Isiporofido 6. Umsebenzi Wokutjhumayela Owenziwa Ephasini Loke
“Iindaba ezimnandi zombuso kaZimu zizatjhunyayelwa ephasini loke.”—MATEWU 24:14.
● UVaiatea uhlala esihlengeleni esikude sePacific eTuamotu Archipelago. Nanyana iTuamotu ineenhlengele ezingabama-80 ezisabalele endaweni engaba masikwere-khilomitha azi-802 900, inabantu abangaba zi-16 000 kwaphela. Nanyana kunjalo, uVaiatea nabomakhelwana bakhe khebavakatjhelwa boFakazi BakaJehova. Kubayini? Ngombana aboFakazi BakaJehova bafisa ukuhlanganyela iindaba ezimnandi ngoMbuso kaZimu nabo boke abantu—kungakhathaliseki bona bahlalaphi.
NGIKUPHI OKUTJENGISWA MAQINISO? Iindaba zoMbuso zifinyelela ephasini loke. Ngo-2010 kwaphela, aboFakazi BakaJehova basebenza ama-iri angaphezu kwe-1.6 bhiliyoni barhuwelela iindaba ezimnandezi eenarheni ezi-236. Lokho kutjho bona ngokwesilinganiso omunye nomunye uFakazi usebenzise iimzuzu ema-30 atjhumayela qobe langa. Eminyakeni elitjhumi edlulileko, bakhiqize begodu barhatjha iincwadi zefundo esekelwe eBhayibhilini ezingaphezu kwe-20 bhiliyoni.
NGIKUPHI UKUPHIKISA OKUJAYELEKILEKO? Umlayezo weBhayibhili bewulokhu utjhunyayelwa iinkulungwana zeemnyaka.
UKUPHIKISOKHO KULIQINISO? Kwamambala, abanengi khebatjhumayela okuthileko ngomlayezo weBhayibhili. Nokho, abanengi benze njalo isikhatjhana kwaphela begodu endaweni encani. Ngokuphambene nalokho, aboFakazi BakaJehova baraga ijima lokutjhumayela elihlelekileko, lephasi loke elifikelela iingidi zabantu. AboFakazi bakghodlhelele emsebenzinabo wokutjhumayela naphezu kokuphikiswa ngezinye zeenhlangano ezinamandla nezinelunya kinazo zoke emlandweni wesintu.a (Markosi 13:13) Ngaphezu kwalokho, aboFakazi BakaJehova ababhadalwa bona batjhumayele. Kunalokho, banikela ngesikhathi sabo, begodu iincwadi zabo baphana ngazo simahla. Umsebenzi wabo usekelwa ngokupheleleko ngemnikelo yokuzithandela.
UCABANGANI? “Iindaba ezimnandi zombuso” ziyatjhunyayelwa ephasini loke? Kungenzeka bona ukuzaliseka kwesiporofidwesi kutjho bona kuneenkhathi ezibhedere ezizako?
[Umtlolo waphasi]
a Ukufumana iimniningwana engeziweko qala ama-video amathathu athi, “Faithful Under Trials,” “Purple Triangles,” nethi-“Jehovah’s Witnesses Stand Firm Against Nazi Assault,” asatjalaliswa boFakazi BakaJehova.
[Umkhangiso osekhasini 9]
“Solankana uJehova avuma, sizokuragela phambili sitjhumayela iindaba ezimnandi zoMbuso ngetjiseko, sisebenzisa woke amathuba asivulekeleko ukufikelela abantu.”—INCWADI YONYAKA YOFAKAZI BAKAJEHOVA KA-2010.