IBhayibheli—Limthombo Othembekileko Weqiniso
Kiwo woke umlando, abantu abahlukahlukeneko bakholelwa ukuthi iBhayibheli limthombo othembekileko weqiniso. Namhlanjesi, iingidigidi zabantu zilandela ifundiso yalo. Nanyana kunjalo, kunabanye abathi iBhayibheli alikaqakatheki namkha yincwadi yeenolwana. Uthini umbonwakho? Kghani singalifumana iqiniso eBhayibhelini?
KUBAYINI KUFUZE SILITHEMBE IBHAYIBHELI?
Khuyini engakwenza ulithembe iBhayibheli? Ngokwesibonelo: Kubulula ukuthemba umngani ohlala akutjela iqiniso. Kghani iBhayibheli lifana nomngani othembekileko, ohlala akutjela iqiniso? Tjheja iimbonelo nanzi.
Abatloli Abaneqiniso
Abatloli beBhayibheli bebahlala bakhuluma iqiniso, kanengi bakhuluma ngemitjhaphwabo nangobuthakathaka babo. Ngokwesibonelo, umphorofidi uJona watlola ngokungalaleli kwakhe. (Jona 1:1-3) Waphetha incwadakhe ngokuveza indlela uZimu amkhalima ngayo kodwana akhenge atjho litho ngokulungisa indlelakhe yokucabanga. (Jona 4:1, 4, 10, 11) Ukuthembeka kwabatloli beBhayibheli kutjengisa ukuthi bebalithanda iqiniso.
Iseluleko SeBhayibheli Siyasebenza
Kghani iBhayibheli lihlala lisinikela iseluleko esisebenzako? Iye. Ngokwesibonelo, tjheja bona lithini ngokuba nobuhlobo obuhle nabanye: “Zoke izinto enifuna abantu bazenze kini, nani kufuze nizenze kibo.” (Matewu 7:12) “Ipendulo ethobekileko idambisa itukuthelo, kodwana ilizwi elihlabako livusa ilaka.” (IzAga 15:1) Kwamambala, kusukela ngelanga elatlolwa ngalo iBhayibheli lisasebenza nanamhlanjesi.
Umlando Weqiniso
Eminyakeni eminengi eyadlulako inengi labarhubhululi lifumane ukuthi ukuba khona kwemihlobohlobo yabantu nezenzakalo eziliqiniso kukhulunywa ngazo eBhayibhelini. Ngokwesibonelo, cabanga ngobufakazi bemininingwana engakaqakatheki kangako. IBhayibheli lithi ngesikhathi sakaNerhemiya, abantu beTirosi (abantu beFunisiya abavela eTirosi) ebebahlala eJerusalema ‘baletha ihlambi kanye nayo yoke imihlobohlobo yepahla ethengiswako.’—Nerhemiya 13:16.
Kghani bukhona ubufakazi obusekela iveseli? Iye, abarhubhululi bafumana izinto zeFunisiya kwa-Israyeli, okutjho ukuthi iintjhabezi bezithengiselana. Ngaphezu kwalokho, eJerusalema, abarhubhululi bafumana iinsalela zefesi yeMediterra. Bakholelwa ukuthi ifesi le yeza nabathengisi abavela kude magega nelwandle. Ngemva kokuhlolisisa ubufakazi, esinye isazi saphetha ngokuthi: “Amezwi akuNerhemiya 13:16 athi abantu beTirosi bebathengisela beJerusalema ifesi bekaliqiniso.”
Iqiniso Lesayensi
Ngokuyihloko iBhayibheli liyincwadi yekolo neyomlando. Kodwana nalikhuluma ngeendaba zesayensi, livumelana kuhle nesayensi. Tjheja isibonelo nasi.
Pheze eminyakeni ezii-3 500 eyadlulako, iBhayibheli lathi iphasi lilenga “phezu kwelize.” (Jobho 26:7) Lokhu kuhluke khulu kilokho okwatjhiwo ziinolwana ukuthi iphasi lithaya phezu kwamanzi namkha libanjwe yikghuru ekulu. Pheze ngemva kweminyaka eyi-1 100 incwadi kaJobho itloliwe, abantu baragela phambili bakholelwa ukuthi akukghonakali bona iphasi lilenge emmoyeni, kodwana bathi kufuze kube nento ethileko elisekeleko. Kwathi ngo-1687, eminyakeni emakhulu amathathu eyadlulako, u-Isaac Newton watlola ngomsebenzakhe omalungana namandla adosela izinto phasi begodu wahlathulula ukuthi iphasi libanjwe mamandla angabonakaliko. Irhubululweli lafakazela lokho okwatjhiwo liBhayibheli eminyakeni engaphezu kwee-3 000 eyadlulako!
Isiphorofido Esiliqiniso
Iimphorofido zeBhayibheli zinembe kangangani? Cabanga ngesibonelo nasi: Isiphorofido saka-Isaya esimalungana nokutjhatjalaliswa kweBhabhiloni.
Isiphorofido: Ngomnyaka wobunane B.C.E., umtloli weBhayibheli u-Isaya wamemezela ngeBhabhiloni—okwathi ngokukhamba kwesikhathi laba yihloko dorobho lombuso onamandla—belizokutjhatjalaliswa begodu ekugcineni kungasaba nabantu abahlala khona. (Isaya 13:17-20) U-Isaya watjho nebizo lomuntu ozokwenza umsebenzi lo, nguKoretjhi. Wahlathulula neqhinga uKoretjhi azolisebenzisa, wathi imilambo ‘izokoma kere.’ Begodu wabikezela ukuthi amasango azokutjhiywa avuliwe.—Isaya 44:27–45:1.
Ukuzaliseka: Pheze ngemva kweminyaka ema-200 isiphorofido saka-Isaya sibikezelwe, ikosi yePheresiya yahlasela iBhabhiloni. Bekungubani? NguKoretjhi. Ngebanga lokuthi iBhabhiloni belivikeleke khulu, bekungasilula ukungena, uKoretjhi wacabanga ngoMlambo iYufrathe, ebewubhode idorobhweli. Amadoda ebekakhamba nawo emba iforo ebeyizokuphambukisa amanzi womlambo bona agelezele elitsheni. Lokhu kwabohlisa amanzi ngezinga elifaneleko ukwenzela ukuthi amabutho kaKoretjhi akghone ukungena emlanjeni obohlileko, ebewubhodwe maboda wedorobhelo. Okurarako, kukuthi abantu beBhabhiloni batjhiya amasango avuliwe. Amabutho kaKoretjhi angena emasangweni weBhabhiloni avulekileko begodu alitjhabalalisa.
Nanyana kunjalo, kunokuthileko okuseleko: Kghani iBhabhiloni akhenge lisahlalwa babantu? Emakhulwini weminyaka, abantu baragela phambili bahlala lapho. Kodwana namhlanjesi, iBhabhiloni limarubhi—lihlanu kweBaghdad, e-Iraq—okufakazela bona isiphorofidwesi sazaliseka ngokupheleleko. Kwamambala, iBhayibheli lithembekile ngitjho nalokha nalikhuluma ngezenzakalo zangomuso.