UMdalethu Osithandako Unendaba Nathi
1. UMDALETHU WENZA BONA ILANGA LIPHUME
Akhucabange ukuthi ukuphila bekungaba njani ngaphandle komkhanyo welanga? Ilanga linikela imithi amandla wokukhiqiza amakari, amabhlomu, iinthelo, amantongomani nembewu. Lenza nokuthi imithi ikghone ukudosa amanzi ehlabathini ngemirabhu itjhinge phezulu emakarini, amanzi la abuyela phezulu emoyeni.
2. UMDALETHU USINISELA IZULU
Izulu lisisipho esiligugu esivela kuZimu, likghona ukwenza iphasi bona lisikhiqizele ukudla. UZimu usinikela izulu neenkhathi zenala yesivuno, usanelisa ngokudla begodu uzalisa iinhliziyo zethu ngethabo.
3. UMDALETHU USINIKELA UKUDLA NEZAMBATHO
Abobaba abanengi batshwenyeka ngokufumanela imindenabo ukudla nezambatho ezaneleko. Tjheja ukuthi uthini umtlolo lo: “ Qalisisani iinyoni eziphapha phezulu; azitjali, azivuni namkha zibeke ngeenlulwini, kodwana uYihlo wezulwini uyazondla. Nina anikaqakatheki na ukudlula zona?”—Matewu 6:25, 26.
‘Fundani endleleni amathuthumbo wommango akhula ngayo . . . ; kodwana ngiyanitjela bona ngitjho [neKosi] uSolomoni ebukhazikhazini bakhe bekangambathi njengamanye wamathuthumbo la. Nje-ke nangabe uZimu uzembathisa njalo iintjalo zommango . . . , uzonembathisa kangangani-ke nina?’—Matewu 6:28-30.
Njengombana uZimu asipha ukudla nezambatho, singaqiniseka ngokuthi uzosisiza sifumane ezinye izinto esizitlhogako bona siphile. Nangabe sizimisele ukwenza intandwakhe, uzokubusisa imizamwethu yokufumana ukudla nofana asisize sifumane umsebenzi ozosisiza sikghone ukuthenga izinto esizitlhogako.—Matewu 6:32, 33.
Nasibona ilanga, izulu lina, iinyoni namabhlomu kusenza simthande uZimu. Isihloko esilandelako sizokukhuluma ngendlela uMdalethu akhuluma ngayo nabantu.