Bazalwana Abatjha Niyalangazelela Na?
1. Umzalwana osesemutjha kufuze athome nini ukusebenzisa isinqophiso esifumaneka kweyo-1 Thimothi 3:1?
1 ‘Nangabe umuntu uyalangazelela . . . , usuke athanda umsebenzi omuhle.’ (1 Thim. 3:1) Amezwi aphefumulelweko la akhuthaza abazalwana bona balangazelele ukufanelekela amalungelo wekonzo ebandleni. Kghani kufuze ube mkhulu bona wenze njalo? Eqinisweni, kuhle khulu ukuthoma ukulangazelela newusesemutjha. Ngendlela le ungafumana ibandulo nokutjengisa ukufaneleka kwakho ukubekwa njengenceku ekhonzako nesele umkhulu. (1 Thim. 3:10) Nangabe umzalwana osesemutjha obhabhadisiweko, ungalangazelela njani?
2. Singawuhlawulela begodu siwutjengise njani umoya wokuzidela?
2 Ukuzidela: Khumbula bona ulangazelela umsebenzi omuhle, ingasi isikhundla. Ngalokho, hlawulela isifiso sokusiza abanakwenu nabodadwenu. Enye indlela yokwenza lokhu kuzindla ngesibonelo esihle sakaJesu. (Mat. 20:28; Jwa. 4:6, 7; 13:4, 5) Bawa uJehova akusize ube nekareko kwabanye. (1 Kor. 10:24) Ungakghona na ukubasiza labo esele baluphele namtjhana abagulako abasebandleni? Uyazenza ufumaneke bona uzokusika utjani, uhlwengise iWolo lomBuso, namtjhana utlhogomele ezinye izinto eWolweni lomBuso? Ungavolontiya bona unikele ikulumo esiKolweni seKonzo esingokweZulwini? Uzokufumana bona ukuzinikela ekusizeni abanye kuzokulethela ithabo.—IzE. 20:35.
3. Liqakatheke kangangani ingokomoya, begodu singalihlawulela njani?
3 Ingokomoya: Kuqakatheke khulu ngenceku ebandleni bona ibe ngokomoya kunokobana ibe namakghono angokwemvelo akhethekileko. Indoda engokomoya ilinga ukuqala izinto ngendlela uJehova noJesu abaziqala ngayo. (1 Kor. 2:15, 16) Iveza ‘iinthelo zomoya.’ (Gal. 5:22, 23) Imtjhumayeli otjhisekako obeka iinkareko zomBuso qangi. (Mat. 6:33) Ungahlawulela iimfanelo ezingokomoya ngokuba nesifundo somuntu mathupha saqobe. Lokhu kuhlanganisa ukufunda iBhayibheli qobe langa, ukufunda umagazini ngamunye we-Sithalasokulinda ne-Phaphama!, ukulungiselela imihlangano yebandla nokuba khona kiyo. (Rhu. 1:1, 2; Heb. 10:24, 25) Nekakhuthaza uThimothi osesemutjha bona enze ituthuko engokomoya, uPowula watlola: “Uzeluse . . . nefundiso yakho.” (1 Thim. 4:15, 16) Ngalokho silungiselele kuhle isabelo sakho sekulumo esiKolweni seKonzo esingokweZulwini. Lungiselela ikonzo yesimini, begodu uhlanganyele kiyo ngaso soke isikhathi. Zibekele iminqopho engokomoya enjengokuphayona, ikonzo yeBethel, namtjhana ukuya esiKolweni seBhayibheli sabaZalwana abangakaTjhadi. Ingokomoya lizokusiza ‘ubalekele iinkanuko zobutjha.’—2 Thim. 2:22.
4. Kuqakatheke ngani ukuthembeka nokwethenjelwa?
4 Ukuthembeka Nokwethenjelwa: Ngebanga lokobana abazalwana ababelwe ukusa ukudla kumaKrestu atlhogako ngekhulu lokuthoma ‘bebakhulunyelwa kuhle,’ akunakuzaza bona bebaziwa ngokuba ngabathembekileko nabanokwethenjelwa, abapostoli bekungatlhogeki batshwenyeke ngokobana umsebenzi uzokwenziwa na. Lokhu bekubanikela ithuba lokudzimelela kezinye izinto eziqakathekileko. (IzE. 6:1-4) Ngalokho, newunikelwa isabelo ebandleni, senze ngamandlakho woke. Lingisa uNowa, ngokutjhejisisa owalandela iinqophiso anikelwa zona bona akhe umkhumbi. (Gen. 6:22) Ukuthembeka kuqakathekile kuJehova begodu kutjengisa ukuvuthwa ngokomoya.—1 Kor. 4:2; qala ibhoksi elithi “Iinzuzo Zokubandulwa.”
5. Kubayini abazalwana abasesebatjha balangazelela?
5 Njengombana kuphorofidiwe, uJehova ukwenza ngokurhaba ukubuthwa kwabantu. (Isa. 60:22) Ngokwesilinganiso, kubhabhadiswa abantu abayikotara yesigidi qobe mnyaka. Njengombana kunabanengi abatjha abezako eqinisweni, amadoda angokomoya afanelekako ayatlhogeka bona azokutlhogomela imithwalo yefanelo yebandla. Kwanje kunomsebenzi omnengi okufuze wenziwe ekonzweni kaJehova kunanini ngaphambili. (1 Kor. 15:58) Bazalwana abasesebatjha, niyalangazelela? Nengabe kunjalo, nithanda umsebenzi omuhle kwamambala!
[Umkhangiso osekhasini 2]
Njengombana kunabanengi abatjha abeza eqinisweni, amadoda afanelekako ngokomoya ayatlhogeka bona atlhogomele imithwalo yefanelo yebandla
[Ibhoksi elisekhasini 3]
Iinzuzo Zokubandulwa
Abazalwana abasesebatjha abafanelekako bayazuza abadala nebabanikela izabelo begodu babandula. Ngemva komhlangano, umbonisi wesifunda bekahleli esiteji anikela umrhuweleli isikhuthazo. Wabona umsanyana ajame eduze nabo, ngalokho wambuza bona ufuna ukukhuluma naye na. Umsanyana lo waphendula wathi wabelwe ukuvakhyuma isiteji qobe ngemva komhlangano. Ababelethi bakhe besele bafuna ukukhamba, kodwana yena bekangafuni ukukhamba angakenzi isabelo sakhe. Umbonisi wesifunda wamtjhidela ngomoya omuhle. Wathi: “Abadala bebandlelo bebakuyelela ukubandula abazalwana abasesebatjha abafanelekako ngokubanikela izabelo ebandleni. Ngebangelo, bekuyinto ejayelekileko kibo ukubuka umzalwana osesemutjha njengenceku ekhonzako nengivakatjhele ibandlelo.”