Umhlangano Wethu Wesigodi—Ubufakazi Obunamandla Beqiniso
1. Imigidi yaqobe mnyaka beyinikela ama-Israyeli ithuba lokuzindla nokucoca ngamaphi amaqiniso aqakathekileko angokomoya?
1 Ama-Israyeli wekadeni bekabuthana kathathu ngomnyaka bona abe neemgidi yaqobe. Nanyana kumadoda kwaphela ebekufuze abekhona, kanengi imindeni yoke beyikhamba iye eJerusalema bona iyokuthabela imihlangano le. (Dut. 16:15, 16) Iinkhathi ezinjalo bezinikela ithuba lokuzindla nokucoca ngamaqiniso aqakathekileko angokomoya. Ngimaphi amanye wamaqiniso lawo? Lokuthoma ngelekobana uJehova unguMuphi onomusa nethando. (Dut. 15:4, 5) Elinye ngelokobana singathembela kuye bona asinikele isinqophiso nesivikelo. (Dut. 32:9, 10) Godu ama-Israyeli bekangazindla nangeqiniso lokobana njengabantu ababizwa ngebizo lakaJehova, kufuze atjengise ukulunga kwakhe. (Dut. 7:6, 11) Nanamhlanjesi imihlangano yethu yesigodi yaqobe mnyaka isizuzisa ngendlela efanako.
2. Ihlelo lomhlangano wesigodi liwuletha njani umkhanyo eqinisweni?
2 Ihlelo Likhanyisa Iqiniso: Emihlanganwenethu yesigodi, sithabela iinkulumo, amadrama, iimboniso, neenkulumiswano ezisisiza sizwisise amaqiniso aqakathekileko weBhayibhili. (Jwa. 17:17) Umsebenzi omkhulu womhlangano ozako sewuthonyiwe. Ihlangano kaJehova ilungiselela ihlelo elenzelwe ngokukhethekileko ukuveza iintlhogo zagadesi zesimu yephasi loke. (Mat. 24:45-47) Uzimisele na ukubona nokuzwa okuzobe kwethulwa?
3. Khuyini okufuze siyenze bona sizuze emhlanganweni?
3 Kwamambala, sizokuzuza khulu nengabe siba khona kiwo woke amalanga amathathu begodu silalelisise. Nengabe awukabawi, khuluma nomqatjhakho bona akuphe isikhathi sokobana ungabi khona emsebenzini. Qiniseka bona uphumula ngokwaneleko ubusuku ngabunye ukwenzela bona uphaphame emhlanganweni. Abanye babone bonyana ukuqala isikhulumi ngemehlweni nokutlola amaphuzu kancani kuyabasiza bona bahlale baphaphamile. Ungavumeli ufunjathwakwakho namtjhana i-pager ikuthikazise nofana ithikazise abanye. Balekela ukukhuluma, ukuthumelelana iimlayezo, ukudla, namtjhana ukusela ngesikhathi somhlangano.
4. Ababelethi bangabasiza njani abantwababo bazuze emhlanganweni?
4 Ngeemnyaka yeSabatha, lokha iimndeni yama-Israyeli ibuthana bona izokulalela ukufundwa koMthetho hlangana noMnyanya Wamatende, beyikhamba ‘nabantwababo abancani bona balalele begodu bafunde.’ (Dut. 31:12) Qala bona kukhuthaza kangangani ukubona iimndeni ihleli ndawonye ngesikhathi somhlangano begodu nabancani bangakalali, balalelisisile! Ubusuku ngabunye, kubayini ningathathi iincwadi zenu zamaphuzu nicoce ndawonye ngehlelo lomhlangano enilithabele ngokukhethekileko? “Ubudlhayela bubotjhelelwe ehliziyweni yomntwana,” ngalokho ababelethi benza kuhle ngokunqophisa abantwababo, kuhlanganise nalabo abaseemnyakeni yabo yobutjha, ngesikhathi sedina nalokha basehotela, ‘kunokubalisa.’—Iziy. 22:15; 29:15.
5. Ukuziphatha kwethu okuhle nesisehotela kulihlobisa njani iqiniso?
5 Ukuziphatha Kwethu Kuhlobisa Iqiniso: Ukuziphatha kwethu nesisedorobheni lomhlangano kuhlobisa iqiniso. (Tit. 2:10) Iinsebenzi zehotela ziyatjheja lokha isiqhema silalela imithetho yehotela begodu sitjengisa ukubekezela nomusa nesisebenzelana nazo. (Khol. 4:6) Abajameli be-ofisi legatja nebacocisana nebehotela umnyaka ogadungileko, umnqophisi wathi kibo: “Siyathaba abantu benu nebeze ehotela yethu ngombana bababantu abanomusa. Baziphethe kuhle begodu banomusa, bahlala baphatha iinsebenzi nezinto zethu ngehlonipho.”
6. Singalihlobisa njani iqiniso ngendlela esimbatha ngayo nesisedorobheni lomhlangano?
6 Nesimbethe amabheji wethu womhlangano, asiwambatheli kwaphela ukukhangisa umhlangano nokwenza iinkhambeli zomhlangano zikghone ukusibona kodwana nokunikela ubufakazi kilabo abasiqalileko. Abantu bedorobheni lomhlangano bazokubona bona laba abambethe amabheji womhlangano bambethe kuhle nangesizotha, ingasi budlabha nangendlela evusa ikanuko okuyinto ejayelekileko ephasini. (1 Thi. 2:9, 10) Ngalokho, kufuze sitjheje indlela esimbatha nesizilungisa ngayo nesisedorobheni lomhlangano, kuhlanganise nalokha sifika ehotela. Ukufika sembethe amabhrugu amafitjhani neenkipa ngekhe kutjengise ihlonipho. Ngitjho nanyana umhlangano usendaweni evulekileko, izambatho zethu kufuze kube ngezihloniphekileko. Nengabe sifuna ukutjhentjha ngemva komhlangano begodu siye eendaweni zokudlela, kufuze sikhumbule bona sisese ziinkhambeli zomhlangano begodu akukafuzi simbathe ngendlela elula ngokweqileko.
7. Ngiyiphi enye indlela yokuthabela ubunye bobuKrestu hlangana nomhlangano?
7 Emigidini yaqobe, ama-Israyeli bekathabela ubudlelwana obakhako nabakhulekeli abakunye nawo abavela kezinye iingcenye zesitjhaba nezephasi begodu lokho bekuthuthukisa ubunye. (IZe. 2:1, 5) Hlangana nomhlangano wesigodi ubudlelwana bobuKrestu obukhethekileko bubonakala ngokuzeleko. Ingcenye ethabisako yeparadeyisi elingokomoya kanengi ikara ababukeleko. (Rha. 133:1) Kunokobana uphume ngedina ukuyokuthenga ukudla, qala bona kungaba ngcono kangangani nesingaziphathela ukudla okulula begodu sisebenzise amathuba lawo ukuhlangana nokucoca nabazalwana nabodade esihleli eduze nabo!
8. Ngimaphi amabanga akhona wokuvolontiya ukusebenza nengabe ubujamo bethu buyasivumela?
8 Ababukeleko kanengi bakarwa yindlela imihlangano ehleleke ngayo, khulukhulu nebezwa bona woke umsebenzi wenziwa ziinsebenzi zokuzithandela. Ungakghona ‘ukuzinikela ngokuzithandela’ bona usebenze emhlanganweni? (Rha. 110:3) Iimndeni yoke kanengi iyavolontiya ukusebenza njengendlela yokubandula abantwababo bona basize abanye. Nengabe uneenhloni, ukusebenza emhlanganweni yindlela ehle yokuhlangana nezinye iinkhambeli zomhlangano. Omunye udade waphawula: “Ngaphandle komndenami nabangani abambalwa, bengingabazi abantu abanengi lapho. Kodwana nengisiza ekuhlwengiseni, ngahlangana nabazalwana nabodade abanengi. Ngakuthabela khulu!” Ukwandisa abangani bethu ngokusiza emhlanganweni kuletha ithabo elikhulu. (2 Kor. 6:12, 13) Nengabe akhenge uvolontiye, buza abadala bona kufuze wenzeni bona ufaneleke ukusiza.
9. Sizobamema njani abanye bona babe khona emhlanganweni?
9 Mema Abanye Bona Bezwe Iqiniso: Eemvekeni eentathu ngaphambi kobana kube nomhlangano, njengomnyaka ogadungileko, sizokuhlanganyela ejimeni lokumema abanye bona babe khona. Amabandla azokufuna ukuhlanganisa isimawo ngokumema ngendlela angakghona ngayo. (Qala ibhoksi elithi, “Sizosikhambisa Njani Isimemo?”) Nanyana ngiziphi iimemo eziseleko kufuze kukhanjwe nazo emhlanganweni. Zizokusetjenziswa ziinkhambeli zomhlangano bona zifakaze ngokungakahlelwa nezisedorobheni lomhlangano.
10. Landisa okuhlangabezanwe nakho okutjengisa bona ijima laqobe lokukhambisa iimemo laba namiphi iimphumela.
10 Abantu bayasabela na ejimeni laqobe mnyakeli? Komunye umhlangano, umlindi wasiza isibili esitjhadileko bona sifumane indawo yokuhlala. Samtjela bona sifumene isimemo begodu “sasibona sikarisa.” Satjhayela amakhilomitha ama-320 bona size emhlanganweni! Komunye, udade gade akhamba umuzi nomuzi wanikela indoda ebeyibonakala ifuna ukwazi ngomhlangano. Ngalokho wathatha isikhathi acoca ngesimemo nendoda leyo. Ngemva kwamalanga ambalwa asemhlanganweni, udade wabona indoda leya nomnganayo emhlanganweni, begodu bebaphethe enye yeencwadi ezitjhatjhululiweko!
11. Kubayini ukuba khona emihlanganweni yethu yesigodi yaqobe mnyaka kuqakathekile?
11 Imigidi yaqobe mnyaka beyililungiselelo lethando elivela kuJehova bona asize ama-Israyeli “amkhonze ngokunganamtjhapho nangeqiniso.” (Josh. 24:14) Ngokufanako, inani lalabo ababakhona emhlanganweni wethu wesigodi waqobe mnyaka lisisiza bona ‘siragele phambili sikhamba eqinisweni’ begodu yingcenye eqakathekileko yokukhulekela kwethu. (3 Jwa. 3) Kwanga uJehova angabusisa iimzamo yabo boke abathandi beqiniso bona babe khona begodu bazuze ngokuzeleko!
[Umkhangiso osekhasini 3]
Ukuziphatha kwethu okuhle nesisedorobheni lomhlangano kuhlobisa iqiniso
[Umkhangiso osekhasini 4]
Eemvekeni eentathu ngaphambi kobana kube nomhlangano, sizokuhlanganyela ejimeni lokumema abanye bona babe khona
[Ibhoksi elisekhasini 5]
Iinkhumbuzo Zomhlangano Wesigodi Ka-2012
◼ Isikhathi Umhlangano Ozokuthoma Ngaso: Umhlangano uzokuthoma ngo-9:00 ekuseni woke amalanga amathathu la. Kuzokuvulwa ngo-7:00 ekuseni. Nekwenziwa isaziso sokudlala umbhino othoma umhlangano, soke kufuze sihlale eentulweni zethu bona umhlangano uthome ngendlela ehloniphekileko. Umhlangano uzokuphela ngo-4:15 ntambama ngeLesihlanu, ngoMgqibelo uzokuphela ngo-4:35 ntambama, ngoSondarha uzokuphela ngo-3:20 ntambama.
◼ Indawo Yokuphaga Iinkoloyi: Kiyo yoke ikundla yomhlangano lapho sabelwe ukuphaga khona iinkoloyi, indawo izokufumaneka simahla kilabo abafike qangi. Njengombana indawo yokuphaga ngokujayelekileko ilinganiselwe, kufuze nizalise iinkoloyi ngendlela okungakghoneka ngayo.
◼ Indawo Yokulala: Abarhuweleli abatlhoga indawo yokulala bangafumana amaforomo wokwenza isibawo sendawo athi: Isicelo Sendawo Yokulala (CO-5-ZU). IKomidi YeKonzo YeBandla kufuze icabangele ukufaneleka komrhuweleli, isebenzisa iinlayezo eziseforomweni kuhlanganise nencwadi kaDisemba 14, 2010, etlolelwe zoke iinhlopha zabadala. IIungiselelweli lenzelwe kwaphela abarhuweleli abaziphethe kuhle kuhlanganise nabantwababo abaziphatha kuhle.
◼ Ukubulunga Iintulo: Iintulo zingabekelwa kwaphela labo okhamba nabo ngekoloyi namtjhana ohlala nabo ekhaya, kuhlanganise nalabo ofunda nabo iBhayibhili.—1 Kor. 13:5.
◼ Ukudla Kwedina: Sibawa uziphathele ukudla kwakho kunokobana uphume ekundleni yomhlangano bona uyokuthenga ukudla ngesikhathi sedina. Ungaphatha isikhwama siqandisi esincani ongakghona ukusifaka ngaphasi kwesitulo. Iinkhwama qandisi ezikulu kufuze zibekwe ngokulandela isinqophiso sabalindi. Izinto eziphadlhekako namabhodlelo wotjwala azikavunyelwa endaweni yomhlangano.
◼ Iimnikelo: Singatjengisa ukuthokoza kwethu ngamalungiselelo womhlangano ngokunikela ngokuzithandela emsebenzini wephasi loke emhlanganweni. Nanyana ngimaphi amatjhege kufuze abhadelwe “kuChristian Congregation of Jehovah’s Witnesses of South Africa.” Ezinye iindawo zemihlangano zizokuba neemtjhini yebhanga engasetjenziselwa ukwenza umnikelo ngamakarada webhanga ngaphandle kokunikela ngemali ngokunqophileko nangamatjhege.
◼ Iingozi Nobujamo Oburhabako: Nengabe kuvela ubujamo oburhabako endaweni yomhlangano, sibawa nithinte umlindi oseduze, msinyana ozokwazisa beSizo Lokuthoma bona iinsebenzi ezibanduliweko zesizo lokuthoma zikghone ukuhlola ubujamo begodu zinikele ngesizo.
◼ Iinhlahla: Nengabe kuneenhlahla ozisebenzisako, sibawa uze nezaneleko ngombana azizokuba khona emhlanganweni. Amanjektjheni wabantu abanobulwelwe beswigiri neenalidi kufuze zilahlwe endaweni efaneleko njengeenzibi eziyingozi ingasi emgqomini weenzibi eendaweni zomhlangano nemahotela.
◼ Amanyathelo: Qobe mnyaka abantu abanengi bayalimala ngebanga lamanyathelo. Kuhle ukukhetha amanyathelo afaneleko, akulingana kuhle nazokwenza ukhambe kuhle eentepisini, ezikweni leensimbi nezinye iindawo ezingaba yingozi.
◼ Iinkoloyana Zabantwana (Ipremu): Iinkoloyana zabantwana akukafuzi zingeniswe endaweni yomhlangano. Nokho, iintulo zabantwana zokuphepha ezingabekwa esitulweni hlanu kwababelethi zamukelekile.
◼ Amafutha Anuka Kamnandi: Iimhlangano eemnengi ibanjelwa eendaweni ezivalekileko lapho kuneemtjhini engenisa umoya. Ngalokho-ke, sizabe sitjengisa umusa kwabanye ngokusebenzisa amafutha anuka kamnandi anamandla ngokulingeneko bona singalimazi abantu abaneemraro yokuphefumula.—1 Kor. 10:24.
◼ Amaforomo Athi Siza Ulandelele (S-43-ZU): Iforomo elithi Siza Ulandelele (S-43-ZU) kufuze lisetjenziselwe ukutlola imininingwana malungana nanyana ngubani otjengise ikareko nesitjhumayela ngokungakahlelwa emhlanganweni. Abarhuweleli kufuze baphathe iforomo elilodwa namtjhana amabili emhlanganweni. Amaforomo azalisiweko kufuze asiwe endaweni yeencwadi nofana anikelwe unobhala webandla langekhenu.—Qala IKonzwethu YoMbuso kaMeyi 2011, ikhasi 3.
◼ Iindawo Zokudlela: Dumisa ibizo lakaJehova ngokuziphatha kuhle eendaweni zokudlela. Kuyikambiso ukutjhiya ithiphu ethoma ku-10 kuyaku-15 phesende.
◼ Ikonzo Yokuzithandela: Nanyana ngubani othanda ukusiza kufuze aye eMnyangweni weKonzo yokuziThandela emhlanganweni. Abantwana abangaphasi kweemnyaka eli-16 nabo bangasiza ngokusebenza nababelethi namtjhana abanye abantu abadala abavunyelwe babelethi babo.
◼ Iingoma: Amabandla angathanda ukuphrakthisa iingoma zomhlangano kusesenesikhathi. Iingoma zangeLesihlanu: 52, 57, 113, 106, 116 no-98. Iingoma zangoMgqibelo: 96, 68, 58, 67, 95, no-89. Iingoma zangoSondarha: 110, 61, 134, 73, 36, no-49.
[Ibhoksi elisekhasini 4]
Sizosikhambisa Njani Isimemo?
Bona sihlanganise isimethu, kufuze sibe bafitjhani. Singatjho into efana nale: “Lotjhani. Sihlanganyela emsebenzini wephasi mazombe wokukhambisa isimemo nasi. Nasi sakho. Uzokufumana imininingwana engeziweko esimemwenesi.” Tjhiseka. Newuhlanganyela ekukhambiseni iimemo ngeempelaveke, ungakhambisa nabomagazini nekufanelekako.