Khuyini Okufuze Ifundwe Bantwana?
“Koke okusemtlolweni ocwengileko kwaba khona ngokufunzelelwa ngumoya kaZimu, yeke kulungela ukufundisa nokukhalima nokunqophisa imitjhapho, nokulaya koke malungana nokulunga.”—2 KUTHIMOTHI 3:16.
ABANTWANA kufuze bafundiswe iqiniso ngoZimu. Bangalifundaphi iqiniswelo? Encwadini yekolo ehlonitjhwa khulu ephasini, iBhayibhili.
IBhayibhili injengencwadi evela kuZimu. Encwadini leyo, uZimu uveza ubuntu bakhe begodu unikela neenqophiso zokuziphatha kibo boke abantwabakhe, kokubili abakhulu nabancani. Tjheja ezinye zeemfundiso ezifumaneka eBhayibhilini ngitjho neemfundo abantwana abancani abangazifunda.
Khuyini uZimu afuna siyazi ngaye?
◼ Lokho okufundiswa yiBhayibhili: “Wena ibizo lakho elinguJehova, wena wedwa ungoPhakemeko ephasini loke.”—IRhalani 83:18.
Esikufundako: UZimu akasimamandla athileko anganabizo, kodwana uMumuntu wamambala onebizo elingafani namanye.
◼ Lokho okufundiswa yiBhayibhili: “Ngombana uJehova uhlola zoke iinhliziyo, wazi nakho koke ukutjhigamela kwemicabango. Newumfunako, uzozenza afumaneke kuwe.”—1 IMilando 28:9.
Esikufundako: UJehova uZimu usithanda soke, kuhlanganise nabantwana abancani. (IRhalani 10:14; 146:9) Ufuna sifunde ngaye.
◼ Lokho okufundiswa yiBhayibhili: “Ningatshwenyi . . . intandani. Nekungenzeka niyitshwenye bese iyalila kimi, nakanjani ngizosizwa isililo sayo.”—Eksodosi 22:22-24.
Esikufundako: UJehova ulalela ngitjho neemthandazo yabantwana abancani. Singakhuluma noZimu qobe siveze iimcabango namazizwethu atjhingileko.
◼ Lokho okufundiswa yiBhayibhili: “Ngokuphindaphindiweko bebalinga uZimu, bamzwisa ubuhlungu oCwengileko ka-Israyeli.”—IRhalani 78:41.
Esikufundako: Esikukhulumako nesikwenzako kuyamthinta uJehova, ngalokho-ke kufuze sicabange ngaphambi kobana sikhulume namtjhana senze okuthileko.
Kufuze sibaphathe njani abangafani nathi?
◼ Lokho okufundiswa yiBhayibhili: “Sekuyangikhanyela bona uZimu uphatha boke abantu ngokulingana. Loyo omesabako, enze okulungileko wamukelekile kuye, nanyana angewaliphi itjhaba.”—IZenzo 10:34, 35.
Esikufundako: Nengabe uZimu wamukela abantu bazo zoke iinzinda, kufuze singabandlululi abanye ngebanga lombala wesikhumba sabo namtjhana ukwakheka kobuso obungafani nebethu.
◼ Lokho okufundiswa yiBhayibhili: “Hlalani nikulungele ngaso soke isikhathi ukuphendula loyo onibuza ngethemba eninalo, kodwana lokho nikwenze ngomoya ophasi nangehlonipho.”—1 KaPitrosi 3:15.
Esikufundako: Nesikhuluma ngekolo, kufuze siveze iimbonwethu ngokuqiniseka nangomusa. Kufuze sihloniphe nalabo abaneenkolelo ezingafani nezethu.
Kufuze siwaphathe njani amalunga womndeni?
◼ Lokho okufundiswa yiBhayibhili: “Bantwana, lalelani abazali benu kikho koke, ngombana ngilokho okuthokozisa iKosi.”—KwebeKholose 3:20.
Esikufundako: Abantwana abalalelako abatjengisi bona bathanda ababelethi babo kwaphela, kodwana nokobana bafuna ukuthabisa uZimu.
◼ Lokho okufundiswa yiBhayibhili: ‘Ninyamezelelane, nilibalelane nengabe omunye ukhube omunye, njengombana [uJehova] anilibalela, nani-ke yenzani njalo.’—KwebeKholose 3:13.
Esikufundako: Abanye abantu, kuhlanganise namalunga weemndenethu, bazosidanisa ngezinye iinkhathi. Kodwana nengabe sifuna uZimu asilibalele, kufuze sifunde ukulibalela abanye.—Matewu 6:14, 15.
Kubayini kufuze sithembeke begodu sibe nomusa?
◼ Lokho okufundiswa yiBhayibhili: “Yeke lisani amanga, nikhulume iqiniso komunye nomunye.”—Kwebe-Efesu 4:25.
Esikufundako: Nesikhuluma iqiniso, silingisa uZimu begodu simenza athabe. Nesiba nomukghwa wokukhuluma amanga, siba njengenaba lakaZimu, uDeveli, ‘onguyise lamanga.’—Jwanisi 8:44; KuTitosi 1:2.
◼ Lokho okufundiswa yiBhayibhili: “Phathani abanye ngendlela enifuna baniphathe ngayo.”—Matewu 7:12, “Contemporary English Version.”
Esikufundako: Kufuze sicabangele amazizo, iimcabango neentlhogo zamalunga womndenethu nabanye emphakathini esiphila kiwo. Nesitjengisa ‘ithando,’ kanengi abanye nabo bazosiphatha ngomusa.—1 KaPitrosi 3:8; Luka 6:38.
Njengombana iimbonelwezi zitjengisa, iimfundo eziseBhayibhilini zingasiza abantwana bona babe ngabathokozako, abanehlonipho begodu babe babantu abadala abanesirhawu. Kodwana ngubani okufuze afundise abantwana iimfundwezi?