakhamandela.

Kwathi ezinye iimbotjhwa nazisalalele njalo, uPowula noSilasi bathoma badumisa uJehova ngeengoma. Phakathi nobusuku, kwasikinyeka iphasi kwanyakaza ijele, iminyango yavuleka, kwatjhaphuluka namakhamandela weembotjhwa namaketani. Umphathi wejele wagijimela ngaphakathi, nakathi mehlosuka, iminyango ivulekile. Wathatha isabula wathi uyazibulala ngombana acabanga bona iimbotjhwa zibalekile.

Khonokho, uPowula wamvimba wathi: ‘Ungazilimazi ndoda! Soke sisesekhona!’ Umphathi wejele wangena wawela phambi kwakaPowula noSilasi, wababuza wathi: ‘Kufuze ngenzeni ukuze ngisindiswe?’ Bathi kuye: ‘Wena nomndenakho kholwani uJesu, nizakusindiswa.’ Ngemva kwalokho, uPowula noSilasi babafundisa iliZwi lakaJehova, umphathi wejele nomndenakhe babhajadiswa.