Ngubani Okufuze Afundise Abantwana NgoZimu?
“Akakho umfundi omkhulu kunomfundisi wakhe, kodwana woke umfundi lokha nesele afundileko watjhutjhuluza uzaba njengomfundisi wakhe.”—LUKA 6:40.
ABANYE ababelethi bazizwa bangakufanelekeli ukufundisa abantwababo ngoZimu. Bangacabanga bona abakafundi ngokwaneleko namtjhana abazi okwaneleko ngekolo bona babe bafundisi abahle. Ngalokho, bangatjhiyela umthwalo oqakathekileko lo esihlobeni namtjhana kubadosiphambili bekolo.
Nokho, ngubani okufanelekela ngcono ukufundisa abantwana iqiniso ngekolo nangeenkambisolawulo zokuziphatha? Cabangela lokho okutjhiwo yiBhayibhili ngendaba le, bese ukumadanisa nalokho abarhubhululi abakufumeneko.
Iyini Indima Kababa?
Lokho okufundiswa yiBhayibhili: “Bobaba, ningabasilingi abantwabenu, kodwana bakhuliseni ngokubandula nesiluleko seKosi.”—Kwebe-Efesu 6:4, “Holman Christian Standard Bible.”
Lokho okufunyenwe barhubhululi: Abobaba bazuza njani nengabe bakhe ikholo eliqinileko ngekolo? Isihloko esithi, Fathers’ Religious Involvement and Early Childhood Behavior, esagadangiswa ngo-2009, sathi: “Ukubandakanyeka emphakathini wekolo kungasiza amadoda bona abe bobaba abangcono. Ikolo isekela umuntu ngamunye begodu imlawule, imnikele iimfundiso neenqophiso zendlela okufuze aphile ngayo.”
IBhayibhili igandelela ukuqakatheka kwendima kababa ekukhuliseni nekubanduleni abantwana. (Iziyema 4:1; KwebeKholose 3:21; KumaHebheru 12:9) Kodwana isilulekweso siqakathekile namhlanje? Ngo-2009 iYunivesithi yeFlorida yagadangisa isihloko ebesikhuluma ngomthelela abobaba abanawo ebantwaneni babo. Abarhubhululi bafumene bona abantwana abanabobaba ebebazibandakanye ngokuzeleko ekukhuleni kwabo kanengi baba nesirhawu nokuzithemba. Abasana akusikanengi baziphatha kumbi, begodu abantazana kanengi baphila kuhle engqondweni. Kwamambala, isiluleko seBhayibhili sisaqakathekile.
Iqakatheke Kangangani Indima Kamma?
Lokho okufundiswa yiBhayibhili: “Ungawutjhiyi umthetho kanyoko.”—Iziyema 1:8.
Lokho okufunyenwe barhubhululi: Ngo-2006 i-Handbook of Child Psychology yathi: “Ngesilinganiso, abomma baba nesikhathi esima-65% nesima-80% ngaphezu kwaleso abobaba ababa naso ekunqophiseni umntwana ngamunye, begodu isilinganisweso siyafana eenarheni ezinengi.” Banesikhathi esingako, ikulumo kamma, izenzo nendlela aziphatha ngayo inomthelela omkhulu ekukhuleni komntwana.
Abomma nabobaba nebasebenza ndawonye ekufundiseni abantwababo ngoZimu, babanikela okunganani izipho eembili eziligugu. Kokuthoma, abantwana bathola ithuba lokwakha ubuhlobo noBababo osezulwini, ubuhlobo obuzobazuzisa ukuphila kwabo koke. Kwesibili, abantwana bafunda ngesibonelo bona indoda nomfazi kufuze babambisane njani ukufikelela iimnqopho eqakathekileko. (KwebeKholose 3:18-20) Nanyana abanye bangakghona ukusiza ubaba nomma, kodwana babelethi abanomthwalo wokufundisa abantwababo ngoZimu nangendlela uZimu afuna umndeni ubambisane ngayo.
Nokho, ababelethi kufuze babafundise njani abantwababo? Ngiziphi iindlela ezingasebenza ngcono?