Kunendaba Na Ukufumana Ipendulo?

“Bengineemnyaka elitjhumi nengithoma ukukhamba nabasana. Ekuthomeni, besibambana ngezandla simangana. Nokho, kungasikade sathoma ukuthintana izitho ezifihlwako bese sathoma ukuziphatha kumbi ngokomseme ngeendlela ezihlukahlukeneko. Nengineemnyaka eyi-15, ngathoma ukusebenza begodu ngatjhelwa madoda engisebenza nawo egade afuna ukulala nami. Bengifuna ukuba nesibindi ngenze nanyana yini eyenziwa babantu engisebenza nabo. Bengifuna abantu engisebenza nabo bangamukele, lokho kwangenza bona ngilinge ubuhlobo bomseme ngeendlela ezihlukahlukeneko.”—USARAH,a WE-AUSTRALIA.

KUNGAKURARA na ukwazi bona uSarah wakhulela ekhayeni elikhonza uZimu? Ababelethi bakhe balinga ukumkhulisa bona aphile ngeenkambisolawulo zeBhayibhili zokuziphatha okuhle. Kodwana uSarah wakhetha indlela ehlukileko.

Abanengi bangavumelana nokukhetha kwakaSarah. Bakholelwa bona umbono weBhayibhili malungana nomseme uphelelwe sikhathi. Abanye abakuboni ukuphikisana emntwini othi ulikholwa kodwana oragela phambili enza izinto azithandako ngokomseme.

Kunendaba na ukwazi nokuphila ngalokho iBhayibhili ekufundisako ngomseme? IBhayibhili ithi ‘iphefumulelwe nguZimu, yeke ilungele ukufundisa.’ (2 KuThimothi 3:16) Nengabe uyakholelwa bona uZimu wabumba abantu nokobana iBhayibhili iliLizwi lakhe eliphefumulelweko, ngalokho ukwazi lokho elikutjhoko ngendaba le kuqakathekile.

Ngokudanisako, abanengi bahlangahlangene ngalokho iBhayibhili ekufundisako ngomseme. Abadosiphambili bekolo abathi bahlonipha iBhayibhili bathuthukisa iimbono ephikisanako. Eqinisweni, indaba le ihlukanise amasondo amanengi amakhulu.

Kunokobana ukholelwe kilokho abanye abakutjhoko, kubayini ungasebenzisi iimzuzu embalwa bona uzihlolele ngokwakho indaba le? Isihloko esilandelako siphendula iimbuzo elitjhumi evame ukubuzwa malungana nombono weBhayibhili ngomseme. Esihlokweneso uzokufumana iimpendulo ezithembekileko ezisekelwe kilokho okufundiswa yiBhayibhili kwamambala. Isihloko sokugcina emlandelandeni lo sizokutjengisa bona kubayini ukukhetha esikwenzako kunendaba.

[Umtlolo waphasi]