Kwanele Lokho Engikwenzako na?
1. Ngikuphi ukutshwenyeka amaKrestu athembekileko angaba nakho?
1 Wakhe wazibuza umbuzo onjalo? Mhlamunye ukuzibandakanya kwakho esimini sekufiphele ngebanga lokukhula, imiraro yepilo, nofana ukwanda kwemithwalo yefanelo yomndeni kukuqeda amandla. Omunye udade onabentwana abathathu watlola bona ngas’khathi uzizwa amlandu ngombana isikhathi namandla atlhogekako wokutlhogomela umndenakhe, kurhunyeza lokho angakwenza ekonzweni. Khuyini okuzosirhelebha bona lokhu sikwenze ngendlela elinganako?
2. Khuyini uJehova akulindele kithi?
2 Lokho Okulindelwe NguJehova Kithi: Ngaphandle kokuzaza, soke singathanda ukwenza ngokungezelelweko ekonzweni. Kodwana kanengi kubanomehluko omkhulu hlangana nalokho esingathanda ukukwenza nalokho mbalambala esingakwenza. Iqiniso lokobana singathanda ukwenza ngokungezelelweko litjengisa bonyana asisimarhamaru. Kufuze sikhumbule nokobana uJehova ukwazi kuhle ukulinganiselwa kwethu, begodu akakalindeli bona senze lokho okungaphezu kwamandlethu. (Rha. 103:13, 14) Khuyini-ke akulindele kithi? Ufuna simlotjhe ngomphefumulo woke, simnikele okungcono khulu.—Khol. 3:23.
3. Singayihlolisisa bunjani iimzamwethu ekonzweni?
3 Khuyini okungasirhelebha sibone okusilungele kwamambala? Singabawa uJehova bona asirhelebhe sihlole ubujamo bethu ngalokho esifuna ukukufinyelela. (Rha. 26:2) Umngani omKrestu othembekileko, ovuthiweko, nosazi kuhle ongeze akusaba nokusitjela bona sitlhoga ituthuko, angafese abe lisizo. (Iziy. 27:9) Khumbula godu, njengombana iinkhathi zitjhuguluka, kuyazuzisa nokuhlolisisa ubujamo bethu qobe.—Efe. 5:10.
4. Kufuze siziqale njani iinkhumbuzo ezisekelwe eBhayibhilini maqondana nesimu?
4 Indlela Okufuze Siqale Ngayo Iinkhumbuzo: Ngesikhathi somgijimo, abantu ababukeleko bajayele ukukhuzela abagijimako. Ihloso yalokho isuke ikurhelebha abagijimi bona bafinyelele umnqopho wabo, ingasi ukubaqeda amandla. Ngokufanako, iinkhuthazo ezisekelwe eBhayibhilini neenkhumbuzo ezinikelwa eemhlanganweni yethu kuhlanganise neencwadini zethu “zokutjhumayela ilizwi ngokurhabako” nazo ziyazuzisa, begodu azivezi bona imizamo yethu ayikapheleli nangenye indlela. (2 Thi. 4:2, NW) Singaqiniseka ngokobana nasiragela phambili senza umzamo wokwenza okungcono khulu, uJehova uzokukhumbula ‘umsebenzi esawenzako nethando esalitjengisako’ ngokuzithandela.—Heb. 6:10.