“Duduza Boke Abalilako”
“UJehova ungizesile . . . bona ngiduduze boke abalilako.”—ISA. 61:1, 2.
1. Khuyini uJesu ayenzela abalilako, begodu kubayini?
UJESU KRESTU wathi: “Ukudla kwami kukwenza intando yongithumileko, nokuqeda umsebenzi anginikele wona bona ngiwenze.” (Jwa. 4:34) Nekenza isabelo sakhe asinikelwe nguZimu, uJesu watjengisa iimfanelo ezihle zakaYise. Iimfanelwezo zihlanganisa ithando lakaJehova elikhulu ngabantu. (1 Jwa. 4:7-10) Umpostoli uPowula wakhuluma ngenye indlela uJehova alitjengisa ngayo ithando nekamhlathulula ‘njengoZimu okuvela kuye yoke induduzo!’ (2 Kor. 1:3) UJesu watjengisa ithando elinjalo nekenza lokho okwabikezelwa esiporofidweni saka-Isaya. (Funda u-Isaya 61:1, 2.) UJesu wafunda isiporofidweso esinagogeni leNazareda begodu wawaqalisela kuye amezwaso. (Luka 4:16-21) Hlangana nekonzwakhe yoke, uJesu ngethando waduduza abalilako, wabanikela isikhuthazo nokuthula kwengqondo.
2, 3. Kubayini abalandeli bakaKrestu kufuze bamlingise ekududuzaneni?
2 Boke abalandeli bakaJesu kufuze bamlingise ngokududuza abalilako. (1 Kor. 11:1) UPowula wathi: “Nje-ke khuthazanani nakhane ngamunye ngamunye, njengombana nisenza.” (1 Tes. 5:11) Kufuze siduduze abanye khulukhulu njengombana abantu namhlanjesi baqalene ‘neenkhathi ezibudisi kwamambala.’ (2 Thi. 3:1) Kanengi, abantu abathembekileko ephasini mazombe batlhoriswa ngilabo abanamezwi nezenzo ezibangela isizi, nokudana.
3 Njengombana isiporofido seBhayibhili sabikezela, emihleni yokuphela kwephasi elimbeli, abanengi “bayokurhubhela ngeenkhwanyeni zabo, bayorhuluphela imali, bazikhukhumeze, bazigqaje, bahlambalaze, banyaze abazali babo, kuzakuba khona abangathokozi bangabinandaba nalokho okucwengileko, kube khona abanganathando, nabangavumi ukubuyisana, kube khona nabahlebako, nabangakgoni ukuzibamba, nabagebengako, nabahloya okuhle, kuyoba khona abakgaphela abanye, nabawalazelako, nabazikganisako, nabathanda injabulo kunokobana bathande uZimu.” Ukuziphatha okunjalo kwanje kudlulele khulu kunangaphambili, ngombana ‘abantu abenza okumbi nabakhohlisako baragele phambili ebumbini bakhohlisana.’—2 Thi. 3:2-4, 13.
4. Esikhathini sethu kwenzakaleni ngobujamo bephasi?
4 Koke lokhu akukafuzi kusirare, njengombana iLizwi lakaZimu likwenze kwakhanya bona “iphasi loke lisemandleni wokhohlakeleko.” (1 Jwa. 5:19) Amezwi athi, “Iphasi loke” ahlanganisa zepolotiki, zekolo, zokurhwebelana, ngitjho nemizila yokurhatjha iinkulumo ezimamala. Ngaphandle kokuzaza, uSathana uDeveli ubizwa kufanele ngokobana “umbusi wephaseli” ‘nosingazimu wephasi.’ (Jwa. 14:30; 2 Kor. 4:4) Ubujamo bephasi buragela phambili buba bumbi khulu ngombana uSathana ukwate khulu, uyazi bona usalelwe sikhathi esifitjhani ngaphambi kobana uJehova amtjhabalalise. (ISam. 12:12) Qala bona kududuza kangangani ukwazi bona ukukghodlhelelela kwakaZimu uSathana nephasi lakhe elimbi msinyana kuzokuphela, nepikiswano emalungana nobukhosi bakaJehova ilungiswe!—Gen., isahl. 3; Job, isahl. 2.
Iindaba Ezimnandi Zitjhunyayelwa Ephasini Mazombe
5. Sizaliseka njani isiporofido esimalungana nomsebenzi wokutjhumayela emihleni yokuphela le?
5 Hlangana nesikhathi esibudisesi emlandweni wabantu, kuzaliseka lokho uJesu akubikezelako. Wathi: “Iindaba ezimnandi ngombuso kaZimu zizatjhunyayelwa ephasini loke, kube bufakazi eentjhabeni zoke.” (Mat. 24:14) Umsebenzi wokufakaza ngoMbuso kaZimu wephasi mazombe wenziwa ngezinga elikhulu. Namhlanjesi, aboFakazi BakaJehova abangaphezu kwe-7 500 000 emabandleni engaphezu kwe-107 000 ephasini loke, batjhumayela ngoMbuso kaZimu, njengombana uJesu akwenza isihloko sokutjhumayela nokufundisa kwakhe. (Mat. 4:17) Ngomsebenzi wokutjhumayela wagadesi, abalilako banikelwa induduzo ekulu. Qala bona eemnyakeni eembili yamva, kwabhabhadiswa abantu abangaba zi-570 601 njengaboFakazi BakaJehova!
6. Ucabangani ngokwanda komsebenzi wethu wokutjhumayela?
6 Izinga elikhulu umsebenzi lo owenziwa ngalo lingabonakala ngokulemuka bona kwanje aboFakazi BakaJehova batjhugulula begodu basabalalise iincwadi ezisekelwe eBhayibhilini ngeenlimi ezingaphezu kwa-500. Zange kheyibonwe into enjengale emlandweni wesintu! Ukuba khona kwengcenye esephasini yehlangano kaJehova, umsebenzi, nokwanda kwayo kurara kwamambala. Ngaphandle kwesinqophiso nesizo lomoya ocwengileko kaZimu onamandla, bekungeze kwenzeka into efana nale ephasini elilawulwa nguSathaneli. Ngombana iindaba ezimnandi zitjhunyayelwa ephasini mazombe, induduzo evela eMitlolweni kwanje ayithatjelwa ngesikholwa nabo kwaphela kodwana nangilabo abalilako abamukela umlayezo woMbuso.
Ukududuza Esikholwa Nabo
7. (a) Kubayini singekhe silindele uJehova bona asuse boke ubujamo obusigandelelako nje? (b) Sazi njani bona singakghona ukukghodlhelela itjhutjhiso neentlayiseko?
7 Ephasineli elizele ubumbi nokutlhaga, siyaqiniseka bona sizokuqalana nobunye ubujamo obungasibangela ukugandeleleka. Ngeze silindele bona uZimu asuse yoke iimthombo yokungathabi namtjhana isizi ngaphambi kobana atjhabalalise iphaseli. Njengombana siqalana netjhutjhiso elibikezelweko, ukuthembeka kwethu kuJehova njengabasekeli bobukhosi bakhe bendawo yoke kusengozini. (2 Thi. 3:12) Nokho, ngokusizwa nangokududuzwa nguBabethu wezulwini, singaba njengamaKrestu azesiweko weTesalonika yekadeni, atjengisa ukukghodlhelela nekholo nekaqalane netjhutjhiso neentlayiseko.—Funda 2 KwebeTesalonika 1:3-5.
8. Ngibuphi ubufakazi obungokoMtlolo bokobana uJehova uyaziduduza iinceku zakhe?
8 Akunakuzaza bona uJehova unikela iinceku zakhe induduzo eziyitlhogako. Ngokwesibonelo, ukuphila komporofidi u-Elija nekusongelwa yiNdlovukazi engakalungi uJezebheli, umporofidi loyo waphelelwa sibindi wabaleka, watjho ngitjho nokobana ufuna ukufa. Kodwana kunokusola u-Elija, uJehova wamduduza wamnikela nesibindi sokwenza umsebenzi wakhe njengomporofidi. (1 Amakh 19:1-21) Bona uJehova ududuza abantu bakhe kungabonakala godu kokuhlangabezanwe nakho kwebandla lamaKrestu langekhulu lokuthoma leemnyaka. Ngokwesibonelo, sifunda ngesikhathi lapho “ibandla loke leJudiya, leGaleliya neleSamariya laba nokuthula, lakhiwa.” Ngaphezu kwalokho, “ngokusaba iKosi landa ngokuqiniswa ngumoya ocwengileko.” (IZe. 9:31) Qala bona nathi kusithabisa kangangani ukwazi bonyana ‘siqiniswa mumoya ocwengileko’!
9. Kubayini ukufunda ngoJesu kungaba yinduduzo kithi?
9 NjengamaKrestu, siyaduduzeka ngokufunda ngoJesu Krestu nangokukhamba eemtlhalenakhe. UJesu wathi: “Yizani kimi, nina noke enidiniweko ekuthwaleni imithwalo ebudisi, ngizoniphumuza. Thathani ijogi lami nilithwale, nifunde kimi, ngombana ngilungile ngizithobile emoyeni; nizafumana ukuphumula. Ngombana ijogi engizaninikela lona libulula, nomthwalo engizanithwesa wona awudisibezi.” (Mat. 11:28-30) Ukufunda ngendlela kaJesu eyakhako yokuphatha abantu bese silandele isibonelo sakhe esihle, lokho ngokwakho kulisizo elikhulu ekwehliseni ukugandeleleka okungenzeka siqalane nakho.
10, 11. Ebandleni, bobani abangakghona ukunikela induduzo?
10 Godu singaduduzwa maKrestu esikunye nawo. Ngokwesibonelo, cabangela indlela abadala ebandleni abasiza ngayo labo abaqalane nobujamo obugandelelako. Umfundi uJakobosi watlola: ‘Ukhona ogulako [ngokomoya] hlangana nani na? Akabize amadoda amadala webandla, amthandazele.’ Kube namuphi umphumela? “Umthandazo wokukholwa uzamphilisa ogulako, iKosi imvuse, namtjhana enze izono, uzalitjalelwa izono zakhe.” (Jak. 5:14, 15) Amanye amalunga webandla nawo anganikela induduzo.
11 Abafazi kanengi bakufumana kulula ukukhuluma nabanye abafazi ngeemraro ehlukahlukeneko. Khulukhulu abodade asele bakhulile, abanokuhlangabezanwe nakho okunengi banganikela abodade abasesebancani iinluleko ezihle. Abafazaba abamaKrestu asele bakhulile abavuthiweko kungenzeka kheba qalana nobujamo obufanako ekuphileni kwabo. Isirhawu sabo neemfanelo zabo njengabantu bengubo zingaba lisizo elikhulu. (Funda KuTitosi 2:3-5.) Kwamambala, abadala nabanye kufuze ‘babaqinise isibindi abaphelelwe mamandla emoyeni.’ (1 Tes. 5:14, 15) Godu kuhle ukukhumbula bona uZimu ‘kikho koke ukutshwenyeka esinakho uyasisiza, ze nathi sikwazi ukusiza abanye ngayo indlela leyo esasizwa sakhuthazwa ngayo.’—2 Kor. 1:4.
12. Kubayini kuqakathekile ukuya emihlanganweni yobuKrestu?
12 Indlela eqakathekileko yokufumana induduzo kukuba khona emihlanganweni yobuKrestu, lapho iingcoco zeBhayibhili zisikhuthaza khona. Sifunda bona uJudasi noSilasi “bakhuluma isikhathi eside nabazalwane, babaqinisa isibindi namandla.” (IZe. 15:32) Ngaphambi nangemva kwemihlangano, kuba neengcoco ezakhako hlangana kwamalunga webandla. Ngalokho ngitjho nanyana sitlhaga ngebanga lobujamo obugandelelako, asingazihlukanisi nabanye, ngombana ukwenza njalo ngeze kulungise indaba. (Iziy. 18:1) Kunalokho, senza kuhle ukulandela isiluleko sakampostoli uPowula esiphefumulelweko esithi: “Asitjhejaneni sikhuthazane bona sibe nethando, senze imisebenzi emihle. Kukhona abanye abajayele ukungezi emabandleni, asingabalingisi labo; kunalokho asikhuthazane bona siye ekonzweni, khulukazi ngombanyana nani niyabona bonyana isuku lokubuya kweKosi uJesu liyabandamela.”—Heb. 10:24, 25.
Fumana Induduzo ELizwini LakaZimu
13, 14. Tjengisa indlela iMitlolo engasiduduza ngayo.
13 Kungakhathaliseki bona simaKrestu abhabhadisiweko namtjhana sisand’ ukuthoma ukufunda ngoZimu nangomqophwakhe, singafumana induduzo ekulu eLizwini lakaZimu elitloliweko. UPowula watlola: “Koke okwatlolwako ngaphambilini kwatlolelwa ukusifundisa, ze kuthi ngokunyamazela esinakho, ngebanga lalokho esikufundako eMitlolweni ecwengileko, nangokukhuthazwa ngiyo sibe nethemba.” (Rom. 15:4) IMitlolo eCwengileko ingasiduduza begodu isenze ‘sifaneleke, sikulungele ukwenza yoke imisebenzi emihle.’ (2 Thi. 3:16, 17) Ukwazi iqiniso ngomqopho kaZimu nokuba nethemba lamambala ngengomuso ngokuqinisekileko kuzokunikela induduzo ekulu. Ngalokho, akhe silisebenzise ngokuzeleko iLizwi lakaZimu neencwadi ezisekelwe eBhayibhilini ezingasiduduza begodu zisizuzise ngeendlela ezinengi.
14 UJesu wasibekela isibonelo ngokusebenzisa iMitlolo ukunqophisa nokusiza abanye. Ngokwesibonelo, hlangana nesinye seenkhathi abonakala ngazo ngemva kokuvuswa kwakhe, ‘wahlathulula iMitlolo’ kubafundi bakhe ababili. Njengombana akhuluma nabo, iinhliziyo zabo zathinteka kwamambala. (Luka 24:32) Alingisa isibonelo sakaJesu esihle khulu, umpostoli uPowula ‘wabonisana nabantu ngeMitlolo.’ EBheriya, abantu egade bamlalele “balalelisisa umlayezo ngokuzimisela okukhulu kwamambala, begodu bekuthi woke malanga bafunde iMitlolo.” (IZe. 17:2, 10, 11) Qala bona kufaneleka kangangani bona sifunde iBhayibhili qobe, sizuze kilo neencwadini zobuKrestu ezenzelwe ukusinikela induduzo nethemba eenkhathini ezibudisezi!
Iindlela Ezingeziweko Zokududuza Abanye
15, 16. Ngiziphi ezinye izinto esingazenza ukusiza nokududuza amaKrestu esikunye nawo?
15 Singasiza begodu siduduze amaKrestu esikunye nawo ngeendlela ezihlukahlukeneko. Ngokwesibonelo, singayela abantu abalupheleko namtjhana esikholwa nabo abagulako evikilini. Singasiza abanye ngeemsebenzi yabo, sibatjengise bona sinekareko yomuntu mathupha kibo. (Fil. 2:4) Mhlamunye singababuka abakhulekeli esikunye nabo ngeemfanelo zabo ezihle ezinjengethando, ukunikela iinluleko ezihle, isibindi nekholo.
16 Nesilinga ukududuza abalupheleko, singabavakatjhela sibalalele ngesineke nebasitjela okuhlangabezanwe nakho kwabo neembusiso abazifumana ngokuba sekonzweni kaJehova. Qala bona lokhu kungasikhuthaza begodu kusiduduze kangangani! Singafunda nalabo esibavakatjheleko iBhayibhili namtjhana iincwadi ezisekelwe eBhayibhilini. Mhlamunye singakhuluma ngesihloko esifundwa nje seSifundo SeSithalasokulinda saqobe veke nofana indaba ezokufundwa eSifundweni SeBhayibhili Sebandla sangeveke leyo. Singabukela nabo iDVD engokoMtlolo. Godu singafunda namtjhana silandise okuhlangabezanwe nakho okukhuthazako okufumaneka eencwadini zethu.
17, 18. Njengeenceku zakaJehova ezithembekileko, kubayini singaqiniseka bona uzosisekela begodu asiduduze?
17 Nesilemuka bona umkhulekeli kaJehova esikunye naye utlhoga ukutjhiriywa, singamfaka eemthandazweni yethu yangemsitheleni. (Rom. 15:30; Khol. 4:12) Njengombana siqalana neemraro yokuphila begodu siyifuna kwamambala induduzo yabanye, singaba nekholo nokuqiniseka okufana nekomrhalani owabhina: “Phosa umthwalwakho phezu kwakaJehova, begodu yena uzakusiza. Ngeze avumele olungileko asikinyeke.” (Rha. 55:22) Kwamambala, uJehova uzokuhlala akhona bona asiduduze begodu asisekele njengeenceku zakhe ezithembekileko.
18 UZimu watjela abakhulekeli bakhe bekadeni: “Mina—mina nginguye oniduduzako.” (Isa. 51:12) UJehova uzosenzela okufanako begodu uzokubusisa izenzo namezwethu njengombana siduduza abalilako. Kungakhathaliseki bona sinethemba lezulwini namtjhana lephasini, ngamunye wethu angaduduzwa mamezwi kaPowula awatlolela amaKrestu azeswe ngomoya akunye nawo: ‘Sengathi iKosi yethu uJesu Krestu noZimu, uBaba wethu osithandako, owathi ngesisa sakhe wasipha ukuthula nethemba eliqinileko, sengathi anganikhuthaza aniphe amandla, ze nenze, nikhulume okulungileko.’—2 Tes. 2:16, 17.
Uyakhumbula?
• Urhatjheke kangangani umsebenzi wethu wokududuza abalilako?
• Ngiziphi ezinye izinto esingazenza ukududuza abanye?
• Ngibuphi ubufakazi obungokoMtlolo bokobana uJehova ududuza abantu bakhe?
[Isithombe ekhasini 28]
Uyahlanganyela ekududuzeni abalilako?
[Isithombe ekhasini 30]
Kokubili abancani nabakhulu bangaba sikhuthazo