UzokuZuza Ngokuba NeSimu Yakho Mathupha?
1. Khuyini isimu yomuntu mathupha?
1 Khuyini isimu yomuntu mathupha? Emabandleni anesimu ekulu, umuntu angaba nesimakhe, mhlamunye eduze nalapho ahlala khona. Incwadi ethi Ukuhlelelwa, ekhasini 103, iyahlathulula: “Ukuba nesimakho endaweni ekulungeleko kuzokwenza ukghone ukusisebenzisa kuhle isikhathi ongasinikela ekonzweni yesimini. Godu ungafisa ukumema omunye umrhuweleli bona asebenze nawe esiminakho.”
2. Isimu yomuntu mathupha ingasetjenziswa njani bona umuntu angezelele ekufakazeni kwakhe nesiqhema?
2 UkuNgezelela EkuTjhumayeleni Nesiqhema: Newufumana isimakho mathupha eduze kwendawo osebenza kiyo, ungahlanganyela ekonzweni ngesikhathi sakho sedina namtjhana ngaphambi kobana ubuyele ekhaya, mhlamunye unomunye umrhuweleli osebenza eduze naye. Nengabe ufumana isimu eduze nekhaya, wena nomndenakho ningayisebenzisela ukufakaza ntambama. Liqiniso, nengabe ngeze nikghone ukuba khona emhlanganweni wekonzo yesimini, kuyafaneleka ukuthandazela isinqophiso sakaJehova ngaphambi kobana nithome ukutjhumayela. (Fil. 4:6) Ngaphezu kwalokho, kufuze ulinganisele hlangana kwesikhathi osisebenza esiminakho mathupha naleso osisebenza usekela ilungiselelo lokufakaza nesiqhema sebandleni. Ngokujayelekileko kungcono ukusekela isiqhema sakho sekonzo yesimini, lapho abanengi bahlangana khona bona baye esimini, khulukhulu ngeempelaveke.
3. Ngiziphi iinzuzo zokuba nesimu yomuntu mathupha?
3 Iinzuzo: Nengabe unesimakho mathupha, unendawo okufuze utjhumayele kiyo nanyana kunini ihlelo lakho nelikuvumelako. Unganikela isikhathi esingeziweko ekutjhumayeleni begodu usebenzise isikhathi esincani ekukhambeni. Lokhu kwenza abanye bona babe maphayona wesigiyani namtjhana wesikhathi esizeleko. Njengombana abaninimuzi abanekareko basendaweni yinye, kulula ukwenza amabuyelo nokuraga iimfundo zeBhayibhili. Abanengi bathola bona ukutjhumayela esiminabo mathupha kubasiza bajayelane nabaninimuzi begodu babenze babathembe, khulukhulu nengabe isimu leyo ingasetjenzwa iinkhathi ezingaphezu kwesisodwa ngaphambi kokuyibuyisa ukwenzela bona nabanye bayibawe. Kghani ukusebenza isimu yomuntu mathupha kungakusiza wena nomndenakho bona nenze ikonzwenu ngokuzeleko?—2 Thi. 4:5.