Iimbusiso Zalabo Abalalela UZimu

Umphorofidi uMosi wathi nangabe silalela imiyalo kaZimu, sizokufumana iimbusiso. (Duteronomi 10:13; 11:27) Asilaleli uZimu ngombana sisaba ukuthi uzosijezisa. Ubuntu bakaZimu obuhle ngibo obusikhuthaza bona simlalele ngombana siyamthanda begodu sifuna ukubalekela zoke izinto ezingamdanisa. “Ngilokhu okutjhiwo kuthanda uZimu, kukuthi silalele imiyalwakhe.”—1 Jwanisi 5:3.

Kodwana ukulalela uZimu kungasilethela njani iimbusiso? Akhesicoce ngeendlela ezimbili.

1. NASILALELA UZIMU SIZOKUHLAKANIPHA

‘Mina Somnini nginguZimakho okufundisako, . . . okuhlahlako endleleni ekufanele uyikhambe.’—ISAYA 48:17.

UJehova uZimu, uMdalethu usazi kuhle begodu usinikela iinqophiso esizitlhogako. Nangabe sifuna ifundiswakhe isisize senze iinqunto ezihlakaniphileko, kufuze sifunde emiTlolweni eCwengileko bona khuyini uZimu afuna siyenze begodu sisebenzise lokho esikufundako.

2. UKULALELA KUSENZA SITHABE

“Abathabako ngilabo abezwa ilizwi lakaZimu balenze!”—LUKASI 11:28.

Namhlanjesi, iingidi zabantu ezilalela iliZwi lakaZimu zinethabo lamambala. Ngokwesibonelo, akhucabange ngendoda ye-Spain ebeyinomraro wokusilingeka msinyana begodu iphatha abanye makghwakghwa kuhlanganise nomkayo. Ngelinye ilanga yafunda imiTlolo yomphorofidi uMosi ekhuluma ngokuzithoba kwakaJosefa, indodana kaJakopo. UJosefa wathengiswa njengesigqila begodu wabotjhwa anganamlandu; nanyana kunjalo bekahlala athobekile, anokuthula begodu alibalela. (Genesisi, izahluko 37-45) Indoda ye-Spain ithi: “Ukucabanga ngesibonelo sakaJosefa kwangikhuthaza bona ngibe mumuntu othobekileko, onomusa begodu ngikghone nokuzibamba. Umphumela walokho, nje sengithabela ipilo emnandi.”

ImiTlolo eCwengileko isinikela iinqophiso zokuthi singabaphatha njani abanye. Cabanga ngalokhu esihlokweni esilandelako.