Ukwazi Iqiniso Ngengomuso
Wakhe wazibuza ukuthi ingomuso lisiphatheleni? IBhayibheli lisitjela ngezinto eziqakathekileko ezizokwenzeka ingasikade ezizokuthinta boke abantu abasephasini.
UJesu wahlathulula ukuthi sizokubona ngani bona “umBuso kaZimu useduze.” (Lukasi 21:31) Phakathi kwezinye izinto ezizokwenzeka, wabikezela ukuthi kuzokuba nokusikinyeka kwephasi okukhulu, ukutlhayela kokudla nezifo ezibulalako—okuzizinto esizibonako namhlanjesi.—Lukasi 21:10-17.
IBhayibheli lisitjela ukuthi, “emihleni yokuphela” abantu bazokuragela phambili nokwenza izinto embi. Ungafunda umtlolo wesi-2 kaThimothi 3:1-5. Nawubona izintwezi zenzeka, akunakuzaza bona lokho okutjhiwo siphorofido seBhayibheli kuvumelana nalokho okwenzekako namhlanjesi.
Kutjho ukuthini lokhu? Kutjho ukuthi isikhathi sesitjhidele sokobana umBuso kaZimu wenze amatjhuguluko azokuletha ipilo engcono ephasini. (Lukasi 21:36) EBhayibhelini, uZimu usithembisa izinto ezihle azozenza ephasini nazo zenzela abantu abazokuphila kilo. Nanzi ezinye iimbonelo.
UMBUSI OLUNGILEKO
“Waphiwa ukubusa [uJesu], iphazimulo nombuso, ukuze boke abantu, amalimi nezizwe zimlotjhe. Umbuswakhe ngewanini nanini begodu angeze wadlula nobukhosi bakhe bubukhosi obungeze babhujiswa.”—DANYELA 7:14.
Lokhu kutjho ukuthi: Ungaphila nasele kubusa urhulumende ohlonywe nguZimu neNdodanakhe eyiKosi yombuso.
IPILO EHLE NOKUGULA KUNGASEKHO
“Akunamhlali . . . ozakuthi: “Ngiyagula.’”—ISAYA 33:24.
Lokhu kutjho ukuthi: Angekhe sisagula namkha sirholophale; sizokuphila singasafi.
KUZOKUBA NOKUTHULA EPHASINI LOKE
“Uthulisa izipi ephasini loke.”—IRHUBO 46:10.
Lokhu kutjho ukuthi: Izipi zizabe zingasekho nobuhlungu ezibubangeleko.
KUZOKUHLALA ABANTU ABALUNGILEKO EPHASINI
“Isikhohlakali singasabi khona . . . Kodwana abathobekileko bazakuzuza inarha.”—IRHUBO 37:10, 11.
Lokhu kutjho ukuthi: Abantu abenza izinto ezimbi angekhe basaba khona kuzokusala kwaphela abantu abalalela uZimu.
IPHASI LOKE LIZOKUBA YINDAWO EHLE
“Bazakwakha iinkumba bebahlale kizo, batjale iindiribe, bagome isithelo sakhona.”—ISAYA 65:21, 22.
Lokhu kutjho ukuthi: Iphasi loke lizokuba yindawo ehle. UZimu uzokuzalisa umthandazwethu ngokuthi intandwakhe yenzeke ‘ephasini.’—Matewu 6:10.