Ukufunda Ebarhuwelelini Abanokuhlangabezanwe Nakho Okunengi
Kwamambala abarhuweleli abanokuhlangabezanwe nakho baligugu ebandleni. Abanye bebasolo bakhonza uJehova ngokuthembeka iminyaka eminengi. Abanye bafunde namakghono amanengi amahle khulu ekonzweni mvanje. Abarhuwelelaba babone indlela uJesu anqophisa ngayo ibandla lobuKrestu emihleni yokuphela le, ngokwandisa umsebenzi wokutjhumayela nowokwenza abafundi. (Mat. 28:19, 20) Ngokuhlanganyela emsebenzini lo, bafumane ‘amandla angaphezu kwavamileko’ lokha nabaqalene neentjhijilo zomuntu mathupha neenlingo. (2 Kor. 4:7, NW) Kunengi khulu esingakufunda ebarhuwelelinaba abanokuhlangabezanwe nakho. Nabanikelwa ithuba lokufundisa abanye ngabakufundileko, bafumana ithabo. (Rhu. 71:18) Yeke, kufuze siziphe ithuba lokufunda kibo. Singakwenza njani lokho?
Ekonzweni Yesimini. Bona baphumelele ekonzweni yesimini, abarhuweleli abatjha namkha abanganakho okuhlangabezanwe nakho batlhoga ukubandulwa. Kunengi esingakufunda nasitjheja indlela abarhuweleli abanokuhlangabezanwe nakho abaraga ngayo ekonzwenabo. (Qala isihloko esithi, “Hlala Ukhuthele Emsebenzini Wokutjhumayela” ku-siThala sakaFebherbari 15, 2015, esigabeni sesithathu ngaphasi kwesihlokwana esithi, “Siza Abasanda Kuba Batjhumayeli.”) Khuyini owayizuzako nawusebenza nabo ekonzweni?
Kghani ungabawa umrhuweleli onelemuko bona asebenze nawe esimini? Nangabe umrhuweleli loyo akakaphili kuhle, mhlamunye ngezinye iinkhathi ungambawa bona niragele kwakhe isifundo seBhayibheli. Ngemva kwesifundo bawa umrhuweleli atjho umbonwakhe ngendlela isifundo esiragwe ngayo, anikele neseluleko.
Banikele Isikhathi Sakho: Bazi abarhuweleli abanokuhlangabezanwe nakho ngokuba nesikhathi nabo. Mema omunye wabo nanenza ukukhulekela komndeni nimbuze imibuzo. Nangabe umrhuweleli loyo akakaphili kuhle, ningakghona na ukuhlela ukuyokwenza ukukhulekela komndeni kwakhe? Mbuze ukuthi wawafumana njani amaqiniso. Ngiziphi iimbusiso azithabeleko? Ngiyiphi ituthuko ayibonileko ebandleni akilo? Ngikuphi akuthabeleko ekukhonzeni uJehova?
Yiba ngozwisisako begodu ukucabangele ukulinganiselwa abanakho. Njengathi soke, abarhuweleli abanesikhathi eside baneemphiwo ezingafaniko ekonzweni yesimini. (Rom. 12:6-8) Abanye sebakhulile ngeminyaka begodu lokho kungalinganisela isikhathi abangasisebenza nathi. Nanyana kunjalo, kunengi esingakufunda kibo ngebanga lokuhlangabezanwe nakho kwabo ekukhonzeni uJehova ngokuthembeka.