Ilihlo Lakho Lilungile Na?
1. Kutjho ukuthini ukuba ‘nelihlo elilungileko’?
1 Lokho amehlwethu adzimelele kikho kunomthelela ezenzweni zethu. Qala indlela amezwi kaJesu afaneleka ngayo: “Nengabe amehlo wakho alungile, umzimba wakho woke uzaba nokukhanya”! (Mat. 6:22) Nengabe amehlwethu “alungile” ngokomoya, adzimelele emnqophweni owodwa—ukukwenza intando kaZimu. Sibeka uMbuso kokuthoma begodu asithikanyezwa zizinto eziqalekako ezingatlhogekiko namtjhana iimberego engathikameza ikonzo.
2. Khuyini engahlanakela umbonwethu kodwana khuyini ezosirhelebha?
2 Kutlhogeka Bona Sizihlole: Umbono wethu ungahlanakela ngilokho zokukhangisa ezisitjela bona siyazitlhoga namtjhana lokho abanye abanakho. Ngaphambi kobana ufune intwetja namtjhana uthenge izinto ezizokudlela isikhathi, imali namtjhana amandla, kungaba kuhle ‘uhlale phasi ntangi ubone kuzakubiza malini’ ngokuzibuza, ‘Lokhu kuzokuthuthukisa ikonzwami kuJehova nofana kuzoyithikameza?’ (Luka 14:28; Fil. 1:9-11) Kukuhlakanipha ukucabangela qobe indlela esingenza ngayo bulula ukuphila kwethu ukwenzela bona senze okungeziweko ekonzweni.—2 Kor. 13:5; Efe. 5:10.
3. Khuyini esifundako kudade owenza amatjhuguluko bona aphile ipilo elula?
3 Lokha omunye udade nekathoma ukubaliphayona lesikhathi esizeleko, wakhetha ukuragela phambili nomberegwakhe wesikhathi esizeleko wokuziphilisa ngitjho nalokha umberego wokungaberegi ngamalanga gade uzomenza bona akghone ukuzitlhogomela yena. Waphetha ngokobana: “Akekho umuntu ongaba sigqili samakhosi amabili. Kwafuneka ngilise izinto engizifunako bona ngitjheje iintlhogo zami. Ngayelela bona izinto eziqalekako ziphelelwa sikhathi, Nengabe ngaragela phambili ngilinga ukufumana izinto ebengicabanga bona ngiyazifuna, gade zizongiqeda amandla.” Ubujamo bakhe bamvumela bona enze amatjhuguluko wokwenza ukuphila kwakhe kubelula begodu watjhentjha umberego, waragela phambili nekonzo yokuphayona.
4. Kubayini kurhabile ukubulunga ilihlo lethu lilungile kwanjesi?
4 Ukurhaba kweenkhathi zethu kwenza kuqakatheke khulu bona sibulunge ilihlo lethu lilungile. Ilanga elinye nelinye elidlulako lisitjhideza eduze kokuphela kobujamo bezinto zanjesi zephasi nokuthoma kwephasi elitjha lakaZimu. (1 Kor. 7:29, 31) Ngokunamathela emberegweni wokutjhumayela, singaziphulusa thina nalabo abasilalelako.—1 Thi. 4:16.