Ungakwazi Ukurhelebha Umlingani Ongakholwako?
1. Kubayini amaKrestu asemkhayeni ahlukeneko ngekolo kungasiwo wodwa afuna ukurhelebha abalingani abangakholwako bona bamukele iqiniso?
1 Bakhona na abarhuweleli ebandleni langekhenu abanamadoda namtjhana abafazi abangakholwako? Nengabe kunjalo, akunakuzaza bona abarhuwelelaba bakhanuka bona abalingani babo bangahlanganyela nabo ekukhulekeleni kweqiniso. Kodwana akusibo bodwa. NjengoZimu, loke ibandla likhanuka bona “boke abantu baphuluswe balazi iqiniso.” (1 Thi. 2:4) Singabarhelebha njani abalingani abangakholwako ebandleni langekhethu?
2. Ukuzwisisa kungasirhelebha njani bona sirhelebhe umngani ongakholwako?
2 Kokuthoma, kufuze siqale izinto ngombono womuntu ongakholwako. Abalingani abanengi abangakholwako kungenzeka bayayithanda imindenabo begodu balinga ukuba balingani bomtjhado namtjhana ababelethi abahle kodwana bayazithanda iinkolelo zabo ezihlukileko kwezethu. Kungenzeka kuncani abakwaziko ngaboFakazi BakaJehova ngaphandle kwalokho abakutjelwe bangani abanganalwazi namtjhana abanebandlululo. Abanye bangasilingwa sikhathi abalingani babo abasisebenzisela ukukhulekela, leso ngaphambilini ebebaba nemindeni yabo ngaso. Ukuzwisisa kungasirhelebha bona simphathe ngomusa nangehlonipho ongakholwako sigegede nokuthukwa ngokungatlhogekiko nesinaye.—Iziy. 16:20-23.
3. Ngiyiphi indlela ebhedere yokuzuza umlingani ongakholwako?
3 Ukutjengisa Bona Unendaba Naye: Indlela ebhedere khulu yokuzuza umngani ongakholwako bona amukele iqiniso, kokuthoma, kungaba zizenzo zethu, ingasi ukumtjhumayeza. (1 Pit. 3:1, 2) Okuqakathekileko kilokhu, kutjengisa bona unendaba naye. Abodade ebandleni bangatjengisa ikareko emfazini ongakholwako, nabazalwana benze okufanako endodeni engakholwako. Bangakwenza njani lokho?
4. Singatjengisa njani bona sinendaba nomlingani ongakholwako?
4 Nengabe akhange khewuhlangane nomlingani ongakholwako, mhlamunye ungenza njalo ngemva kokukhulumisana nomKrestu ngobujamo bomlinganakhe. Ungadani nengabe ongakholwako kokuthoma akasabeli kuhle ekutjengiseni kwakho ikareko. Ubungani nokumnaka kwethu kungamenza abaqale kuhle aboFakazi BakaJehova. (Rom. 12:20) Amanye amaKrestu avuthiweko amema ongakholwako nomndenakhe bona bazokudla nabo ukudla kwantambama, ngehloso yokumjayela nokuqeda ibandlululo okungenzeka likhona. Bebakhuluma ngezinto ongakholwako azithandako, kunokobana bakatelele ukukhuluma ngezinto ezingokomoya. Ngemva kwesikhathi, ongakholwako nazizwa atjhaphulukile kungatlhogeka-ke bona kukhulunywe ngezingokomoya. Namtjhana angamukela isimemo sokuba khona eemhlanganweni yethu ukubona bona umkakhe ufundani, khulukhulu njengombana sele kunabaziko ebandleni. Ngitjho nanyana angakakulungeli ukufunda iqiniso, angabukwa ngokusekela umlinganakhe okholwako.
5. Abadala bangaba nekareko njani kumuntu ongakholwako?
5 Abadala ngokukhethekileko kufuze babenekareko kubalingani abangakholwako begodu baqale amathuba wokunikela ubufakazi. Umuntu ongakholwako onganakareko eenkulumiswaneni zeBhayibhili angalalela isikhuthazo soMtlolo lokha nakasesibhedlela namtjhana aqalene nemiraro eemkhulu yepilo. Nengabe umndeni uhlukene ngekolo uqalana nehlekelele, njengokuhlongakalelwa ilungu lomndeni, abadala banga bawa umuntu ongakholwako bona abe khona lokha nebanikela induduzo emndenini.
6. Ngimaphi amabanga akhona wokurhelebha abalingani abangakholwako?
6 Cabanga ngethabo elizokuba khona kumKrestu esinaye ebandleni nengabe umlinganakhe uyasabela begodu uthatha amaqiniso! Isehlakalo esithabisakwesi sizokuletha ithabo elikhulu kuJehova, eengilozini, nakibo boke ebandleni. (Luk 15:7, 10) Nokho, nengabe umuntu ongakholwako akasabeli ekuthomeni, singathaba bona iimzamethu ithabisa uJehova, ongafuni ‘bona noyedwa arhayileke, kodwana ofuna boke batjhuguluke ezonweni zabo.’—2 Pit. 3:9.
[Umkhangiso osekhasini 6]
Indlela ephumelelako yokurhelebha umlingani ongakholwako bona athathe iqiniso, okungenani ekuthomeni, kungaba ngezenzo zethu, ingasi ngekulumiswano yeBhayibhili