Siza Umninimuzi Bona Acabange
1. Ngiyiphi indlela ephumelela ngcono ekonzweni yesimini?
1 Ngiyiphi indlela ephumelela khulu ekonzweni—kugandelela umbonwakho namtjhana kusiza umninimuzi bona azicabangele bese afikelele isiphetho esilungileko? Umpostoli uPowula wasebenzisa indlela yesibili nekakhuluma namaJuda weTesalonika begodu “abanye babo bakholwa.” (IZe. 17:2-4) Ukubonisana nabanye kubandakanyani?
2. Singasilingisa njani isibonelo sakaPowula nesihlanganyela nabanye iindaba ezihle?
2 Cabangela Amazizo Nemvelaphi: Ukubonisana nabantu kutjho ukucabangela amazizo walabo esikhuluma nabo esimini. UPowula wathoma ikulumiswano namaGirigi angakholwako e-Areyopagusi ngokutjho izinto okungenzeka bekazazi begodu azimukela. (IZe. 17:22-31) Ngalokho-ke, newulungiselela itjumayelo, cabangela iinkolelo ezijayelekileko nezinto abantu abangazithandiko esiminenu. (1 Kor. 9:19-22) Nengabe umninimuzi uyaphikisa, linga ukuthola into enivumelana ngayo bese wakhela ingcocwakho kilokho.
3. Singabonisana njani nabanye ngokuphumelelako ngokusebenzisa iimbuzo ngokuhlakanipha?
3 Sebenzisa Iimbuzo Ngokuhlakanipha: Angekhe silayele umuntu indlela bona afike lapho aya khona nengabe asazi bona ukuphi ngesikhatheso. Ngokufanako, angekhe sisize umninimuzi bona afikelele isiphetho esifaneleko ngaphandle kokwazi umbonwakhe wangesikhatheso. Ngaphambi kokubonisana nesilaleli, uJesu kanengi gade abuza umbuzo bona athole lokho umuntu akucabangako. Isibonelo, umuntu othileko nekabuza uJesu bona ‘angenza njani ukufumana ipilo engapheliko,’ uJesu wafuna ukuzwa umbono womuntu loyo ngaphambi kokuphendula. (Luka 10:25-28) Kesinye isehlakalo, uPitrosi nekanikela ipendulo engasiyo, ngokuhlakanipha uJesu wasebenzisa iimbuzo bona alungise ukucabanga kwakhe. (Mat. 17:24-26) Ngalokho, nengabe umninimuzi ubuza umbuzo namtjhana uveza umbono ongasiwo, singasebenzisa iimbuzo ukumsiza bona abe nombono olungileko.
4. Kubayini kufuze sisize umninimuzi bona acabange?
4 Nesisiza umninimuzi bona acabange, silingisa uMfundisi oMkhulu, uJesu, kuhlanganise nabavangeli abanekghono bangekhulu lokuthoma. Sihlonipha umninimuzi. (1 Pit. 3:15) Ngalokho, angasivumela bona sibuye.