Ukuthuthukisa Amakghonwethu Ekonzweni—Ukuthomisa Ingcoco Bona Ufakaze Ngokungakahlelwa

Okwenza Kuqakatheke: Lokha nasisekonzweni yomuzi nomuzi, kanengi sifumana abantu abanengi bangekho emakhaya. Nokho, singahlangana nabo nasisebenzisa iinthuthi zomphakathi, nasilindele ukubona udorhodere, ngesikhathi sekhefu emsebenzini namkha esikolweni, nokhunye. Kuyintando kaJehova bona woke umuntu afumane ithuba lokuzwa umlayezo womBuso. (1 Thim. 2:3, 4) Kanengi, bona sikghone ukufakaza, kufuze sithathe igadango lokucoca nabo.

Indlela Esingakwenza Ngayo:

Kwenze ngokutjhejisisa. Inga-kghani umuntu loyo ubonakala anobungani begodu uyafuna ukukhuluma? Inga-kghani ubujamo buyanivumela bona ningaba nengcoco etjhaphulukileko? Abanye abarhuweleli bathoma ngokumqala emehlweni bese bayamomotheka. Nengabe umuntu loyo naye uyamomotheka, balinga ukucoca naye.
Yenza umthandazo omncani buthule nengabe awunaso isibindi sokukhuluma.—Nerh. 2:4; IzE. 4:29.
Thoma ngekulumo elula, mhlamunye ngokumlotjhisa. UJesu akhange athome ingcocwakhe nomfazi womSamariya ngokukhuluma ngomBuso. (Jwa. 4:7) Ngezinye iinkhathi ungathoma ingcoco ngokumbuka uthi: “Yazi abantwabakho baziphethe kuhle khulu!” Ukubuza umbuzo kungenye indlela yokuthomisa ingcoco, ungathi: “Uzibukelile na iindaba izolo ebusuku?”
Nasele nithomise ingcoco, funa amathuba wokwethula iindaba ezimnandi, kodwana lokhu ungakwenzi ngokurhaba. Vumela ingcoco izithuthukele ngokuzenzakalelako. Mhlamunye ungathoma ngokutjho into ezomenza alulukele ukwazi okungeziweko begodu abuze nombuzo. Ngokwesibonelo, nengabe ingcocwenu ikhuluma ngeendaba zomndeni, ungathi kuye, “Yazi ngifumene iseluleko esinokuthenjelwa sokukhulisa abantwana.” Nengabe nicoca ngombiko weendaba, ungathi, “Kanengi vane sizwe iindaba ezimbi kodwana mva-nje ngithabele ukufunda iindaba ezimnandi.” Ungadani nengabe ingcocwenu iphela ungakathomi nokunikela ubufakazi.
Phatha amaphetjhana namkha ezinye iincwadi ongazinikela umuntu otjengisa ikareko.

Linga Naku Phakathi Nenyanga:

Qobe veke linga ukuthomisa okunganani ingcoco eyodwa unomnqopho wokunikela ubufakazi ngokungakahlelwa.