Qala Abaphorofidi Njengesibonelo—URhabakhukhu
1. Khuyini esifana ngakho noRhabakhukhu?
1 Njengombana siqalene nokwanda kokungalungi ephasini elisibhodileko, nathi singazizwa ngendlela uRhabakhukhu azizwa ngayo, owabuza uJehova wathi: “Kubayini ungibonisa ukungalungi, ubekezelela ubumbi?” (Rhab. 1:3; 2 Thim. 3:1, 13) Ukuzindla ngomlayezo kaRhabakhukhu nesibonelo sokuthembeka kwakhe kungasisiza njengombana sijamele ilanga lapha uJehova azokwahlulela khona abantu.—2 Pit. 3:7.
2. Namhlanjesi singaphila njani ngokuthembeka?
2 Phila Ngokuthembeka: Kunokobana ahlalele kuzitshwenya ngobujamo obungasibuhle, uRhabakhukhu waba majadu emsebenzini kaZimu waqinisa ubuhlobo bakhe naye. (Rhab. 2:1) UJehova wamqinisekisa umphorofidi lo bona ilizwi laKhe lizokuzaliseka ngesikhathi esifaneleko nokuthi “olungileko uzakuphila ngokukholwa kwakhe.” (Rhab. 2:2-4) Kutjho ukuthini lokhu kumaKrestu aphila esikhathini sokuphela? Kuqakatheke khulu ukuqiniseka ngokuthi isiphelo sizokufika kunokucabanga ukuthi sifika nini. Ukukholwa ngikho okusenza sihlale siphapheme nekonzwethu ize qangi.—Heb. 10:38, 39.
3. Kubayini kufuze silwele ukuhlala sithabile njengombana sikhonza uJehova?
3 Thaba NgoJehova: Ukukholwa kwethu kuzokulingwa, lokha uGogi wakwaMagogi nakahlasela abantu bakaJehova. (Hez. 38:2, 10-12) Ipi nayo ibangela woke umuntu nalabo abayithumbako imiraro. Ukudla kungatlhayela. Nabantu bangalahlekelwa zizinto abanazo, nezinga lepilwabo lingehla. Nasele izintwezi sezithoma ukwenzeka sizokubona senzeni? URhabakhukhu bekazilindele iinkhathi ezibudisi, ngikho-ke bekasolo athabile ekusebenzeleni kwakhe uJehova. (Rhab. 3:16-19) “Ukuthaba esikufumana kuJehova” ngikho okuzosisiza sikghone ukukghodlhelelela ubudisi esikhathini esizako.—Nerh. 8:10, NW; Heb. 12:2.
4. Ngikuphi esizokuthabela nje nesikhathini esizako?
4 Labo abazabe basindiswe nguJehova ngelanga elizako lokwahlulela bazokufundiswa indlela kaZimu yokuphila. (Rhab. 2:14) Nabavusiweko nabo bazokufunda ngoJehova. Nathi nje, asisebenzise woke amathuba esiwafumanako ukukhuluma ngoJehova nemisebenzakhe ekarisako!—Rhu. 34:2, [34:1, NW]; 71:17.