“Umkhanyo Wenu Kufanele Ukhanye”
1. Ngiliphi ilungelo esinalo esingalihlanganyela nabanye?
1 Kusukela ekuseni bekube sentambama, ubuhle bokukhanya obubonakalako budumisa uJehova uZimu. Nokho, gade kungelinye ihlobo lomkhanyo uJesu abawa abafundi bakhe bona babe nalo—‘ukukhanya kokuphila.’ (Jwa. 8:12) Ukuba nomkhanyo ongokomoya lo lilungelo elikhethekileko elihlanganisa iimthwalo yefanelo eqakatheke khulu. UJesu wathi: “Umkhanyo wenu kufanele ukhanye phambi kwabantu,” bona kuzuze abanye. (Mat. 5:16) Esikhathini sanamhlanje esinobumnyama obukhulu obungokomoya, ukukhanyokhu kufuze sikuhlanganyele nabanye, begodu kunetlhogakalo ekulu yalokho. NjengoKrestu, singakwenza njani ukukhanya kwethu kukhanye?
2. UJesu wakutjengisa njani ukuqakatheka kokuhlanganyela ukukhanya okungokomoya nabanye?
2 Ngokutjhumayela: UJesu wasebenzisa isikhathi sakhe, amandla nezinto eziqalekako ukwenza umkhanyo weqiniso waziwe babantu emzinabo, eendaweni zomphakathi, esiqongolweni seentaba—nanyana kukuphi lapho abantu bafumaneka khona. Watjheja ukuqakatheka okungapheliko kokunikela ukukhanya kweqiniso okungokomoya. (Jwa. 12:46) Ukufikelela abantu abanengi, uJesu wabandula abafundi bakhe bona babe ‘kukhanya ephasini.’ (Mat. 5:14) Benza ukukhanya kwabo kwakhanya ngokwenza okuhle kibomakhelwana babo nangokuhlanganyela amaqiniso angokomoya nabo.
3. Singakutjengisa njani ukuthokoza kwamambala ngokukhanya kweqiniso?
3 Abantu bakaZimu bathatha ‘ukuphila njengabantu abasemkhanyweni’ njengokuqakatheke khulu, begodu batjhumayela nanyana kukuphi lapho kufumaneka khona abantu. (Efe. 5:8) Ngokufunda iBhayibhili nofana ezinye iincwadi zobuKrestu etjhatjhalazini, ngamadina emsebenzini namtjhana esikolweni kungavula ithuba lokucoca ngoMtlolo. Ngokwenza njalo, omunye udade osesemutjha wathoma isifundo seBhayibhili begodu wakhambisa iincwadi ezili-12 kafunda nabo!
4. Kubayini ukwenza ‘ukukhanya kwethu kukhanye’ kuhlanganisa nokuziphatha okusibonelo?
4 Ngeemsebenzi Emihle: Ukwenza ukukhanya kwethu kukhanye kuhlanganisa nokuziphatha kwethu kwaqobe lilanga. (Efe. 5:9) Emsebenzini, esikolweni nakezinye iindawo zomphakathi, ukuziphatha kobuKrestu kuvula amathuba wokuhlanganyela amaqiniso weBhayibhili. (1 Pit. 2:12) Isibonelo, ukuziphatha kuhle komsana oneemnyaka emhlanu kwenza utitjherakhe bona abize ababelethi bakhe. Wathi, “Azang’khe khengimbone umntwana oziphatha kuhle kangaka!” Kwamambala, ikonzwethu nokuziphatha okuhle kungadosela abantu ‘ekukhanyeni kokuphila’ begodu kudumise uZimethu.