Ifihlo 4
Khetha Abangani Bakho Ngokuhlakanipha
KHUYINI OKUFUNDISWA YIBHAYIBHILI? “Loyo okhamba nabahlakaniphileko uzokuhlakanipha.”—Iziyema 13:20.
NGISIPHI ISITJHIJILO? Abangani bethu bangangezelela ethabweni lethu namtjhana balinciphise. Indlela abaziphatha ngayo neengcoco zabo zizokuba nomthelela endleleni esiqala ngayo ukuphila.—1 KwebeKorinte 15:33.
Cabangela nasi isibonelo, ukulandisa kweBhayibhili kwamadoda ali-12 abuya ekhambweni lawo lokuhlola inarha yeKanana. Inengi lawo “laragela phambili lilethela abantwana bakwa-Israyeli umbiko omumbi ngenarha abuya ukuyoyihlola.” Ngitjho naphezu kombiko omumbi, amadoda amabili akhuluma kuhle ngeKanana, ayibiza ngokobana “yinarha ehle khulu kwamambala.” Kodwana umbiko omumbi weenhloli ezilitjhumi warhatjheka ebantwini. Ukulandisa kuthi: “Yoke ihlangano yaphakamisa ilizwi layo, boke abantwana bakwa-Israyeli bathoma ukububula.”—Num. 13:30–14:9.
Ngokufanako namhlanjesi, abantu abanengi “bayabubula, banghonghoyila ngokunengi ekuphileni kwabo.” (KaJuda 16) Kubudisi ukuhlala wanelisekile hlangana nabangani abanganelisekiko.
KHUYINI ONGAYENZA? Hlola iinkulumiswano oba nazo nabangani bakho. Abangani bakho kanengi babukisa ngalokho abanakho, namtjhana bahlala babubula ngalokho abanganakho? Wena umngani onjani kibo? Ulwela ukwenza abangani bakho babe nomona ngawe, namtjhana ubakhuthaza bona baneliseke ngalokho abanakho?
Cabangela isibonelo sakaDavidi obekazokuba yikosi, noJonathani indodana yeKosi uSawula. UDavidi waphila njengombaleki emangweni. IKosi uSawula yabona isikhundla sayo njengekosi sisengozini ngebanga lakaDavidi begodu yafuna ukumbulala. Nanyana uJonathani bekazokuba yikosi elandelako, waba mngani kaDavidi oseduze. UJonathani watjheja bona uZimu ukhethe uDavidi bona abe yikosi elandelako begodu bekakuthabela ukusekela umnganakhe lo.—1 Samuweli 19:1, 2; 20:30-33; 23:14-18.
Utlhoga abangani abanjalo, labo abalwela ukwaneliseka nalabo abakufunela okuhle. (Iziyema 17:17) Kwamambala, bona ufumane abangani abanjalo, nawe utlhoga ukuba neemfanelo ezinjalo.—KwebeFilipi 2:3, 4.
[Isithombe ekhasini 7]
Abangani bakho bayangezelela ekwanelisekeni kwakho namtjhana bayakunciphisa?