Okuza Qangi
1. UJesu watjengisa njani bona ikonzo gade iqakathekile kuye?
1 Ikonzo kuJesu gade iza qangi. Waberega budisi khulu, akhamba amakhulu wamakhilomitha iPalestina loke bona atjhumayeze abantu abanengi ngendlela angakghona ngayo. Waphila ukuphila okulula bona akghone ukunikela ngesikhathi esinengi begodu atjheje nekonzo. (Mat. 8:20) Lokha isiqubuthu nasilinga ukumbamba bona apholise abagulako, wathi: “Kufanele bona ngitjhumayele iindaba ezimnandi ngombuso kaZimu nakwezinye iindawo, ngombana ngilokho uZimu angithume bona ngikwenze.”—Luka 4:43.
2. Kubayini ikonzo kuJesu gade iqakatheke kangaka?
2 Kubayini ikonzo kuJesu gade iqakathekile? Ngokuyihloko into bekatshwenyeka ngayo gade kukucwengiswa kwebizo lakaJehova. (Mat. 6:9) Bekamthanda uYise wezulwini begodu ngebanga lethandwelo bekafisa ukwenza intando Yakhe begodu alalele yoke iimlayo.Yakhe. (Jwanisi 14:31) Ukungezelela kilokhu, gade abatlhogomela khulu abantu begodu afuna ukubarhelebha.—Mat. 9:36, 37.
3. Singatjengisa njani bona ikonzo iza qangi kithi?
3 Lingisa UJesu: Ukwenza lokho uJesu akwenza kungaba sitjhijilo ngombana iphasi lisidlela isikhathi begodu lineenthikamezo ezinengi khulu. (Mat. 24:37-39; Luka 21:34) Ngalokho-ke, kufuze siqiniseke bona senze izinto eziqakatheke khulu, senze nehlelo lesikhathi bona silungiselele begodu sihlanganyele emsebenzi wokutjhumayela qobe. (Fil. 1:10) Kufuze senze umzamo wokobana siphile ipilo elula begodu sibalekele ukuberegisa iphasi ngokuzeleko.—1 Kor. 7:31.
4. Kubayini kuqakathekile bona senze isiqunto esilungileko nje?
4 Lokha isikhathi sisincani, umuntu ohlakaniphileko wenza lokho okuqakatheke khulu qangi. Isibonelo, nengabe uzwe bona isiwuruwuru esiyingozi siyeza, uzokuberegisa isikhathi sakhe namandla bona enze amalungiselelo wokuphulukisa umndenakhe begodu ayelelise nabomakhelwana bakhe. Iimberego engatjho litho izokujama. Isikhathi esiseleko ngaphambi kobana isiwuruwuru se-Amagedoni sifike sinciphile. (Zef. 1:14-16; 1 Kor. 7:29) Bona siziphuluse thina nalabo abasilelelako, kufuze sizitjheje thina qobe nokufundisa kwethu, namtjhana singaphakathi nofana ngaphandle kwebandla. (1 Thi. 4:16) Kuliqiniso, ukuphuluka kwethu kuyame ekwenzeni ikonzo yethu ize qangi!