Qala Abaphorofidi Njengesibonelo—UMikha
1. Ngimuphi umbuzo okungenzeka uMikha wacabanga ngawo, kodwana kubayini ukutjhumayela kwakhe bekungasililize?
1 ‘Kuzokufika nini ukutjhatjalaliswa kwephasi elimbeli?’ Kungenzeka nomphorofidi uMikha bekacabanga ngombuzo lo njengombana amemezela ngesahlulelo sakaJehova esijamelene nemibuso yakwa-Israyeli nakwaJuda. Kodwana ukutjhumayela kwakhe zange kube lilize. Ngo-740 B.C.E., uMikha asaphila, lokho uJehova akutjhoko ngeSamariya kwenzeka. (Mik. 1:6, 7) Ngokukhamba kwesikhathi, iJerusalema latjhatjalaliswa ngo-607 B.C.E. (Mik. 3:12) Singamlingisa njani uMikha njengombana silindele ukukhutjhwa kwesahlulela sakaJehova esikhathini sethu?
2. Sikutjengisa njani ukubekezela njengombana silindele ilanga lakaJehova? Begodu kubayini?
2 Bekezela: UMikha watlola wathi: “Kodwana mina ngiqalelela [uJehova, NW] ngethemba, ngilinda uZimu uMsindisami, uZimami uzangitjheja.” (Mik. 7:7) Kodwana uMikha azange aphuthe imkhono, alindele ukufika kwesiphelo. Wahlala amajadu njengomphorofidi kaJehova. Njengombana silindele ilanga lakaJehova, kufuze sihlanganyele ezenzweni ‘zepilo yokucwenga nokumesaba uZimu.’ (2 Pit. 3:11, 12) Ukubekezela kwakaJehova kunikela abantu ithuba lokutjhuguluka. (2 Pit. 3:9) Ngalokho, silandela isiluleko seBhayibheli ngokulingisa ukubekezela kwabaphorofidi.—Jak. 5:10.
3. Kubayini kufuze sibawe uJehova bona asinikele umoyakhe ocwengileko?
3 Thembela Emandleni KaJehova: Nanyana uMikha gade anesabelo esibudisi, bekathembele kuJehova bona amnikele amandla wokusenza. (Mik. 3:8) Kunamabanga azwakalako wokobana iliZwi lakaJehova lisikhuthaza bonyana sithembele emandleni avela kuZimu. Ngesandla esivulekileko, uZimu unikela abadiniweko amandla bona benze izabelo zabo ekonzwenakhe. (Rhu. 84:5, 7; Isa. 40:28-31) Khewakubona lokho wena, epilwenakho yekonzo ecwengileko? Uyambawa qobe uJehova bona akusize ngomoyakhe ocwengileko onamandla?—Luk. 11:13.
4. Indlela kaMikha yokuphila isibekela siphi isibonelo esihle namhlanje?
4 Kikho koke ukuphila kwakhe, uMikha wenza intando kaJehova yaba yinto eqakatheke khulu ekuphileni kwakhe. Bekazimisele ukuhlala athembekile nanyana bekabhodwe babantu abaziphatha kumbi. Ngokufanako, ukuthembeka kwethu kuyalingwa qobe langa. Ngalokho, asiqiniseni ukuzimisela kwethu ‘ukuthembela [kuJehova, NW] uZimethu nini nanini.’—Mik. 4:5.