Ukumadanisa Okulisizo Ongakwenza Epilwenakho

Inga-kghani uzithatha njengomuntu omKrestu? Nakunjalo, uphakathi kwabantu angaphezu kweengidigidi ezimbili ephasini mazombe—pheze munye kwabathathu—nabo abazibiza ngabalandeli bakaKrestu. Namhlanjesi kunamasondo azinkulungwana, nawo aziwa ngamasondo wobuKrestu. Nanyana kunjalo, ayatjhayisana ngokweemfundiso begodu awaqali izinto ngendlela efanako. Kodwana wena ungakholwa okuhlukileko okungafani nekwabanye abathi bamaKrestu. Kghani kuqakathekile lokho okukholelwako? Iye, kuqakathekile—nange ufuna ukwenza lokho iBhayibheli elikutjhoko ngomuntu omKrestu.

Abalandeli bakaJesu Krestu bokuthoma bebaziwa ngokuthi “maKrestu.” (IzEnzo 11:26) Bekungatlhogeki amanye abizo azobahlathulula ngombana bekungibo bodwa amaKrestu ebekakhona ngesikhatheso. AmaKrestu la ngokubumbana, alandela iimfundiso nemithetho eyasungulwa nguJesu Krestu. Kuthiwani ngesondo lakho? Uyaqiniseka na bona isondo lakho lifundisa lokho uKrestu akufundisako nalokho abalandeli bakaKrestu bokuthoma ebebakukholelwa? Ungalazi njani iqiniso endabeni le? Yinye kwaphela indlela ongazi ngayo—kusebenzisa iBhayibheli njengesimadaniso.

Cabanga nganaku: UJesu Krestu bekanehlonipho edephileko ngemiTlolo njengombana ililiZwi lakaZimu. Bakangavumalani nabanyefisa iimfundiso zeBhayibheli ngokuthi babeke iinkolelo zabantu ngaphambili. (Markosi 7:9-13) Ngalokho singaphetha kuhle ngokuthi abalandeli bakaJesu bazokusekela iinkolelo zabo eBhayibhelini. Nakunjalo, umKrestu wenza kuhle ngokuzibuza ukuthi, ‘Iimfundiso zesondo lami ziyavumelana na neBhayibheli?’ Ukuthi uphendule umbuzo lo, kubayini ungamadanisi lokho okufundiswa lisondo lakho nalokho okufundiswa yiBhayibheli?

UJesu wathi labo abathandaza uZimu kufuze bamthandaze ngeqiniso, begodu iqiniso lifumaneka eBhayibhelini. (Jwanisi 4:24; 17:17) Umpostoli uPowula yena wathi isindiso isekutheni sifikelele “elwazini leqiniso.” (1 Thimothi 2:4) Ngalokho kuqakatheke khulu bona sisekele iimfundiso zethu eqinisweni leBhayibheli. Kubayini ukusindiswa kwethu kuqakatheke kangaka!

INDLELA YOKUMADANISA ESIKUKHOLWAKO NEBHAYIBHELI

Sikubawa bona ufunde imibuzo esithandathu ekhambisana nesihlokwesi, uyelele iimpendulo zeBhayibheli naliphendulako. Qala namezwi weBhayibheli adzujuliweko, uzindle nagempendulo zakhona. Bese uzibuze ukuthi, ‘zinjani iimfundiso zesondo lami nazimadaniswa nalokho okutjhiwo yiBhayibheli?’

Imibuzo nempendulwezi zingakusiza wenze ukumadanisa okulisizo okhe wakwenza epilwenakho. Uyafuna na ukumadanisa okhunye okufundiswa lisondo lakho nalokho okutjhiwo yiBhayibheli? AboFakazi bakaJehova bangakuthokozela ukukusiza ukuthi uhlolisise amaqiniso weBhayibheli. Kubayini ungabawi omunye wabo akuragele isifundo seBhayibheli sasimahla? Namkha ungavakatjhela izinzolwazi lethu, ku-jw.org.

1 UMBUZO: Ngubani uZimu?

IPENDULO: UJehova, ubaba kaJesu, nguZimu wanini nanini begodu unguSomandla uMdali wakho koke.

OKUTJHIWO YIBHAYIBHELI:

“Sihlala simthokoza njalo uZimu, uYise weKosethu uJesu Krestu, nasinithandazelako.”—Kolose 1:3.

“Ufanele wena [“Jehova,” NW] Zimethu, ukwamukela idumo, ubukhosi namandla ngombana nguwe owabumba koke begodu koke okukhona kwadalwa ngentando yakho.”—IsAmbulo 4:11.

Qala namaRoma 10:13; 1 Thimothi 1:17.

2 UMBUZO: Ngubani uJesi Krestu?

IPENDULO: UJesu lizibulo lakaZimu. UJesu wadalwa, ngikho anesithomo. UJesu uyazithoba kuZimu begodu wenza nentando Yakhe.

OKUTJHIWO YIBHAYIBHELI:

“UBaba mkhulu kunami.”—Jwanisi 14:28.

“UKrestu umfanekiso wakaZimu ongabonakaliko, ulizibulo lakho koke okubunjiweko.”—Kolose 1:15.

Qala uMatewu 26:39; 1 Korinte 15:28.

3 UMBUZO: Uyini umoya ocwengileko?

IPENDULO: Umoya ocwengileko umamandla kaZimu lawo awasebenzisela ukwenza intando yakhe. Awusimumuntu. Abantu bona bangaba nomoya ocwengileko bewubaphe namadla.

OKUTJHIWO YIBHAYIBHELI:

“Kwathi bona u-Elisabethi ezwe ukulotjhisa kwakaMariya, umntwana weqayeqa ngesibelethweni sakhe. U-Elisabethi wazaliswa ngoMoya oCwengileko.”—Lukasi 1:41.

“Nizakwamukela amandla lokha uMoya oCwengileko nasele wehlele phezu kwenu.”—IzEnzo 1:8.

Qala noGenesisi 1:2; IzEnzo 2:1-4; 10:38.

4 UMBUZO: Uyini umBuso kaZimu?

IPENDULO: UmBuso kaZimu ungurhulumende wezulwini. UJesu uyiKosi yomBuso kaZimu. Esikhathini esingaphelisi ihliziyo umBuso lo uzokubangela ukuthi ephasini loke kwenziwe intando kaZimu.

OKUTJHIWO YIBHAYIBHELI:

“Nje-ke ingolozi yekhomba yavuthela ipalapala yayo, kwezwakala amezwi ahlokomako ezulwini asithi: ‘Umbuso wephasi sewuphenduke umbuso [“kaJehova,” NW] nowakaKrestu begodu uzakubusa nini nanini.’”—IsAmbulo 11:15.

Qala noDanyela 2:44; Matewu 6:9, 10.

5 UMBUZO: Kghani boke abantu abalungileko baya ezulwini?

IPENDULO: Awa. Isiqhenyana sabantu abathembekileko esibizwa ngokuthi “mhlanjana omncani”, esikhethwe nguZimu ngiso esiya ezulwini. Bayokubusa noJesu njengamakhosi kilo loke iphasi.

OKUTJHIWO YIBHAYIBHELI:

“Ningesabi nina mhlanjana omncani ngombana uYihlo kwamthokozisa khulu ukunipha umbuso.”—Lukasi 12:32.

“Bayokuba baphristi bakaZimu nebakaKrestu begodu bayokubusa naye.”—IsAmbulo 20:6.

Qala nesAmbulo 14:1, 3.

6 UMBUZO: UZimu uhloseni ngephasi nabantu?

IPENDULO: Ngaphasi komBuso kaZimu, iphasi loke lizokuba yipharadesi nabantu abathembekileko bazokuthabela ipilo epheleleko, ukuthula kwanini nanini nepilo enganakufa.

OKUTHJIWO YIBHAYIBHELI:

“Abathobekileko bazakuzuza inarha, bathabele ukuthula okukhulu.”—IRhubo 37:10, 11.

“Uzokwesula zoke iinyembezi emehlwenabo. Ukufa angekhe kusaba khona, ngitjho nokulila nobuhlungu angekhe kusaba khona ngombana izinto zokuthoma zidlulile.”—IsAmbulo 21:3, 4.

Qala IRhubo 37:29; 2 Pitrosi 3:13.