Qalani AbaPorofidi NjengesiBonelo—UJona
1. Ngiziphi iimfanelo ezihle uJona azitjengisa?
1 Khuyini efika engqondweni newucabanga ngomporofidi uJona? Abanye bamqala njengetjhatjha nofana onehliziyo eqinileko. Nokho, watjengisa ukuthobeka, isibindi nomoya wokuzidela. Singazilingisa njani “njengesibonelo” iimfanelo zakaJona ezihle?—Jak. 5:10.
2. Singasilingisa njani isibonelo sakaJona sokuthobeka?
2 UkuThobeka: Ekuthomeni, uJona wabalekela kwenye indawo ehlukileko esabelweni sakhe. Lokhu, akurari ngombana abantu be-Asiriya bebaziwa ngenturhu, begodu iNiniva yabizwa ngokuthi ‘lidorobho leengazi.’ (Nah. 3:1-3) Nanyana kunjalo, uJehova wamyala uJona, owatjengisa ukuthobeka ngokwamukela isabelo nekamnikela elinye ithuba. (IzA. 24:32; Jon. 3:1-3) Ngitjho nanyana wabaleka ekuthomeni, wenza intando kaJehova. (Math. 21:28-31) Ngokufanako, nathi sizimisele na ukutjhumayela iindaba ezimnandi, ngitjho nanyana siyaliwe nofana isimu esabelwe yona ineentjhijilo?
3. Ngiziphi iingcenye zekonzwakho ezitlhoga isibindi nokuzidela?
3 IsiBindi nokuZidela: UJona nekabona bonyana isiqunto sakhe esimbi safaka ukuphila kwabathayi beenkepe engozini, bekazimisele ukudela ukuphila kwakhe. (Jon. 1:3, 4, 12) Ngokukhamba kwesikhathi, nekazalisa ukuthunywa kwakhe eNiniva, wangena ekabeni yedorobho, mhlamunye afuna indawo efaneleko yokubikezela ngesahlulelo sakaJehova. Lezo bekuzizenzo, ingasi zobutjhatjha, kodwana zomporofidi kaZimu onesibindi! (Jon. 3:3, 4) Kuthiwani ngathi namhlanjesi? Isibindi esivela kuZimu siyatlhogeka bona sinikele ubufakazi ngesibindi nasiqalene nokuphikiswa. (IzE. 4:29, 31) Ukuzidela kuyatlhogeka bona sisebenzise isikhathi nezinto esinazo ekonzweni.—IzE. 20:24.
4. Kubayini kufuze sizinikele isikhathi sokuzindla ngesibonelo esihle esisibekelwe baporofidi bakaJehova?
4 Isikhathi ngasinye nawufunda ngomlando womunye wabaporofidi bakaJehova, uzokuzuza newuzifaka ebujamwenobo. Zibuze: ‘Bengizokusabela njani? Ngingazilingisa njani iimfanelo zakhe ezihle ekuphileni kwami?’ (Heb. 6:11, 12) Eenhlokweni ezilandelako ze-Konzwethu YomBuso kuzokucocwa ngokungeziweko ngeemfundo eziqakathekileko esingazifunda kwabanye abaporofidi bakaJehova abathembekileko.