Ukufunda Eembonelweni Ezihle Kwangilethela Iimbusiso

Ngabelethelwa edorobheni leQuebec eCanada, endaweni ekhuluma isiFrench. Ababelethi bami uLouis noZélia bangikhulisa ngethando. Ubabami bakakuthanda ukufunda begodu bekamumuntu ozithuleleko. Bengikuthanda ukutlola begodu bengifisa ukuba mbikiindaba.

Nangineminyaka eli-12, uRodolphe Soucy obekasebenza nobaba kunye nomnganakhe basivakatjhela ekhaya, bebaboFakazi bakaJehova. Akunalitho ebengilazi ngaboFakazi bakaJehova begodu bengingayithandi ikolo. Ngayithanda indlela ebebaphendula ngayo imibuzo basebenzisa iBhayibheli. Lokho kwabakara ababelethi bami begodu babawa ukufundelwa iBhayibheli.

Ngesikhatheso bengifunda esikolweni samaKatholika. Bengicoca nabantu engifunda nabo ngalokho ebengikufunda eBhayibhelini. Abothitjhere ebebabaphristi bezwa ngalokhu. Kunokuthi bangikhalime basebenzisa iBhayibheli, omunye wabo waleya amala wathi ngiyavukela. Nanyana lokho kwangigandelela kodwana bekusibusiso kimi ngombana kwangitjengisa ukuthi iimfundiso zesikolweni bezingavumelani nalokho okutjhiwo liBhayibheli. Ngabona mhlokho ukuthi la khona angifaneleki. Ababelethi bami bangivumela bona ngiye kesinye isikolo.

NGAFUNDA UKUTHANDA UKUTJHUMAYELA

Ngaragela phambili nokufunda iBhayibheli, kodwana bengingathuthuki kuhle ngombana bengisaba ukutjhumayela umuzi ngomuzi. Isondo lamaKatholika belihlonitjhwa begodu lisatjwa yeke beliphikisana nomsebenzethu. Maurice Duplessis, undunakulu weQuebec bekatjhidelene khulu nesondo lamaKatholika begodu bekamdosiphambili kezepolotiki. Wakhuthaza abantu bona bahlasele aboFakazi. Bekutlhoga isibindi ukutjhumayela ngesikhatheso.

Umfowethu owangisiza bona ngilwisane nokusaba nguJohn Rae umfundi weklasi le-9 lesiKolo seGiliyadi. UJohn bekangumakekere, anommoya ophasi begodu bekubulula ukucoca naye. Bekangakajayeli ukunginikela iseluleko kodwana izenzo zakhe bezikhuluma. UJohn bekangasikhulumi kuhle isiFrench yeke bengikhamba naye nasiyokutjhumayela ngimsize nakufuze akhulume isiFrench. Ukutjhidelana noJohn kwangisiza ngaba nesibindi, ngajamela iqiniso. Ngemva kweminyaka elitjhumi ngihlangene naboFakazi bakaJehova ngabhajadiswa, ngoMeyi 26, 1951.

Ibandla lethu elincani lebandla leQuebec belizele amaphayona. Isibonelo sabo sangikhuthaza bona ngibe liphayona. Ngeenkhathezo besitjhumayela umuzi ngomuzi sisebenzisa iBhayibheli kwaphela. Njengombana besinganazo iincwadi, bekufuze siyisebenzise ngokuhlakanipha imiTlolo. Yeke ngalwela ukuzijayelanisa namavesi weBhayibheli azongisiza ngijamele iqiniso. Nanyana kunjalo inengi labantu belingafuni ukufunda iBhayibheli, khulukhulu nalinganayo imvumo yesondo lamaKhatholika.

Ngo-1952, ngatjhada noSimone Patry, udade othembekileko. Sathuthela eMontreal kwathi kungakapheli umnyaka sabusiswa ngendodakazi yethu uLise. Nanyana khengalisa ukuphayona ngaphambi kobana ngitjhade, mina noSimone salinga ukuphila ukuphila okulula, ukwenzela bona sihlanganyele kizo zoke iincenye zebandla simndeni.

Ngemva kweminyaka elitjhumi ngacabanga godu ngokuthuthukisa umsebenzami wokutjhumayela. Nangisesikolweni esathatha inyanga yoke isiKolo somBuso ebesiseBethel yeCanada ngo-1962 ngabelwa bona ngihlale nomfowethu uCamille Ouellette. Ukuthanda kwakaCamille ukutjhumayela kwangikhuthaza khulu, khulukhulu njengombana naye bekayihloko yomndeni enabantwana. Ngeenkhathezo bekungasiyinto edumileko ukuthi umbelethi angenele ikonzo yesikhathi esizeleko khisibe ngapha ukhulisa abentwana, nanyana kunjalo, lokho bekumgomo kaCamille. Nasisebenza ndawonye wangikhuthaza bona ngicabange ngobujamo bami. Ngemva kweenyanga ezimbalwa ngabona ukuthi ngingakghona ukuba liphayona lesikhathi esizeleko godu. Abanye bazibuza ngesiqunto engisenzileko kodwana ngaragela phambili nginethamba lokuthi uJehova uzoyibusisa imizamwami yokwenza okungeziweko ekonzweni.

SABUYELA EQUEBEC SESIMAPHAYONA AKHETHEKILEKO

Ngo-1964, sinoSimone safumana isabelo sokuba maphayona akhethekileko edorobheni leQuebec, la esakhulela khona. Lapho saba maphayona akhethekileko iminyaka emibalwa. Ngesikhatheso iindlela zokutjhumayela besele zithuthukile, nanyana kunjalo, saqalana nokuphikiswa.

Ngelinye ilanga bekungoMgqibelo entambama, ngabotjhwa eSainte-Marie, okulidorobho elincani eliseduze neQuebec. Ipholisa lakhamba nami emaphoyiseni, langivalela ejele ngombana bengitjhumayela umuzi nomuzi ngaphandle kwemvumo. Ngemva kwesikhathi esithileko, ngavela phambi komahluleli uBaillargeon, indoda ebeyingithusela. Yangibuza ukuthi ngubani ozongijamela ekhotho. Ngathi nangimtjela ukuthi ngizokujanyelwa nguGlen How,a obekakhulunyelwa kuhle kwezomthetho nakuziwa eendabeni zokuvikela aboFakazi bakaJehova ngesikhatheso, warhuwelela wathi: “Kubayini ujanyelwa nguye!” Ikhotho yangazisa ukuthi umlandu ebengibekwe wona usuliwe.

Ukuphikiswa komsebenzethu eQuebec kwenza kwaba budisi ukufumana iindawo ezisebujamweni obuhle ebesingaziqatjha bona sibambele kizo imihlangano. Ibandla lethu elincani lafumana igaraji yakade emakhaza. Ukuze ifuthumale, abafowethu bebasebenzisa i-heater yamafutha. Besihlala phasi, bayibungelele, babelane okuhlangabezwane nakho okukhuthazako ngaphambi kokuthoma kwesifundo.

Kuyathabisa ukubona imiphumela emihle yomsebenzi wokutjhumayela eQuebec. Ngabo-1960, bekunamabandla ambalwa amancani edorobheni leQuebec, esifundeni seCôte-Nord neGaspé Peninsula ahlanganisiweko. Namhlanjesi kuneengodi ezingaphezu kwezimbili eendawenezo begodu abafowethu bahlanganyela emaWolweni amahle womBuso.

ISIMEMO SOKUJIKELEZA

Ngo-1970, sinoSimone samenyelwa esabelweni esitjha sokujikeleza. Kwathi ngo-1973, saba babonisi besifunda. Eminyakeni leyo, ngafunda okunengi kubafowethu ebebenza kuhle emsebenzini wokujikeleza, umfowethu uLaurier Saumurb noDavid Splane.c Ngemva komhlangano wesigodi, mina noDavid besinikelana imibono yokuthi singathuthukisa njani ekufundiseni kwethu. Ngikhumbula ngelinye ilanga uDavid athi kimi: “Léonce, ngiyithandile ikulumakho yokuphetha. Yona beyizwakala, kodwana ngekulumo leyo bengingenza iinkulumo ezintathu!” Nangenza ikulumo, bengikhuluma amaphuzu amanengi, yeke ngafunda ukukhuluma amaphuzu aqakathekileko ngamezwi ambalwa.

Abajikelezi abababonisi besifunda babelwa ukukhuthaza ababonisi beengodi. Nanyana kunjalo abarhuweleli abanengi beQuebec bebangazi kuhle. Bengithi nangivakatjhele isigodi sabo, bafune ukusebenza nami esimini. Nanyana bengikuthabela ukusebeza nabo esimini, bengingasitholi isikhathi esaneleko sokuba nabajikelezi. Kwesinye isenzakalo, umjikelezi wangikhumbuza wathi, “Kumnandi ukukubona usebenza nabafowethu, kodwana ungakhohlwa ukuthi uzele ukuzokusiza mina iveke le. Nami ngiyakutlhoga ukukhuthazwa.” Iselulekweso sangifundisa okunengi.

Okudanisako, ngo-1976 kwenzeka into ebuhlungu nengakalindeleki. Umkami engimthandako uSimone, wagula wabangwa neenzibi, ekugcineni wahlongakala. Umoya ebekanawo wokungabi marhamaru nokuthanda uJehova kwamenza wabamfazi othandekako. Ukuhlala ngimajadu ekonzweni kwangisiza bona ngiqalane nobujamo bokulahlekelwa mkami begodu ngiyamthokoza uJehova ngokungisekela kwakhe esikhathini esibudiseso. Ekukhambeni kwesikhathi, ngatjhada noCarolyn Elliott, udade oliphayona elitjhisekako, elikhuluma isiNgisi, eleza eQuebec lazokulotjha la kunetlhogeko khona yabatjhumayeli. UCarolyn bekabathanda abanye ngokusuka ehliziyweni begodu bekakhulumiseka lula, khulukhulu kilabo abaneenhloni. Wangisiza khulu nakahlanganyela nami emsebenzini wokujikeleza, leso kwaba sibusiso.

UMNYAKA OQAKATHEKILEKO

NgoJanabari 1978 bangibawa bona ngiyokufundisa isiKolo sokuthoma samaPhayona eQuebec. Ngathukwa khulu ngombana iimfundwezi bezizitjha kimi njengombana bezizitjha ebafundini. Kwangithokozisa ukuthi eklasini lokuthoma bekunamaphayona anelemuko emsebenzini lo. Bengibafundisa kodwana ngafunda okunengi kibo.

Nasele kuyokuphela umnyaka ka-1978, kwaba nomhlangano weentjhabatjhaba onesihloko esithi “Victorious Faith” ebewusetatawini lezemidlalo eMontreal. Bekumhlangano omkhulu khulu ekhesaba nawo eQuebec bekunabantu abangaphezu kwabayi-80 000. Ngabelwa bona ngisebenze emNyangweni wezeendaba. Ngakhuluma neembikindaba ezinengi begodu kwangithabisa ukubona iindaba ezimnandi abazitlolileko. Emrhatjhweni nema-tv bekunemikhulumiswano ebeyidlala ama-iri angaphezu kwama-20 kwagadangiswa iindaba ezingaphezu kwamakhulukhulu. Kwababufakazi obuhle tle lobo!

UKUTJHUMAYELA KWENYE ISIMU

Ngo-1996 kwenzeka itjhuguluko elikhulu epilwenami. Ngemva kokuthi ngilotjhe esimini ekhuluma isiFrench eQuebec solo ngabhajadiswa ngabelwa bona ngiyokusiza esimini ekhuluma isiNgisi esifundeni seToronto. Bengizizwa ngingakakulungeli ukuyokusiza nangicabanga ukuthi isiNgisi angisazi kuhle, kodwana bekufuze ngiyokubeka iinkulumo ngaso. Bekutlhoga bona ngithandaze khulu begodu ngithandaze kuJehova ngokungeziweko.

Bengithukiwe ngaphambi kobana ngiyokulotjha esifundenesi, kodwana ngayithabela iminyaka emibili ngiseToronto. UCarolyn wabanesineke wangisiza bona ngijwayele ukukhuluma isiNgisi, nabafowethu balapho nabo bangisekela bebangikhuthaza. Saba nabangani abanengi kungakapheli isikhathi eside.

Ukungezelela emsebenzini nekulungiseleleni umhlangano ngepelaveke ngaboLosihlanu bengisebenza i-iri ngitjhumayela umuzi ngomuzi. Kungenzeka abanye bebazibuza, ‘Kubayini uya esimini khisibe ipelaveke izokuba majadu kangaka?’ Kodwana bekungithabisa ukutjhumayela ngicoce nabantu. Sikhuluma nje, ukutjhumayela kusangikhuthaza tle.

Ngo-1998, sinoCarolyn sabelwa ukuba maphayona akhethekileko eMontreal. Kwaphela iminyaka ngisebenza ngokuhlela umsebenzi okhethekileko wokutjhumayela tjhatjhalazi, ngisebenza nababiki beendaba ukulwisana nokubandlululwa kwaboFakazi bakaJehova. SinoCarolyn sithabela ukutjhumayeza abantu abavela kezinye iinarha abafudukele eCanada abazimisele ukufunda iBhayibheli.

Nangiqala emuva eminyakeni ema-68 ngiyinceku kaJehova ngizizwa ngibusisekile. Ukufunda ukutjhumayela nokusiza abanye bazi iqiniso kuyanganelisa. Ngemva kobana indodakazami uLise nendodakwakhe bakhulise indodanabo bathoma ukuba maphayona wesikhathi esizeleko. Ukubona indlela akhuthalele ngayo ukutjhumayela kuyangithabisa. Ngiyawathokoza amaKrestu angifundisa ngesibonelo sawo neenyalo ezihle angisiza ngathanda uJehova khulu, ngakghona nokumenzela imisebenzi ehlukahlukeneko. Ngalemuka ukuthi ukuthembeka emsebenzini esiwenzela uJehova kuzokwenzeka kwaphela nasithembela kuye nemmoyenakhe ocwengileko. (Rhu. 51:12) Ngisaragela phambili ngithokoza uJehova ngokuthi angivumele bona ngidumise ibizo lakhe.—Rhu. 54:7.